MIDIKA hoe “Lalina” ny hoe Honduras amin’ny teny espaniola. Io angamba no notenenin’i Christophe Colomb, rehefa hitany ny ranomasina teo amin’ny morontsiraka atsinanan’ilay faritra. Misy milaza fa izay no nahatonga ny anaran’ilay tany hoe Honduras.

Miray hina be ny fianakaviana any, sady tsy misara-mianakavy. Miara-midinika tsara koa ny mpivady rehefa hanapa-kevitra momba ny fianaran’ny ankizy, ny fandaniana ao an-trano, na ny zava-dehibe hafa.

Metisy ny ankamaroan’ny olona any, izany hoe taranaky ny tompon-tany sy ny Eoropeanina. Misy foko atao hoe Chortí any, ary tena tompon-tany ny razamben’izy ireo. Misy foko hafa koa any, anisan’izany ny Garifuna, izay mpiavy ny razambeny.

Ny Garifuna dia taranaky ny Afrikanina sy foko indianina atao hoe Karaiba, izay nipetraka tao  amin’ny Nosy Saint-Vincent. Tonga tao amin’ny Islas de la Bahía (Nosy Baie) izy ireo tamin’ny 1797. Tatỳ aoriana dia nonina tany Amerika Afovoany izy ireo, tany amin’ny morontsiraka atsinanana. Niparitaka nanerana an’i Amerika Afovoany sy Amerika Avaratra izy ireo avy eo.

Tia mandihy be ry zareo, sady mihetsiketsika be ilay dihiny satria manaraka ny ngadon’ny amponga. Tena marevaka ny akanjo nentim-paharazana any. Fanao any koa ny mitantara angano. Anisan’ny sakafo mampiavaka azy ireo ny ereba, izay mofo mangahazo mitapelaka be.

Misy fiangonan’ny Vavolombelon’i Jehovah 400 eo ho eo any Honduras. Atao amin’ny teny espaniola ny fivorian’izy ireo, ary misy koa amin’ny teny anglisy, garifuna, miskito, sinoa mandarin, ary Tenin’ny Tanana any Honduras.