Tena miavaka ny fanidin’ny voana beroberoka. Rehefa tsofin’ny rivotra mantsy ilay izy dia miala amin’ny lohan’ilay voninkazo ipetrahany, dia manidina hoatran’ny parachute kely. Na dia akaiky kelin’ny tany aza ry zareo no manomboka manidina, dia misy mahavita mandeha iray kilaometatra na mihoatra, nefa tsy mikasika ny tany mihitsy. Ahoana no ahavitan-dry zareo an’izany? Hitan’ny mpahay siansa vao haingana hoe mahavita mitsingevana elaela sy manidina mahitsy tsara ny voana beroberoka, ary avo efatra heny noho ny vitan’ny parachute ny vitany.

 Diniho izao: Misy tahony lavalava sy volovolo kely antsoina hoe pappus miaraka amin’ny voa tsirairay, dia ilay pappus no mahatonga an’ilay voa hitsingevana hoatran’ny parachute.

 Tsy izay ihany anefa. Misy rivotra mitambolimbolina miforona eo ambonin’ny pappus. Mihodinkodina ilay rivotra dia izay no mahatonga an’ilay pappus hiakatra, dia ela kokoa vao milatsaka amin’ny tany ilay voa.

 Milamina tsara ilay volovolo mahaforona ny pappus, dia izay no mahatonga an’ilay voa hanidina mahitsy tsara sy ela kokoa noho ny parachute. Folo isan-jaton’ny pappus ihany no misy an’ilay volovolo kely fa tsisy na inona na inona ny ambiny. Kely fotsiny izany ny zavatra ampiasain’ilay voa mba hanidinana.

 Te haka tahaka ny fomba fanidin’ny voana beroberoka ny mpahay siansa. Te hanamboatra drone kely, ohatra, ry zareo, dia angovo kely ihany no mampandeha an’ilay izy na tsy mila angovo mihitsy. Ho azo ampiasaina amin-javatra isan-karazany ilay drone, ohatra hoe mba hamantarana ny fahadiovan’ny rivotra.

 Ahoana ny hevitrao? Tongatonga ho azy ve ny fahaizan’ny voana beroberoka manidina, sa nisy namorona?