MYAAKHA cinci, anamavaanyiha Ibiiblya yaahimya wiira mwene Belsazar, romoliye nlivuruni ya Daniele khaarivo. (Dan. 5:1) Ayo yaakupali iyo kontha anamathipa yaari ahinaphwanya itthu inthoonyera wiira Belsazar khweeli ahaavo. Masi mwaakha wo 1854, citthu cahorukunuwa. Kontha isiyani?

Uyo mwaakhooyo, cônsul britânico eehaniya John George Taylor ahancera uwehaweha ihalahalo co wasittatti yo Ur, ncoko woohitto wo Iraque. Nno nipuronno, uyo ahophwanya maluku oorukurerya, ookhalana isentimetro 10, owantikhaciya niileetera cokhalayi. Nluku nimoca nantikhaciye nivekelo naalepela wiira mwene o Babilooniya Nabonido, ni mwanawe omuulupale Balsazar, akhale mahuku menci. Waaphwanyiyaaya iyo, anamavaanyiha yahaana yakupaliki itthu imoca: wiira nne nlukunne naathoonyera wiira Belsazar khweeliini ahaavo.

Masi Ibiiblya khinhimya paahi wiira Belsazar ahaavo. Iyo ciicammo ineera wiira uyo aari mwene. Anamavaanyiha khayaakupali iyo ciicammo. Wootakihera, mwaakha wo 1875, siyentista o Inglaterra eehaniya William Talbot ahantikha eeraka wiira ahaavo atthu ankupali wiira “Bel-sar-ussur [Belsazar] aalamulela ukati mmocaaru ni Nabonido, athumwane.” Masi uyo siyentistooyo ciicammo ahantikha eeraka: “Khiivo hataa itthu inthoonyera wiira iyo ikhanle ikhweeli.”

Maluku makhwaawe yooneleliye yahokavihera umaliha uyo mwahooyo. Ayo malukwaayo yahothoonyera wiira athumwaane Belsazar, mwene Nabonido, yahothama u Babilooniya ni yahoviriha myaakha cinci yakhalaka nipuro nikhwaawe. Tipani aalamulela u Babilooniya ukati waathamenlyaaya nipuro nikiina? Encyclopaedia Britannica ineera: “Ukati Nabonido waarwaalyaawe ilapo ikhwaawe, uyo ahonvahacera Belsazar ukhala mwene ni waahoolela anatoropaawe enci.” Coo, Belsazar phaakhanle mwene o Babilooniya ule ukatyuule. Phimaana, namathipa ni namacuwelaca iluuka Alan Millard heera wiira “ilivuru ya Daniele ihaana isariya yoomwiihana Belsazar ‘mwene.’”

Masi ninaacuwela wiira ale anonswalela Nluku, Ibiiblya phi itthu yuulupale inaathoonyera wiira ilivuru ya Daniele inhimya ikhweeli ni iphattuwacale wa Nluku.—2 Tim. 3:16.