Salamo 56:1-13
Ho an’ny mpitarika; atao mifanaraka amin’ilay hoe “Voromailala Tsy Mahaloa-peo any An-tany Lavitra.” Miktama* nataon’i Davida, tamin’izy voasambotry ny Filistinina tany Gata.+
56 Iantrao aho, Andriamanitra ô, fa manafika* ahy ny olombelona mety maty.
Tsy mitsahatra miady amiko sy mampijaly ahy izy ireo tontolo andro.
2 Mitady handrapaka ahy foana ny fahavaloko;Maro no mirehareha miady amiko.
3 Rehefa matahotra aho,+ dia miantehitra aminao.+
4 Andriamanitra no itokisako, ary deraiko ny teniny,Andriamanitra no itokisako, ka tsy matahotra aho.
Inona moa no azon’izay olombelona* atao amiko?+
5 Ataon’izy ireo foana izay tsy hampahomby an’izay ataoko;Ny hanisy ratsy ahy ihany no masaka ao an-tsainy.+
6 Miafina izy ireo mba hanafika ahy;Arahiny maso daholo ny diako,+Satria te hamono ahy* izy ireo.+
7 Sazio izy ireo noho ny ratsy nataony.
Aripaho ao anatin’ny hatezeranao ireo firenena, Andriamanitra ô!+
8 Fantatrao daholo ny fahoriako tamin’izaho nirenireny.+
Angony ao anaty sininao* ny ranomasoko.+
Tsy efa voasoratra ao anaty bokinao ve ireny?+
9 Hiverin-dalana ny fahavaloko, amin’ny andro iantsoako vonjy aminao.+
Izao no atokisako: Manohana ahy Andriamanitra.+
10 Andriamanitra no itokisako, ary deraiko ny teniny;I Jehovah no itokisako, ary deraiko ny teniny;
11 Andriamanitra no itokisako, ka tsy matahotra aho.+
Inona moa no azon’izay olombelona atao amiko?+
12 Voafatotry ny voady nataoko taminao aho, Andriamanitra ô!+Hanolotra fisaorana ho anao aho.+
13 Fa novonjenao tsy ho faty aho+Ary nosakananao tsy ho tafintohina ny tongotro,+Mba handehanako eo anatrehan’Andriamanitra, miaraka amin’ny* velona.+
Fanamarihana
^ Na: “mitady handrapaka.”
^ Abt: “nofo.”
^ Na: “hanapitra ny aiko.”
^ Na: “siny hoditrao.”
^ Abt: “ao anatin’ny fahazavan’ny.”
