Ahaleelaka mahuku vakaani Yesu wiiviya, uyo aheera co: “Nnya ihapari comaana nnya co Wuumweneni cinaarwaa ulalennya nlaponi motheene munkhaliya, yahimyeeriyaka atthu okhula ikhapila; vano phinhalaaya umala ulumwenku wotuninya.” (Matewus 24:14) Masi uyo ntekooyo waahala uvariya cani? Waahala wooryaanihiya uvariya nitakihiyaka nthoonyero nihiilyaawe Yesu ukati waaryaawe watuninyani.—Luka 8:1.

Ninaamananihaka uwuulumana atthu mmapuwani waya. Yesu ahaafuntta eetthucyaawe ulalyeera ihapari comaana inupa ni inupa. (Matewus 10:11-13; Miteko 5:42; 20:20) Anamalalyeera o isekulu yoopacera yahokaweliya micoko caalamuliyaaya ulalyeera. (Matewus 10:5, 6; 2 Akorintu 10:13) Inanna imocaaru, ntekweehu woolalyeera mahukwaala uhotthenkaciya saana, khula nloko no makristau ninaakaweliya ncoko wiira nilalyeere mpaka umaliha. Ala manannaala, anaanikavihera uvara nteko nivahiyeehu ni Yesu ‘ulalyeera ni uvaha usaahiti woomalela.’—Miteko 10:42.

Hiivano ninawiikurumica urwaa mapuro amphwanyannyaaya atthu. Yesu ciicammo ahovaha ntakihero noolalyeera mapuro ahinthwaaya atthu, toko nseresere ipahari awula wakhiviru ni waluusi. (Markus 4:1; Joau 4:5-15) Toko Yesu, hiiva ciicammo ninaawoopana atthu myaha co mbiiblyani mapuro otheene ninaaphwanyeehu: mmaphironi, mmapacari, mapuro anweliya ikaaro awula ninaawuulumana ni telefoone. Ciicammo ninawaalalyeeraka aattamanani, atthu anaavaraneehu nteko, anaasomaneehu ni amuciihu. Nlattu wo wiikurumica wihu, atthu imiliyau cene nlaponi motheene anawiiwa “ihapari comaana cinoopola.” —Isaalimu 96:2.

Haavo ntthu oocivenleni unhimyera ihapari comaana co Umwene wa Nluku ni untaphulela citthuni comaana cinhalaaya uwaana uhoolo uyo umwennyooyo? Ukhala wiira nnya ihapari comaanannya cinaavaha nweherero, nhimaalane . Mwaahimyere akhunaninyu wowaakuvyaaca!

• ‘Ihaparini comaana’ cinlamuliya ulalennya?

• Masaahiti a Yehova anontakiha cani Yesu inanna yoolalyeera?