Milimo ya Atumwa 28:1-31
28 Lino twapuswike, alino twamanyile ukuti izina lya cilila a Melita.
2 Nupya aikazi ya kuuku yatupokelile ningo. Yatupembiile nu moto pa mulandu wakuti kwali imvula nupya kwazusile.
3 Lino Paulo wakolonganike inkwi nu kwika pa moto, inzoka yafumile pa mulandu ni cikaililwa imuluma ukwi kasa itandika nu kunyinyinda.
4 Lino antu ya pa cilila yaweni ukuti inzoka ikunyinyinda ukwi kasa lyakwe, yatandike ukulanzyanya iyati: “I cumi umuntu wii inkomi, nupya nanti cakuti watapusuka pali yemba, leza mwanaci uwa mulinganya atazumilizye ukuti atwalilile ukuya nu umi.”
5 Lelo Paulo wakuntiile inzoka pa moto nupya atuvwile ukali uli onsi.
6 Lelo yene yenekelanga ukuti amavimba nanti amapona nu kufwa lilyo kwene. Pa cisila ca kuloleela pa nsita itali nu kulola ukuti pasi icamucitikiile, yasenwile amelenganyo yao nu kutandika ukulanda ukuti a leza.
7 Lyene umupiipi ni ncende iiya mwali vyalo vya mukalamba wa cilila uwi zina lyakuti Pabilyasi, nupya watupokelile nu kutusunga ningo pa manda yatatu.
8 Isi wakwe Pabilyasi waizi pali bedi ale umulwale impepo nu munda, nupya Paulo wingile umu ng’anda muno wali nu kupepa, wamwisilepo makasa nu kumupozya.
9 Lino cii cacitike, antu yonsi alwale ali pa cilila nayo kwene yatandike ukuya kuli Paulo pakuti ayapozye.
10 Yatutaizye sana icakuti iyatupeela ni vya upe ivingi, nupya lino twakwelanga uwato, yatulongelizye vyonsi vino twalondekwanga.
11 Pa cisila ca myezi itatu twakwezile uwato uwalemvilwepo ukuti “Ana Aonsi Yakwe Zeusi.” Uwato uu wafumile uku Alekizandilya nupya wikazile pa cilila umu nsita ya mpepo.
12 Lino twafisile apakafikila mawato pa Silakuse, twikazilepo amanda yatatu;
13 kufuma kuuku twapisile ituya itufika uku Lejamu. Nupya lino papisile uwanda onga, umuza wa ku kaeya wakatwike, nupya twafisile uku Puteoli pa wanda wakwe ciili.
14 Kuuku akuno twazanyile aina nupya yatupaapasile ukuti twikale nayo amanda 7, lyene pa cisila twakatwike ukuya uku Loma.
15 Lino aina aku Loma yuvwile ukuti tukuya ukumwao, izile iyatukomenkanya pa Mang’anda ya Enyi Yatatu, nupya yamwi pali aliyo iizile iyafika pa maliketi iya ku Apyasi. Lino Paulo wayaweni, wataizye Leza nu kukomeleka.
16 Lino twafisile umu Loma, Paulo wazumiliziwe ukwikala wenga pamwi nu musilika ala akumulinda.
17 Lelo lino papisile amanda yatatu Paulo wakolonganike intunguluzi zya Yayuda. Lino yakolongine wayanenyile ati: “Inane, nanti cakuti ntacita iciipe uku yantu nanti ukusuula intambi zya vikolwe vitu, nasenzilwe wa mufungwa ukufuma uku Yelusalemu nu kupeelwa uku ina Loma.
18 Nupya lino yapitulwike umu mulandu, yalondanga ukunsapula, pano yatazanyile umulandu uli onsi uwa kunkomelapo.
19 Lelo lino Ayuda yakanyile, natwazile umulandu kuli Kaisale, nomba asi pa mulandu wakuti napeelanga uluko lwane umulandu.
20 Fwandi ukwene ali mulandu uno nalondelanga ukumulola nu kulanda namwe, pano nanyepwa muli ceni wii pa mulandu nu upaalilo wa ina Izlaeli.”
21 Nayo yamunenyile iyati: “Tutapokelela makalata pali wewe ukufuma uku Yudeya, nupya kutaatala kwiza aina ukufuma kuko aizile uku kutunena nanti ukulanda iviipe ivili vyonsi pali wewe.
22 Lelo tukulola ukuti cingazipa ukuvwa vino ukwelenganya, pano twamanya ukuti konsi sile antu yakalanda iviipe pi umba lii.
23 Lyene yapekanyizye uwanda uwa kukomaana nawe, nupya antu aingi yaile kuno Paulo wikalanga. Nupya ukufuma katondo suka amanguzi, wayasimikilanga ala akuyalondolwela ningo pa Wene wakwe Leza ukuomvya ivyalembwa umu Masunde yakwe Mose ni vyalembwa vyakwe ya Kasesema, pakuti aezye ukuyatonsya kuti yazumile muli Yesu.
24 Yamwi yatandike ukuzumila ivintu vino Paulo walanzile; lelo yauze yene yatazumile.
25 Fwandi vino antu yatazumilizyanyizye, yatandike ukufumapo, nupya Paulo walanzile mazwi aakuti:
“Umupasi wa muzilo walanzile ningo ukupitila muli kasesema Ezaya pa vikolwe vinu,
26 iuti, ‘Yanga uku yantu yaa ukayanene uti: “Muluvwa lelo mutaliluka, nupya mulalola lelo mutalamanya.
27 Pano imyenzo ya yantu yaa yakoma, yakauvwa lelo yasicitapo icili consi, yaazyatika manso yao pakuti yataalola nanti ukuvwa na matwi yao nupya yasiiluka, nupya yasilonda ukulapila pakuti njapozye.”’
28 Acino lekini cimanyikwe kuli mwemwe ukuti Leza wataleta ipusukilo lii uku yantu ya mu nko; mu cumi yene yaluvwa.”
29 *——
30 Fwandi watwalilile ukwikala kuuku kwene mu ng’anda yakwe iya kusonkela pa myaka iili, nupya wapokelelanga ningo yonsi ayanga kuli aliwe,
31 ala akuyasimikila pa Wene wakwe Leza nu kuyasambilizya pa Mwene Yesu Klistu nu kusipa, ukwaula ica kumulesya.
