Nou konn bann krapo pie Zapone mal pou fason ki zot kriye. Zot kontign repet mem son ek kitfwa kapav paret ki zot pe kriye an-dezord. Me selman, mem si enn group krapo pe fer tapaz nou kapav rekonet kriye sak mal. Dan Zapon, bann dimounn ki fer resers lor bann krapo inn dekouver ki bann mal ki res dan mem plas, kriye bann femel dan enn fason partikilie ek bien organize.

 Reflesi lor la: Bann krapo pie Zapone mal fer bann son pou atir bann femel. Son-la koumans avek kord vokal zanimo-la ek amezir ki so son ogmante, li rezonn dan so sak vokal, ki koumadir enn gro boul lastik lor so lagorz.

 Kouma nou kapav fer diferans ant kriye enn mal ek bann lezot mal? Bann dimounn ki fer resers inn trouve ki zot pa kriye an-dezord, me kan bann mal pre ar zot kamarad, sakenn atann so tour pou kriye. Sa teknik efikas la permet ki son ki bann krapo fer pa melanze; bann mal-la gard zot lenerzi ek anmemtan sa kree enn zoli son. Anplis, kan zot fer sa, bann krapo kapav fer bann poz pou pa fatig zot.

 Bann ki fer resers lor bann metod kominikasion san difil, pe etidie fason ki bann krapo pie Zapone kriye ansam. Sa bann dimounn-la pe servi bann kalkil matematik pou amelior fason ki transmet bann data pou ki pena interferans ant zot. Sa metod-la permet ki ena mwins interferans, ek anmemtan sa depans mwins lenerzi.

 Ki ou panse? Kan ou get fason ki krapo pie Zapone fer bann son an group, ki ou pou dir? Li’nn aparet par limem ouswa eski inn kree sa?