Enn papiyon depann lor saler soley pou sof bann misk ki li servi pou anvole. Me bann zour kot letan kouver, bann papiyon lisou blan (genus Pieris) sof zot bann misk boukou pli vit ki bann lezot papiyon. Ki permet zot fer sa?

 Reflesi lor la: Avan zot anvole, boukou lespes papiyon res dan soley avek zot lezel ferme ouswa gran ouver. Parkont, papiyon lisou blan ouver so lezel an form V. Bann resers finn montre ki pou kapte maximum saler, papiyon-la bizin ouver sak lezel dan enn lang apepre 17 degre pou fer sa form V la. Sa pozision-la fer ki saler soley al direk dan bann misk ki dan so thorax, ek lerla sa sof so bann lezel pou ki li kapav anvole.

 Bann siantis dan Liniversite Exeter dan Langleter, finn esey kopie form V sa papiyon-la pou gete si zot kapav fer bann pano soler ki pli efikas. Kan zot inn fer sa, zot inn trouve ki kantite lenerzi ki zot prodir inn ogmante par 50%.

 Zot inn osi remarke ki kan soley tap lor lezel papiyon-la, li reflekte lalimier. Kan bann siantis inn esey kopie form V ek textir lezel sa papiyon-la, zot inn reisi fer bann pano soler ki pli leze ek ki pli efikas. Kan li’nn trouv sa, Profeser Richard ffrench-Constant, enn manb sa lekip-la, ti dir ki papiyon lisou blan li “enn exper dan kapte lenerzi soley.”

 Ki ou panse? Kan ou get form V ki enn papiyon lisou blan kapav fer ar so lezel, ki ou pou dir? Li’nn aparet par limem ouswa eski inn kree sa?