Afaka Mampahery Ahy ve ny Baiboly?
Valiny ara-baiboly
Ie. (Romanina 15:4) Misy andinin-teny be dia be efa nampahery olona niatrika zava-tsarotra sy kivy ao amin’ny Baiboly. Andao hojerentsika ny sasany amin’izany.
Ho hitantsika ato ireto:
Manana olana
Salamo 23:4: “Na dia mamakivaky lohasaha maizim-pito aza aho, dia tsy misy loza atahorako, satria ianao no eo anilako.”
Inona no dikan’izany? Ho be herim-po ianao rehefa manana olana, raha mivavaka amin’Andriamanitra sy mitady tari-dalana ao amin’ny Teniny, izany hoe ny Baiboly.
Filipianina 4:13: “Manana ny hery hiatrehana an’izay rehetra mitranga aho, noho ilay manome hery ahy.”
Inona no dikan’izany? Na inona na inona olana mahazo anao, dia afaka manome hery hahafahanao miatrika an’ilay izy Andriamanitra.
Maty ny havana na namana
Mpitoriteny 9:10: “Tsy misy afaka miasa, na mikasa hanao zavatra, na mahazo fahalalana, na maneho fahendrena, any amin’ny Fasana.”
Inona no dikan’izany? Tsy mijaly ny olona maty, sady tsy afaka manisy ratsy antsika. Tsy mahatsiaro tena ry zareo.
Asan’ny Apostoly 24:15: “Hatsangan’Andriamanitra ny [maty].”
Inona no dikan’izany? Hovelomin’Andriamanitra indray ireny havana na namantsika efa maty ireny.
Manamelo-tena be loatra
Salamo 86:5: “Tsara toetra sy vonona hamela heloka mantsy ianao, Jehovah a ô! Be fitiavana sy tsy mivadika amin’izay rehetra miantso anao ianao.”
Inona no dikan’izany? Raha tena manenina amin’ny fahadisoana nataony sy tapa-kevitra ny tsy hamerina an’ilay izy intsony ny olona iray, dia havelan’Andriamanitra ny helony.
Salamo 103:12: “Toy ny halavitry ny atsinanana amin’ny andrefana, no anesorany ny fahotantsika ho lavitra antsika.”
Inona no dikan’izany? Rehefa mamela ny fahadisoantsika Andriamanitra, dia hoatran’ny hoe ariany any lavitra be any ilay izy. Tsy hoe hampahatsiahiviny antsika foana izy ireny mba hanamelohana antsika na hanasaziana antsika.
Malahelo
Salamo 31:7: “Hitanao ny fijaliako; fantatrao ny fahoriana mafy manjo ahy.”
Inona no dikan’izany? Hitan’Andriamanitra daholo izay zavatra mampijaly anao. Azony tsara izay tsapanao any am-ponao lalina any, na dia mety hoe tsy azon’ny hafa aza.
Salamo 34:18: “Akaiky an’izay torotoro fo i Jehovah, ary mamonjy an’izay kivy.”
Inona no dikan’izany? Manome toky Andriamanitra hoe hanohana anao foana izy rehefa malahelo ianao. Omeny hery ianao mba hahazakanao ny alahelonao.
Marary
Salamo 41:3: “Hanohana azy eo amin’ny fandriana aharariany i Jehovah.”
Inona no dikan’izany? Afaka manampy anao Andriamanitra raha marary mafy ianao. Omeny hery ianao sady ampiany hiadan-tsaina sy hiaritra. Omeny fahendrena koa ianao mba handraisanao fanapahan-kevitra tsara.
Isaia 33:24: “Ary tsy hisy olona hilaza hoe: ‘Marary aho.’”
Inona no dikan’izany? Mampanantena Andriamanitra hoe ho salama daholo ny olona rehetra amin’ny hoavy.
Miady saina
Salamo 94:19: “Rehefa be dia be ny zavatra nampitebiteby ahy, dia nampionona sy nampitony ahy ianao.”
Inona no dikan’izany? Raha miantehitra amin’Andriamanitra isika rehefa miady saina, dia afaka manampy antsika ho tony foana izy.
1 Petera 5:7: “Apetraho aminy daholo izay rehetra mampanahy anareo, satria miahy anareo izy.”
Inona no dikan’izany? Tsy hoe tsy miraharaha ny fijaliantsika Andriamanitra. Tiany raha resahintsika aminy amin’ny alalan’ny vavaka izay zavatra mampiady saina antsika.
Misy ady
Salamo 46:9: “Ataony tsy misy ady intsony eran-tany.”
Inona no dikan’izany? Kely sisa dia hanafoana ny ady ny Fanjakan’Andriamanitra.
Salamo 37:11, 29: “Ny mpandefitra ... no handova ny tany, ka ho faly be mihitsy satria tena hiadana. ... Ny olo-marina no handova ny tany, ka honina eo mandrakizay.”
Inona no dikan’izany? Hiadana mandrakizay eto an-tany ny tsara fanahy.
Manahy momba ny hoavy
Jeremia 29:11: “‘Fantatro tsara ny zavatra efa noeritreretiko hatao aminareo’, hoy i Jehovah. ‘Mieritreritra ny hanome anareo fiadanana aho fa tsy loza, mba hanananareo hoavy tsara sy fanantenana.’”
Inona no dikan’izany? Manome toky ny mpanompony Andriamanitra hoe tena hahafinaritra ny fiainana amin’ny hoavy.
Apokalypsy 21:4: “Hofafany ny ranomaso rehetra amin’ny mason’izy ireo, ary tsy hisy intsony ny fahafatesana, sady tsy hisy intsony ny alahelo na ny fitarainana na ny fanaintainana, fa efa lasa ny zavatra taloha.”
Inona no dikan’izany? Mampanantena Andriamanitra hoe hesoriny daholo ny zava-dratsy rehetra hitanao sy iainanao amin’izao.
a Jehovah no anaran’Andriamanitra. (Salamo 83:18) Jereo ilay lahatsoratra hoe “Iza moa i Jehovah?”
Mety ho Tianao Koa
NY TILIKAMBO FIAMBENANA
Handray Soa Ianao Rehefa Fantatrao hoe Tia Anao Izy
Manome toky ny Baiboly fa ho tsara be ny fiainantsika amin’ny hoavy.
VALIN’IREO FANONTANIANA ARA-BAIBOLY
Inona no Hanampy Ahy Hanana Fanantenana?
Misy boky iray tena azo itokisana afaka manampy anao hanatsara ny fiainanao dieny izao sady manampy anao hanantena fa ho tsara be ny hoavy.
FOTO-KEVITRA HAFA
Fampaherezana ho An’izay Nidonam-pahoriana
Rehefa maty ny olona akaiky anao, dia mety hieritreritra ianao hoe tsy tsapan’ny olona ny mahazo anao. Tsapan’Andriamanitra anefa ny alahelonao sady afaka manampy anao izy.
NY TILIKAMBO FIAMBENANA
Rehefa Mafy Loatra ny Manjo Anao
Mbola misy dikany ny fiainana na dia mafy aza ny manjo.
FAMPIANARAN’NY BAIBOLY TENA ILAINA
Nahoana Isika no Avelan’Andriamanitra Hijaly?
Misy valiny mampahery sy mahafa-po ao amin’ny Baiboly.
FAMPIANARAN’NY BAIBOLY
Hanandrana An’ilay Fianarana
Afaka mianatra Baiboly maimaim-poana miaraka amin’ny mpampianatra iray ianao.