Milimo ya Atumwa 13:1-52
13 Lyene mu cilongano ca mu Antioki mwali ya kasesema na ya kasambilizya yaa: Banaba, Simyoni wino yamanga ukuti Nigeli,* Lukio umwina Kuleni, Manaeni uwasambiliziwe kuli Helodi kateeka wa citungu, alino na Saulo.
2 Lino yaombelanga Yeova nu kuta ukulya pa nsita imwi,* umupasi wa muzilo walanzile iuti: “Mpatwilini Banaba na Saulo pakuti yaombe umulimo uno nayasoolwela.”
3 Lyene pa cisila ca kuta ukulya pa nsita imwi nu kupepa, yaisilepo makasa nu kuyaleka ukuti yaapita.
4 Fwandi umupasi wa muzilo watumile antu yaa uku Seleukia, nupya ukufuma kuuku, yakwezile uwato iyaya uku Kupulo.
5 Lino yafisile umu Salamisi yatandike ukusimikila izwi lyakwe Leza mu masunagogi* ya Yayuda. Nupya Yoani wali a kaazwa wao.
6 Lino yapisile pa cilila consi ukufika nu ku Pafosi, yakomenkinye umonsi umwi Umuyuda uwi zina lyakuti Ba-Yesu, kasesema wa ufi uwacitanga maleele.
7 Wali nu mulasi* Salegio Paulu, umonsi uwali umucenjele sana. Muntu wii wamile Banaba na Saulo pano walondesyanga ukuvwa izwi lyakwe Leza.
8 Lelo Elima kacita wa maleele (pano ali vino izina lyakwe likapiliula) watandike ukuyakanya, ala akwezya ukulesya umulasi ukutaila Umwene.
9 Lyene umupasi wa muzilo wizile pali Saulo akaamwa nu kuti Paulo, nupya wamulolekisye
10 nu kulanda ati: “We muntu we, wemuno wazulamo ucenjezi alino ni vintu iviipe ivya misango yonsi, mwana Ciwa, we mulwani wa vintu vyonsi ivilungame, u mulandu ci uno ukanyonganyizizya inzila zyakwe Yeova izilungame?
11 Lola! Yeova amakupingula nupya umapafula, umata ukulola uluswepo pa nsita imwi.” Lyene papo kwene watandike ukulola kungwi ni mfizi, nupya watandike ukuzinguluka ala akulonda umuntu wakuti amuleme api kasa nu kumusenda.
12 Lino umulasi waweni ivyacitiike, wataile, pano wazungwike pa vintu vino wasambilile pali Yeova.
13 Lyene Paulo na auze yakwezile uwato ukufuma uku Pafosi nupya yaile iyafika uku Pega umu Pamfuliya. Lelo Yoani wayasile nu kuswilila uku Yelusalemu.
14 Nomba yafumile uku Pega nu kuya ku Antioki umu Pisidiya. Nupya lino iingile umwi sunagogi pa wanda wi Sabata, iikazile.
15 Pa cisila ca kubelenga Masunde ni vyalembwa vyakwe ya Kasesema, aakalamba yi sunagogi yayanenyile iyati: “Ina itu, ndi cakuti imukwata mazwi ya kukomelezya antu, landini.”
16 Fwandi Paulo wakatwike, alesya icongo ukuomvya ikasa nu kulanda ati:
“Mwe yantu mwe, mwe ina Izlaeli na mwensi mwemuno mukatiina Leza, uvwini kuno.
17 Leza wa yantu yaa aina Izlaeli wasoolwile ivikolwe vitu, wayacindamike lino iikalanga umu mpanga ya ineco umu Ejipti nu kuyafumyamo ni ikasa lyakwe ilya maka.
18 Nupya apa myaka 40, wazizimizyanga pali vino yacitanga umu lwanga.
19 Pa cisila ca konona inko 7 umu mpanga ya Kenani, wapeezile impanga iiyo ku vikolwe vitu kuti viipyane.
20 Vyonsi vii vyacitiike umu myaka apiipi na 450.
“Pa cisila ca vintu vii, Leza wayasontiile ya kapingula aakuyatungulula ukufika umu nsita yakwe kasesema Samweli.
21 Lelo pa cisila, yalenzile ukuti yakwate umwene, nupya Leza wayapeezile Saulo mwana Kisi uwa mu luko lwakwe Benjamini, ukuti ayateeke pa myaka 40.
22 Lino Leza wafumizye Saulo pa wene, wayasontiile Devedi ukuya umwene, umuntu wino walanzilepo ati: ‘Inzana Devedi mwana Yese, umuntu wino umwenzo wane watemwa; alacita vyonsi vino nkalonda.’
23 Kulingana nu ulayo wakwe, Leza watapeela aina Izlaeli kapususya, Yesu, ukufuma umu yana yakwe Devidi.
24 Lino muntu wii atali aize, Yoani wasimikile uku ina Izlaeli yonsi ukuti ulubatizyo ali cilangililo ca kulapila.
25 Nomba lino Yoani wamalililanga umulimo wakwe, uzizye ati: ‘Uzye mukati nene weni? Asi nene muntu wino mukaloleela. Lelo lolini! Umwi akwiza pa cisila cane, wino ntakweti insambu zya kusapula intambo ku ndyatu zyakwe.’
