Mo’nn grandi dan Alicante, enn lavil dan lakot les l’Espagne. Mo fami pa ti viv kouma tou fami, akoz sa kan mo ti zenn mo ti pas tou mo letan dan lari. Pre kot mo lakaz ti ena enn latelie ki repar bann larou. Laba mo finn fer kamarad avek José María, enn bann travayer. Li ti enn dimounn bien amikal ek li ti donn mwa latansion ki mo pa ti gagne dan mo fami. Mem si li ti 20 an pli gran ki mwa, dan bann moman difisil li ti kouma enn vre frer ek enn vre kamarad pou mwa.

José María ti’nn koumans etidie Labib avek bann Temwin Zeova. Mo ti kapav dir ki vremem li ti kontan Parol Bondie, ek souvan li ti partaz seki ena dan Labib avek mwa. Mo ti ekout li avek boukou respe, me zame mo ti interese vremem ar seki li ti pe dir. Mo ti enn adolesan ek mo leker ti atase ar lezot kitsoz. Me selman, sa ti pou sanze.

Mo pa tro kontan koz lor sa aksidan-la. Seki mo kapav dir, mo ti azir kouma enn bet ek mo pa ti kas latet ar nanye. Dan enn sel zour, mo lavi inn sanze net. Mo ti enn zenes bien aktif, me enn sel kou mo’nn trouv mwa paralize lor lili lopital. Li ti bien difisil pou mo aksepte mo sitiasion. Sak fwa mo ti demann momem: ‘Eski li vo lapenn viv?’

José María ti vinn get mwa lopital, ek bien vit li ti fer laranzman pou ki bann Temwin Zeova dan landrwa vinn rann mwa vizit souvan. Sa bann vizit-la ti bien tous mwa. Zis apre ki mo’nn sorti dan ICU, mo’nn koumans etidie Labib. Mo finn aprann kifer bann dimounn soufer ek mor, ek kifer Bondie pe permet bann move kitsoz arive. Mo finn osi aprann seki Bondie pou fer dan lavenir. Later pou ranpli avek bann dimounn parfe ek personn pa pou dir: “Mo malad.” (Izai 33:24) Se premie fwa dan mo lavi ki mo ti gagn enn gran lespwar.

Kan mo ti sorti lopital, mo ti progrese vit-vit dan mo letid Labib. Mo ti kapav mem asiste sertin renion bann Temwin Zeova ek partisip dan zot laktivite predikasion lor enn sez roulant spesial. Le 5 Novam 1988, kan mo ti ena 20 an mo ti batize dan enn benwar spesial. Zeova finn ed mwa pou ena enn latitid pozitif. Me ki mo ti kapav fer pou montre mo rekonesans?

Mo ti determine pou pa les mo sitiasion anpes mwa fer tou seki mo kapav dan servis Zeova. Mo ti anvi progrese. (1 Timote 4:15) O-koumansman, sa pa ti fasil parski mo fami ti opoze ar mo nouvo krwayans. Me mo ti ena mo bann konpagnon Kretien ki ti kouma mo bann frer ek ser. Zot ti fer tou pou mo pa rat okenn renion ek zot ti mem amenn mwa dan predikasion.

Selman, avek letan, li ti kler ki mo ti pou bizin enn swin spesial 24 lor 24. Apre boukou resers, finalman mo ti trouv enn sant pou bann andikape dan lavil Valence ki trouv 160 kilomet dan lenor Alicante. Se dan sa sant-lamem ki mo reste aster.

Mem si mo ti kondane pou res lor lili, mo ti determine pou kontign servi Zeova. Avek mo pansion invalid ek lezot led finansie, mo ti aste enn komputer ek mo ti fer instal li pre kot mo lili. Mo ti osi aste enn portab. Asterla, toule gramatin, sa dimounn ki okip mwa la alim mo komputer ek mo portab. Mo servi mo komputer avek led enn manet ki mo kontrole avek mo manton. Mo ena osi enn baget spesial ki mo tini avek mo labous. Sa baget-la permet mwa tip bann let lor mo klavie ek konpoz bann nimero lor mo portab.

