Ibiiblya yahohimya wiira akhwaka Kristu, iriyari yo makristau oopacera yaanaahala ukhumelela eetthucihi yaahala uhonona ikhweeli yo mbiiblyani. (Miteko 20:29, 30) Unavinreene ukati, yaheerannya yeeyo yaahimiye. Citthu ciitthucihaawe Yesu ayo yahotakaniha ni citthu ciniitthucihaaya ittiini cinaaswalela anluku ahikhanle eekhweeli, ni ikhumelo uyo ukatyuuyo uhokhumelela ukristau wootakiha. (2 Timotiyu 4: 3, 4) Nincuwela cani wiira mahukwaala ninawiiweeha ratta ile ineetthucihaaya Ibiiblya?

Ukati Yehova woocuweliha ikhweeli. Yehova ahohimya wiira waphiyaka ‘ukati wookhicera, ucuwelaca weekhweeli waanaahala winciva.’ (Daniele 12:4) Mwaakha wo 1870, mphwinko mwankaani waatthu yaavyaavya ucuwela ikhweeli, wahoonenela wiira citthu ceetthucihiya mmattiinini khacaakumihiya mbiiblyani. Vano, uyo mpwinkooyo wahancera waavyaavya wiira woonenele ile ineetthucihaaya Ibiiblya, ni Yehova ahaacaaliha.

Alopwana ookhuluvelya yaheekurumica usoma Ibiiblya wiira yiiweehe. Anamasoma Ibiiblya, ale anitthukulenle iphiro, yaasoma Ibiiblya ni inanna toko hiivano mahukwaala nimpankeehu . Ayo yaasoma khula mwaha. Yaphwanyaka mbiiblyani iversiikulu yoorikarika wiiweeha, ayo yaanaavyaavya inanna iversiikulu cikhwaawe intaphulelaaya uyo mwahooyo. Vano, yoonaka wiira ile yiiwalyaaya khinvirikana ni citthu cikhwaawe cinhimyaaya Ibiiblya, ayo yaanantikha. Nlattu woohiya Ibiiblya yiittonkacaka imwaneennyaaya, ayo ahoonenela ikhweeli caarimelihiye toko ncina na Nluku ni Umwennyaawe, ile inaapheelelaawe apinaatamu ni upanka watuninyani, itthu inwiirannyeela atthu ookhwa ni niweherero nowunwelelihiya akhwile. Wiikurumica waya utotha ucuwela ikhweeli, uhaakavihera woopwa nhina wo citthu coohikhweeli cinaaminiya ni cimpankiya.—Joau 8:31, 32.

Mwaakha wo 1879, Anamasoma Ibiiblya yahocuwela wiira wahophiya ukati woolalya ikhweeli mpaka waahalaaya ukhitiri. Phimaana, uyo mwaakhooyo yahancera ukumihera irevista Ukhalenla IIalyeeraka Umwene wa Yehova, irevista ninkaweehu mpaka ilelo. Mahukwaala, ninaalalyeera ikhweeli co mbiiblyani ilapo 240 ni iluuka coopwahaka 750. Thanku waari uhinatoko ‘winciva ucuwelaca weekhweeli’ toko mahukwaala!

• Ukhwa wawe Kristu, isiyani ikhweeli yo mbiiblyani imwiiranenle?

• Isiyani inikavihenre woonenela ikhweeli yo Nuulumo na Nluku?