Iphome ikhanle itthu yofayita cinene. Ihiri iphome, hi khanaahala ukhala akumi. Nlattu wookhala Mumpi, Nluku haana isariya yoohimyaca mananna cinlamuliyaaya uvareliya nteko iphome. Isiyani uyova inhimyaawe nhina iphome? Niireke iphome pooti uliya awula uheleliya ntthu? Isiyani inhala wuukaviherani ulakela upanka citthu comaana nhina uyo mwahooyo?

1. Nluku nowehera cani iphome?

Khalayi, Yehova ahowiirela apoovwaawe co: “Ukumi wo khula inama phi iphomyaaya.” (Levitiku 17:14) Wamiithoni wa Yehova, iphome ukhanle ukumi. Wakhala wiira ukumi ukhanle itthu yofayita cinene wamiithoni wa Yehova, paahi iphome ciicammo ikhanle itthu yofayita.

2. Inannani yoovareliya nteko iphome inkhottiihaawe Nluku?

Nihinaaya utthonkomanihiya nloko neekristau, Yehova ahowiirela apoovwaawe wiira ahilye iphome. (Nsome Uphattuwaca 9:4 ni Levitiku 17:10.) Ni utthonkomanihiya waya nloko neekristau, Yehova ahowiirela-tho makristau wiira anyeme iphome. Mphwinko wo mahumu waahoolela ule uwakatyuule wahovaha nna nrumonna: “Nanlelo nnyeme . . . iphome.”—Nsome Miteko 15:28, 29.

Unyema iphome awula usempa iphome maanaaya isiyani? Nneereliye ni meetiku wiira nnyeme itthu yoohapala toko nipha, nyuuva khamwaahala uwurya nipha, keera? Masi niireke wiira nyuuva mwanhala ulya iyoolya yootakaniheriya nipha awula ulepela uhomeliya muntinkani? Wanawoonannya wiira mena. Kontha nanlelo yoohapaleeyo nnaahala ukhalana mwiirutthuni. Inanna imocaaru, nrumo na Yehova nineera wiira nnyeme iphome, maanaaya wiira khaninlamuliya uwurya iphome ni hataa ukhuura inama yoohihitiya. Ciicammo, khaninlamuliya ulya iyoolya yootakaniheriya iphome.

Vano niireke wiira ntthu pooti utafitiya iretta inonwerya ivareliyaka nteko iphome? Cihaavo inanna cootafitiya iretta cinvirikaniha malamulo a Nluku. Nnyo inannannyo cinhela nhina uheleliya iphome awula miphantte cuulupale cophome, nnye cineehaniya glóbulos vermelhos, glóbulos brancos, plaquetas ni plasma. Masi ikwaha ikhwaawe, pooti urika ucuwelela wakhala wiira inanna yootafitiya iretteeyo inaavirikaniha nlamulo na Nluku awula mena. Wootakihera, inanna cikhwaawe cootafitiya iretta, cinaavareliyaka nteko miphantte cooyevaca cophome cineehaniya fracções, cimphwanyannya mmiphantteni cuulupale cophome. Inanna cikhwaawe, invareliyaka nteko iphome ya ntthu nowerennyooyo. Nhina ayo matafiteliywaayo, khula ntthu haana alakelaka imwanennyaawe itthu yoopanka. a—Moone niwehero; Akalasiya 6:5.

 MUNCERERE WIITTHUCA WINYU

3. Nthanle mananna ootafitiya iretteenyu anoncivela Yehova

Manannani cinlamuliyeenyu uthanla matafiteliyo iretteenyu anvaranaca niile inhimyaawe Nluku nhina iphome? Moone IVIDIYU, ni mwamalihaka woona, moopele mwaha kontha isiyani ikhanlyaaya itthu yofayita uvarela nteko ipontu ciri vathiva.

• Nlompe nlepelaka ucuwelaca.—Tiyaku 1:5.

• Ntothe mattharelelo o mbiiblyani ni mwiikurumice ucuwela mananna oovarela nteko muukumini winyu.—Miruku 13:16.

• Ntothe ucuwela mananna makhwaawe ootafitiya iretta amphwanyannya ncoko unkhaleenyu.

• Ntothe ucuwela mananna ootafitiya iretta ahinhaleenyu utthuna.

• Nwehacere wakhala wiira itthu inhaleenyu ulakela inaahala wuuhiyani ninrima wootaphuwa.—Miteko 24:16; b moone niwehero.

• Nhiliyale wiira wakhalaka mwaha khula nkristau unlamuliyaawe ulakela veekha itthu yoohala upanka, khaavo nolamuliya wuuthanlelani itthu yoopanka, hataa akhalaka awannyinyu, amwaarinyu, humu o wanlokoni awula ntthu noosomihani Ibiiblya.—Arooma 14:12.

• Mwantikhe itthu ilakenleenyu.

4. Masaahiti a Yehova anaapheela matafiteliyo oretta omaana

Wanaakhitirya ntthu weettela nlamulo na Nluku ninooluma iphome ni utafitiya irettaawe niinanna yomaana woohiheleliya iphome. Moone IVIDIYU.

Nsome Titu 3:2, ni mwamalihaka usoma, moopele mwaha nna nikohonna:

• Kontha isiyani nihaana nooniheraka ihisima ni upisa nrima ukati woowuulumana mameetiku?

 5. Miphantte cooyevaca cophome: Nlakele itthu yoopanka

Iphome ihaana miphantte micese cuulupale. Nnyo cineehaniya glóbulos vermelhos, glóbulos brancos, plaquetas ni plasma. Nnya miphantte micesennya pooti wankawanihiyaaya nimiphantte cooyevaca. c (Moone niwehero.) Nnyo miphantte cophome cooyevacannyo cikiina cinaavareliyaka nteko ukati woopankiya mirette cinvoniha iretta ni ciicammo cimmaaliha ukhuma iphome wanikhwattani.

Masi miphantte cankaani cophome khula nkristau haana alakelaka imwaneennyaawe wakhala wiira naahala utthuna utafitiya civareliyaka nteko cennyo awula mena, attharihaka mattharelelo o mbiiblyani yiitthucilyaawe. Ahaavo anlakela uhitthuna utafitiya irettaaya civareliyaka nteko miphantte cankaani cophome, masi pooti ukhalaka wiira ahaavo antthuna.

Woolakela mananna nyuuva ampheeleenyu utafitiya, muupuwele ila:

• Manannani miivano cinhalaaka unhimyacera meetiku nokitafiti itthu inkiiriha miivano ukupali awula uhikupali utafitiya civareliyaka nteko miphantte cankaani cophome?

 UTHIKILELA

Yehova nopheela wiira noonihere uhisima iphome.

Wuupuwela

• Kontha isiyani iphome ikhanlyaaya itthu yofayita wamiithoni wa Yehova?

• Nlattuni uneereehu wiira nlamulo na Yehova ninniruma unyema iphome ciicammo ninaaca uheleliya iphome?

• Isiyani inhala unikavihera ulakela itthu yomaana nhina matafiteliyo iretta ivareliyaka nteko iphome?