26 “Mwe inane, mwe ya mu lupwa lwakwe Abulahamu na mwemuno mukatiina Leza, amazwi yaa aakulanda pa kupusuka iyatumwa kuli sweswe.
27 Pano antu amu Yelusalemu ni ntunguluzi zyao yatamanyile umuntu wiyo, lelo lino yapingulanga, yafikilizyanga amazwi yano ya Kasesema yalanzile, aakabelengwa lyonsi pa wanda wi sabata.
28 Nanti cakuti yatazanyile umulandu wa kumukomelapo, yapatikizye Pilato ukuti akomwe.
29 Nupya lino yacisile vyonsi ivyalemvilwe pali aliwe, yafumizye umwili wakwe pa cimuti nu kuyawika umwi lindi.
30 Lelo Leza wamutuutulwile ukufuma uku yafwe,
31 nupya pa manda aingi walolekiile uku yantu yano wafumile nayo uku Galili pa kuya uku Yelusalemu. Yakwene aakasimikila antu pali aliwe.
32 “Fwandi tukumusimikila ilyasi lisuma pa ulayo uno Leza walavile ivikolwe vitu.
33 Leza wafikilizye ulayo uwo kuli sweswe, swe yana yao ukupitila umu kutuutulula Yesu; wakwe vino calembwa umwi lumbo lyakwe ciili ukuti: ‘Wewe mwanane; ilelo natinja tata wako.’
34 Pa mulandu wakuti wamutuutulwile kufuma uku yafwe pakuti ataca aole nupya, i calenzile alande amazwi akuti: ‘Ndamulanga ukutemwa kwa cumi pa ulayo wa cumi uno nalavile Devedi.’
35 Nupya calembwa umwi lumbo na lyuze ukuti: ‘Utalaleka umuomvi wako uwa cumi ukuola.’
36 Lelo Devedi wene waombiile Leza umu nkulo yakwe, nupya lino wafwile, wazisilwe pali pamwi ni vikolwe vyakwe, nupya waozile.
37 Lelo wino Leza watuutulwile wene ataozile.
38 “Acino lekini cimanyikwe kuli mwemwe ina ukuti tukasimikila ukuti muli wikwene amuno Leza alamwelela imembu zinu,
39 nu kuti Masunde yakwe Mose yatanga yamulenge ukuya akaele, lelo yonsi ataila yalaya akaele pa mulandu nu muntu wii.
40 Acino cenjelini pakuti vino ya kasesema yalanzile vitaca vimucitikile:
41 ‘Lolini mwe yantu ya mitumfyo mwe, nupya zungukini nu kononwa, pano nkuomba umulimo umu manda inu, umulimo uno mutalatala muzumile nanti cakuti umwi wamulondolwela ningo.’”
42 Lyene lino yafumanga, antu yayapaapatiile ukuti yace yalande ivintu vii api Sabata ililalondelelapo.
43 Lino yafumile umwi sunagogi, Ayuda aingi alino na aizile iyaya umu mipepele ya Yayuda apepanga Leza, yalondiile Paulo na Banaba yano yayakomelizye ukutwalilila ukuya umu cikuuku cakwe Leza icikulu lino yalanzile nayo.
44 Api Sabata ilyalondelilepo apiipi na antu yonsi amu musumba yakolongine pakuti yuvwe mazwi yakwe Yeova.
45 Lino Ayuda yaweni antu uwingi akolongine, yuvwile uzuwa nu kutandika ukupaazya pali vino Paulo walandanga ala yakulanda na mazwi ya miponto.
46 Lyene Paulo na Banaba yasifile nu kuyanena iyati: “Cali ningo ukuti mazwi yakwe Leza yatandikilepo ukulandwa kuli mwemwe. Nomba pa mulandu wakuti mukukana ukuvwa nupya mutakulonda ukuya nu umi wa pe, tumaya uku yantu ya mu nko.
47 Pano Yeova watunenyile ati: ‘Namusoolola kuti muye uluswepo uku yantu ya mu nko, pakuti musimikile api pusukilo ukufika na kuno insi yapeleela.’”
48 Lino antu ya mu nko yuvwile mazwi yayo, yatemilwe sana nu kucindika mazwi yakwe Yeova, nupya yonsi alondesyanga ukuya umu nzila ya ku umi wa pe yataile.
49 Nupya mazwi yakwe Yeova yasalangananga umu mpanga iiya yonsi.
50 Lelo Ayuda yatunsile anaci acindikwe nupya aatiinanga Leza alino na aonsi akalamba ya mu musumba, nupya yalenzile ukuti yacuzye Paulo na Banaba nu kuyasumbila ukunzi ya musumba.
51 Fwandi Paulo na Banaba yayakuntiile ulukungu ulwali uku ngazo zyao nu kupita uku Ikoniya.
52 Nupya asambi yatwalilile ukuya ni nsansa nu mupasi wa muzilo.
Mafutunoti
^ Nanti “Mutifi.”
^ Nanti “kufunga.”
^ I vikuulwa muno Ayuda yapepelanga nu kubelengela Malembo.
^ Kateeka wa citungu ca mu mpanga ya Loma. Lolini Ulondolozi wa Mazwi.
