Bondie Jéhovah a Limem Kreater tou kitsoz ek Li tou-pwisan. Se akoz sa ki bann dimounn ena tandans pou rann Bondie responsab pou tou kitsoz ki arive dan lemond mem bann move kitsoz. Me get seki Labib dir lor vre Bondie:

• “Jéhovah Li drwat dan tou seki Li fer.”​—Psaume 145:17.

• “Dan tou seki Li [Bondie] fer ena lazistis. Li enn Bondie fidel ki pa fer okenn linzistis; Li enn Bondie ki zis ek ki drwat.”​—Deutéronome 32:4.

• “Jéhovah Li ranpli ar lafeksion ek Li ena mizerikord.”​—Jacques 5:11.

Bondie pa provok bann maler. Me eski savedir ki Li ankouraz lezot pou fer bann move kitsoz? Inposib. Bann lekritir dir: “Kan enn kikenn dan leprev, fode pa li dir: ‘Bondie pe teste mwa.’” Kifer? “Parski pa kapav teste Bondie par bann move kitsoz, ek Li pa teste personn dan sa fason-la.” (Jacques 1:13) Bondie pa pous enn dimounn pou fer seki move zis pou teste li. Si se pa Bondie ki responsab, alor kifer tou sa bann move kitsoz la arive?

Labib donn nou enn rezon kifer bann dimounn soufer: “Bann moman ek bann levennman ki nou pa atann ariv zot tou.” (Ecclésiaste 9:11) Bann levennman ki nou pa atann, kouma par exanp bann aksidan, arive bien souvan parski nou retrouv nou dan enn move plas dan enn move ler. Preske 2000 an avan Jésus ti koz lor enn katastrof: Enn latour ti tonbe ek 18 dimounn ti mor. (Luc 13:1-5) Se pa akoz fason ki zot ti amenn zot lavi ki zot finn mor; me se zis parski zot ti anba sa latour-la kan li’nn tonbe. Pa tro lontan, an Zanvie 2010 finn ena enn tranbleman-de-ter dan Haïti. Dapre gouvernman Haïti, plis ki 300,000 dimounn finn mor. Sa katastrof-la finn touy tou sa bann dimounn-la san get figir. Enn maladi osi kapav afekte ninport kisannla, ninport kan.

Sertin kapav dir: ‘Eski Bondie pa kapav anpes sa bann maler-la arive? Eski Li pa kapav protez bann bon dimounn kont sa bann maler-la?’ Pou ki Bondie fer kitsoz dan sa bann sitiasion-la, savedir ki, avan mem ki enn maler arive, Li bizin fini kone. Li vre ki Bondie ena kapasite pou predir lavenir, me selman, li bon nou reflesi lor sa kestion-la: Eski touletan Li swazir pou servi sa pouvwar-la?​—Isaïe 42:9.

Bann lekritir dir: “Bondie, Li dan lesiel; Li fer tou seki Li kontan.” (Psaume 115:3) Jéhovah fer seki Li zize neseser pou fer​—pa tou seki Li  kapav fer. Sa aplik osi avek seki Li desid pou kone alavans. Par exanp, apre ki lemal ti ogmante dan bann lavil Sodome ek Gomorrhe, Bondie ti dir Abraham: “Mo pou desann pou gete si zot pe azir parey kouma sa kriye ki mo pe tande la. Sinon, mo kapav kone.” (Genèse 18:20, 21) Pandan enn tan, Jéhovah pa’nn rod kone ki kantite lemal ti ena dan sa bann lavil-la. Li parey azordi, Jéhovah kapav swazir pou pa konn tou kitsoz alavans. (Genèse 22:12) Sa li pa enn sign ki Bondie Li inparfe ouswa Li feb. Labib dir nou ki tou “seki Li fer, parfe.” Sa montre nou ki se an rapor avek so proze ki Bondie servi so pouvwar pou konn lavenir; zame Li fors bann dimounn pou swiv enn sertin semin. b (Deutéronome 32:4) Alor ki konklizion nou kapav tire? Se zis pou sertin kitsoz ek kan Li, Li anvi ki Bondie desid pou servi sa pouvwar-la.

An parti, bann dimounn osi, zot responsab bann maler ki pe arive zordi. An realite, enn dimounn pa fer enn move aksion enn kout koumsa, sa arive an plizir letap. Gete kouma Labib dekrir sa. “Enn dimounn tante kan li les so prop dezir atir li ek antrenn li. Apre, kan sa dezir-la inn devlope, li donn nesans pese; lerla kan pese-la li akonpli, sa amenn lamor.” (Jacques 1:14, 15) Kan enn dimounn les bann move dezir dominn li, pena bare, li pa pou kapav evit bann move konsekans. (Romains 7:21-23) Kouma listwar montre, bann dimounn finn komet bann aksion orib ek finn amenn boukou soufrans. Anplis bann move dimounn kapav inflians lezot pou fer parey kouma zot. Kan zot fer sa, se koumadir zot pe fann lemal partou.​—Proverbes 1:10-16.

