Enn zenn ki apel Will dir: “Si to pa lir Labib dan enn bon fason, kitfwa to pa pou trouv li interesan.”

 Eski to ti pou kontan kone kouma to kapav fer to lektir Labib vinn pli interesan? Sa lartik-la pou ed twa.

•  Fer bann zistwar ki ena dan Labib vinn reel

•  Fer bann resers!

•  Seki bann zenn panse

 Fer bann zistwar-la vinn vivan. Pou ed twa fer sa, swiv sa bann letap-la:

1.   Swazir enn parti ki to ti pou kontan etidie dan Labib. To kapav swazir enn levennman, enn parti dan bann Levanzil, ouswa enn lektir Labib avek lefe sonor ki ena lor jw.org.

2.   Lir sa parti ki to’nn swazir la. To kapav lir li tousel, ouswa lir li ansam avek to bann kamarad ouswa to fami. Enn kikenn kapav fer narater ek lezot kapav fer bann lezot personaz.

3.   Esey enn ouswa plizir parmi sa bann konsey-la:

   •   Fer enn desin ki reprezant seki to’nn lir. Ouswa to kapav fer plizir ti desin pou montre kouma bann levennman-la inn pase. Ekrir bann ti not anba to bann desin pou dekrir seki pe arive.

   •   Fer enn tablo. Par exanp, kan to pe lir lor enn personaz ki fidel, reflesi lor bann kalite ki li ti ena ek bann aksion ki li ti fer. Apre sa, esey reflesi kouma tousala ena enn lien avek bann benediksion ki li’nn gagne.

   •   Fer enn reportaz lor zistwar-la. Esey met twa dan plas bann diferan personaz ki ti ena dan zistwar-la ek “interviewe” bann personaz prinsipal ek bann temwin ki ti asiste sa levennman-la.

   •   Si enn parmi bann personaz dan zistwar-la ti pran enn move desizion, esey mazine ki ti pou arive si li ti pran enn bon desizion. Anou pran lexanp Pier kan li ti renie Zezi. (Mark 14:66-72) Kouma Pier ti kapav azir dan enn pli bon fason kan lezot ti met presion lor li?

   •   Si to ti pou kontan fer enn kitsoz ki pli kreatif, kree to prop zistwar kan to baz twa lor enn levennman dan Labib. Apre sa, to kapav ekrir bann leson ki to’nn aprann.​—Romin 15:4.

 Si to analiz bien bann detay, to kapav dekouver bann zoli trezor. Parfwa, zis enn-de mo kapav aprann twa boukou lor enn levennman ki’nn arive dan Labib.

 Par exanp, konpar Matie 28:7 avek Mark 16:7.

•    Kifer Mark dir ki Zezi ti pou aparet ar bann disip “ek Pier”?

•  Indis: Mark pa ti temwin sa bann levennman-la; savedir ki se Pier ki’nn donn li sa bann linformasion-la.

•  Trezor: Kifer sa ti rasir Pier kan li ti kone ki Zezi ti anvi trouv li? (Mark 14:66-72) Kouma Zezi ti montre ki li ti enn vre kamarad pou Pier? Kouma to kapav imit Zezi ek vinn enn bon kamarad pou lezot?

 Kan to fer bann zistwar ki ena dan Labib vinn reel, ek to fer bann resers, to lektir Labib pou vinn pli interesan!