Jeremia 26:1-24
26 Izao no nolazain’i Jehovah, rehefa nanomboka nanjaka i Joiakima+ zanak’i Josia, mpanjakan’ny Joda:
2 “Izao no tenin’i Jehovah: ‘Mitsangàna eo an-tokotanin’ny tranon’i Jehovah, ary resaho ny momba ny* mponina rehetra ao amin’ny tanànan’i Joda, izay ho avy hivavaka* ao an-tranon’i Jehovah. Teneno azy daholo izay asaiko lazainao. Aza misy anesorana na teny iray aza.
3 Sao dia mba hihaino ihany izy ireo, ka samy hiala amin’ny ratsy fanaony. Dia hiova hevitra* aho ka tsy hampihariko aminy indray ilay loza nokasaiko hamelezana azy ireo ho valin’ny ratsy nataony.+
4 Lazao amin’izy ireo hoe: “Izao no tenin’i Jehovah: ‘Raha tsy mihaino ahy ianareo ka tsy manaraka ny lalàna* nomeko anareo,
5 sy tsy mihaino ny tenin’ny mpaminany mpanompoko izay nirahiko imbetsaka* ho any aminareo nefa tsy nohenoinareo,+
6 dia hataoko hoatran’i Silo+ ity trano ity, ary hampiasa ny anaran’ity tanàna ity ny firenena rehetra eny ambonin’ny tany rehefa manozona.’”’”+
7 Nandre an’i Jeremia niteny an’ireo teny ireo tao an-tranon’i Jehovah ny mpisorona sy ny mpaminany ary ny vahoaka rehetra.+
8 Koa rehefa tapitra voalazan’i Jeremia daholo ny teny nasain’i Jehovah nolazainy tamin’ny vahoaka manontolo, dia nosamborin’ny mpisorona sy ny mpaminany ary ny vahoaka rehetra izy, ka hoy ireo: “Tena ho faty ianao!
9 Nahoana ianao no maminany amin’ny anaran’i Jehovah hoe: ‘Ho lasa hoatran’i Silo ity trano ity, ary ity tanàna ity ho rava ka tsy hisy mponina intsony’?” Dia nitangoronan’ny olona rehetra i Jeremia, tao an-tranon’i Jehovah.
10 Rehefa nahare an’izany teny izany ny andrianan’ny Joda, dia niakatra avy any amin’ny tranon’ny* mpanjaka mba hankany amin’ny tranon’i Jehovah. Ary nipetraka teo amin’ny fidirana amin’ilay vavahady vaovao amin’ny tranon’i Jehovah+ izy ireo.
11 Dia hoy ny mpisorona sy ny mpaminany tamin’ireo andriana sy ny vahoaka rehetra: “Mendrika ny homelohina ho faty ity lehilahy ity,+ satria naminany fa hisy loza hanjo an’ity tanàna ity. Ary ny sofinareo mihitsy no efa naheno an’izany.”+
12 Dia hoy i Jeremia tamin’ny andriana rehetra sy ny vahoaka rehetra: “I Jehovah no naniraka ahy hilaza ny faminaniana rehetra henonareo teo, hoe hisy loza hanjo an’ity trano ity sy ity tanàna ity.+
13 Koa ahitsio ny lalanareo sy ny ataonareo, ary ankatoavy ny tenin’i Jehovah Andriamanitrareo, dia hiova hevitra* i Jehovah ka tsy hampihariny indray ilay loza efa nolazainy hamelezana anareo.+
14 Fa izaho kosa efa eto am-pelatananareo, ka ataovy amiko izay hitanareo fa tsara sy mety.
15 Fantaro tsara anefa fa raha mamono ahy ho faty ianareo, dia mamono olona tsy manan-tsiny, ka ho meloka ho nandatsa-dra ianareo sy ity tanàna ity ary ny mponina ato. I Jehovah mihitsy mantsy no naniraka ahy hilaza ny teny rehetra renareo teo!”
16 Dia hoy ny andriana sy ny vahoaka rehetra tamin’ireo mpisorona sy mpaminany: “Tsy mendrika ny homelohina ho faty io lehilahy io, satria tamin’ny anaran’i Jehovah Andriamanitsika no nitenenany tamintsika.”
17 Nitsangana koa ny anti-panahy sasany tao amin’ilay tany, ka niteny tamin’ny vahoaka rehetra tafavory teo hoe:
18 “Naminany i Mika+ avy any Moreseta tamin’ny andron’i Hezekia+ mpanjakan’ny Joda, ka nilaza tamin’ny vahoakan’ny Joda rehetra hoe: ‘Izao no lazain’i Jehovah Tompon’ny tafika:
“Hasaina hoatran’ny saha i Ziona,Ho lasa korontam-bato mivangongo i Jerosalema,+Ary ny tendrombohitra misy an’ilay Trano* dia ho toy ny toerana avo any an’ala.”’*+
19 “Namono an’i Mika ve i Hezekia mpanjakan’ny Joda sy ny Joda rehetra tamin’izay? Tsy natahotra an’i Jehovah ve i Hezekia ary nitalaho famindram-po tamin’i* Jehovah, ka niova hevitra* i Jehovah dia tsy nampihariny indray ilay loza efa nolazainy hamelezana azy ireo?+ Koa tena mitady loza* mihitsy isika.
20 “Nisy lehilahy hafa koa naminany tamin’ny anaran’i Jehovah, dia i Oria zanak’i Semaia avy any Kiriata-jearima.+ Naminany hoatran’i Jeremia izy hoe hisy loza hanjo an’ity tanàna ity sy ity tany ity.
21 Nahare ny tenin’i Oria i Joiakima+ Mpanjaka sy ny miaramilany matanjaka rehetra ary ny andrianany rehetra. Koa nitady hamono azy ho faty+ ny mpanjaka. Natahotra i Oria raha vao naheno an’izany, ka nandositra nankany Ejipta.
22 Dia nirahin’i Joiakima Mpanjaka nankany Ejipta i Elnatana+ zanak’i Akbora sy ny lehilahy vitsivitsy.
23 Koa nalain’izy ireo avy tany Ejipta i Oria, ary nentiny tany amin’i Joiakima Mpanjaka. Dia novonoin’ny mpanjaka tamin’ny sabatra izy+ ary natsipiny tany amin’ny fasam-bahoaka ny fatiny.”
24 Narovan’i Ahikama+ zanak’i Safana+ kosa i Jeremia, ka tsy natolotra hovonoin’ny vahoaka.+
Fanamarihana
^ Na: “miresaha amin’ny.”
^ Na: “hiankohoka.”
^ Na: “hanenina.”
^ Na: “toromarika.”
^ Abt: “nifohazako maraina sy nirahiko.”
^ Na: “lapan’ny.”
^ Na: “hanenina.”
^ Na: “tempoly.”
^ Na: “tampon-tendrombohitra misy ala.”
^ Na: “nanenina.”
^ Na: “loza ho an’ny tenantsika.”
^ Abt: “niezaka nampitony ny tarehin’i.”