Eski Bondie bizin intervenir pou anpes bann dimounn fer sa bann move kitsoz la? Reflesi lor fason ki Bondie finn kree nou. Bann Lekritir dir ki Bondie finn kree bann dimounn dan so resanblans. Alor, bann dimounn ena kapasite pou reflet bann kalite Bondie. (Genèse 1:26) Bondie finn donn tou bann dimounn liberte pou swazir. Alor, nou tou nou kapav swazir pou kontan Bondie ek res atase ar Li kan nou fer seki drwat devan so lizie. (Deutéronome 30:19, 20) Si Bondie ti fors bann dimounn pou swiv enn sertin semin, savedir ki sa kado ki Li’nn donn nou la, pa servi nanye. Lerla, nou ti pou koumadir bann masinn ki’nn programe pou fer exakteman seki dir nou fer! Li parey osi si destin (ouswa Kismet) ti diriz nou lavi. Bondie vremem donn nou enn gran loner kan Li les nou fer nou prop swa! Me  ki nou kapav dir konsernan bann maler ki arive akoz dimounn fer erer ouswa akoz zot bann move swa? Sa bann maler-la pa pou kontign existe pou touletan.

Si ou demann enn Indou ouswa enn Boudis sa kestion ki trouv lor kouvertir sa magazinn-la, sirman li pou reponn: “Se akoz lalwa Karma ki bann bon dimounn konn bann maler. Zot pe pey pese ki zot inn fer dan zot bann ansien lavi.” c

Me ki Labib dir lor lamor? Dan zardin Éden, kot premie zom ti kree, nou Kreater ti dir Adam: “To kapav manz frwi tou bann pie ki ena dan zardin, kantite ki to anvi. Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.” (Genèse 2:16, 17) Si Adam ti obeir Bondie, li ti pou viv pou touletan. Me parski li’nn dezobeir komannman Bondie, li’nn gagn enn pinision, lamor. Amezir ki bann zanfan inn ne, “lamor finn fane parmi tou bann dimounn.” (Romains 5:12) Alor nou kapav dir ki lamor se “saler ki pese peye.” (Romains 6:23) Labib dir osi: “Sa kikenn ki’nn mor-la, finn libere ar so pese.” (Romains 6:7) An de-trwa mo, bann dimounn pa kontign pey zot pese apre zot lamor.

Bann milyon dimounn zordi krwar ki nou soufer akoz lalwa Karma. Zot aksepte zot soufrans ek mem soufrans lezot, san ki sa deranz zot. Me si enn dimounn li ena sa kalite rezonnman la, an realite li pena okenn lespwar ki enn zour sa bann move kitsoz la pou arete. Sel kitsoz ki li panse pou kapav soulaz ek liber li ar sa sik reinkarnasion la, se enn bon kondwit ek enn konesans spesial. Biensir, sa bann panse-la zot bien diferan ar seki Labib ansegne. d

Se pa bann dimounn ki prinsipal responsab bann move kitsoz. Labib koz lor enn anz Bondie, Satan Lediab, ki koumansman ti fidel. Me, li “pa’nn tini ferm dan laverite” ek li’nn amenn pese dan lemond. (Jean 8:44) Li finn lev enn rebelion dan zardin Éden. (Genèse 3:1-5) Jésus Christ ti apel li “sa kikenn ki move la” ek “sef lemond.” (Matthieu 6:13; Jean 14:30) Laplipar dimounn finn swiv Satan kan zot finn les li pous zot pou dezobeir bann lalwa Jéhovah ki zis. (1 Jean 2:15, 16) Premie Jean 5:19 dir: “Lemond antie li dan pouvwar sa kikenn ki move la.” Ena lezot anz ankor ki finn vinn move ek zot finn al dan kote Satan. Labib dir ki Satan ek so bann demon “pe met tou bann dimounn lor later antie dan lerer,” ek pe amenn ‘maler lor later.’ (Révélation 12:9, 12) Alor, prinsipal responsab lemal se Satan Lediab.

Li kler alor ki Bondie pa responsab bann maler ki arive zordi, ni Li fer bann dimounn soufer. Okontrer Li’nn promet pou eliminn lemal. Prosin lartik pou explik sa.