Kouma eski sa teknolozi-la inn ed mwa? Premierman, li permet mwa gagn akse ar sit jw.org ek BIBLIOTHÈQUE EN LIGNE. Zot vremem bann zouti extraordiner pou mwa! Souvan mo pas plizir lertan par zour pou etidie ek fer resers lor bann piblikasion baze lor Labib. Sa ed mwa pou kontign aprann lor Bondie ek so bann zoli kalite. Ek sak fwa ki mo santi mwa tousel ouswa inpe dekouraze, touletan ena enn kitsoz lor sa sit-la ki remont mo moral.

Gras-a mo komputer mo kapav osi ekout bann renion ek partisipe. Mo kapav fer komanter, lapriyer, bann diskour, ek mem fer lektir magazinn Latour Degard. Mem si mo pa kapav al Lasal pou asiste bann renion, mo santi ki mo touzour enn manb sa kongregasion-la.

Lefe ki mo ena enn portab ek enn komputer, sa permet mwa pou res bien okipe dan predikasion. Li vre mo pa kapav al lakaz-lakaz parey kouma laplipar Temwin Zeova fer, me sa pa’nn anpes mwa prese. Avek sa bann zouti-la mo pe kapav partaz mo bann krwayans avek lezot. Ofet, mo telman kontan bann konversasion ki mo gagne lor telefonn, ki bann ansien dan mo kongregasion finn met mwa ansarz bann kanpagn predikasion par telefonn. Bann frer ek ser dan kongregasion ki malad ouswa vie ek ki pa kapav sorti kot zot, inn bien profit sa bann kanpagn-la.

 Me mo lavi pa tourn otour zis teknolozi. Sak zour, mo bann kamarad vinn get mwa. Zot amenn zot bann fami ek bann konesans ki interese ar Labib. Souvan, zot mem demann mwa pou kondir letid Labib la momem. Defwa ena bann fami ki vinn get mwa ek zot fer zot ladorasion an fami ansam avek mwa. Mo sirtou apresie kan bann ti zanfan asiz akote mwa lor lili ek dir mwa kifer zot kontan Zeova.

Mo bien kontan kan mo gagn sa kantite vizit-la. Bien souvan mo lasam ranpli avek bann kamarad ki sorti lwin ouswa pre pou vinn get mwa. Pa bizin dir, bann ki okip mwa dan sant inpresione ar lamour ki mo bann konpagnon ena pou mwa. Sak zour, mo remersi Zeova ki Li permet mwa form parti dan sa fami extraordiner la.

Ninport kan enn kikenn dir mwa bonzour ek demann mwa mo nouvel, mo zis dir: “Ala li la, lalit pe kontigne!” Biensir, mo kone mo pa tousel dan sa lalit-la. Malgre nou sitiasion ouswa bann difikilte ki nou pe gagne, tou bann Kretien pe amenn enn konba​—“gran konba lafwa.” (1 Timote 6:12) Ki finn ed mwa pou lite pandan tou sa bann lane-la? Sak zour mo priye Zeova ek mo remersi Li ki Li’nn donn mo lavi enn sans. Ek mo esey res okipe otan ki posib dan servis Zeova, ek mo res konsantre lor lesperans ki mo ena pou lavenir.

Souvan mo pans lemond nouvo ek kouma sa pou ete kan mo pou re-marse ek re-sote. Parfwa mo badinn avek José María, mo bon kamarad ki soufer polio. Mo dir li: ‘Si nou met enn paryaz galoupe, kisannla pou gagne?’ Li reponn: “Pli inportan se pa kisannla pou gagne, me ki nou la dan Paradi pou met sa paryaz-la.”

Li pa ti fasil pou mwa pou aksepte mo andikap. Mo kone mo’nn fer enn kitsoz bien bet kan mo ti adolesan, ek sa finn kout mwa bien ser. Kanmem, mo bien rekonesan ki Zeova pa’nn abandonn mwa. Li’nn donn mwa boukou kitsoz: enn gran fami Kretien, lanvi pou viv, lazwa pou ed lezot, ek enn zoli lespwar pou lavenir. Si mo bizin rezim mo santiman dan enn fraz, mo panse mo pou dir ki Zeova finn vremem donn mwa plis ki seki mo merite.