Milimo ya Atumwa 3:1-26
3 Lyene Petulo na Yoani yaile ukwi tempele apa nsita ya kupepa, pa 15:00,*
2 nupya antu yasenzile umuntu uwavilwe umulemale. Cila wanda yamwikanga umupiipi nu mulyango wa pi tempele uno yamanga yakuti Impongolo Iyembe, pakuti aalenga upe uku yantu aingilanga umwi tempele.
3 Lino waweni ukuti Petulo na Yoani iyaingila umwi tempele, watandike ukulenga upe.
4 Lelo Petulo na Yoani, yamulolekisye nu kumunena iyati: “Lola kuno.”
5 Nawe wayalolekisye ala akwenekela ukuti yamamupeela vimwi.
6 Lelo Petulo walanzile ati: “Ntakweti siuva na goldi, lelo namakupeela cino nkweti. Umwi zina lyakwe Yesu Klistu uwa ku Nazaleti, tandika ukupita!”
7 Lyene Petulo wamulemile ukwi kasa li lunji nu kumukatusya. Lilyo kwene maulu yakwe yapozile,
8 watolwike, atandika nu kupitila pamwi nayo ukuya umwi tempele ala akupita nu kutoloka nu kulumbanya Leza.
9 Nupya antu yonsi yamuweni ala akupita nu kulumbanya Leza.
10 Nupya yamanyile ukuti muntu wii u wikalanga pa Mpongolo Iyembe iya pi tempele ala akulolela upe, nupya yazungwike sana nu kupeziwa mano pali vino vyamucitikiile.
11 Lino umuntu wii acili watalemelela Petulo na Yoani, antu yonsi yasimwile ukuya kuli aliyo pa ncende ino yamanga ukuti Lukungu Lwakwe Solomoni ala iyapeziwa sana mano.
12 Lino Petulo waweni vivyo, wanenyile antu ati: “Mwe ina Izlaeli, u mulandu ci uno mwazungukila, nupya u mulandu ci uno mukutulolekesya kwati manye u ku maka itu nanti ukapepa witu ivyativilenga ukuti umuntu wii atandike ukupita?
13 Leza wakwe Abulahamu, Isaki na Yakobo nupya Leza wa vikolwe vitu watacindamika Yesu, Umuomvi wakwe wino mwapeezile uku yantu nu kumukana pa manso yakwe Pilato nanti cakuti wapingwile ukumusapula.
14 Mwakanyile uwa muzilo nupya umulungami, nu kulenga ukuti yamusapwile umuntu uwali inkomi,
15 lelo mwakomile Umwimilizi Mukalamba aakapeela umi. Nomba Leza wamutuutulwile ukufuma uku yafwe, nupya twailolela icintu cii.
16 Nupya pa mulandu ni zina lyakwe, alino nu utailo uno twakwata umwi zina lyakwe, i caticilenga ukuti umuntu wii wino mukulola nupya wino mwamanya apole. Utailo uno twakwata muli Yesu, u watiulenga ukuti apoziwe pa manso inu.
17 Inane, ndakai imanya ukuti mwacisile vivyo mu kukanamanya, wakwe vino ni ntunguluzi zinu zyacisile.
18 Leza wazumilizye ivintu vii ukucitika pakuti afikilizye vino walandiile limwi muli ya kasesema yonsi ukuti Klistu wali nu kucula.
19 “Fwandi lapilini nu kuwela kuli Leza, pakuti imembu zinu zifuutwe na pakuti Yeova amupeele umutende
20 nu kumutumila Klistu wino wamusoolwela, kuli kuti Yesu.
21 Wene alinzile ukutwalilila ukuya umwi yulu kufika pa nsita ino ivintu vyonsi vilaya ivipya, kulingana na vino Leza walanzile kupitila muli ya kasesema ya muzilo aaliko mpiti.
22 Mose walanzile ati: ‘Yeova Leza winu alamusontela kasesema uwaya wakwe nene ukufuma umu ina inu. Mufwile ukuvwa vyonsi vino alamunena.
23 Cumi wensi aataluvwa kuli kasesema wiyo alononwa.’
24 Nupya ya kasesema yonsi ukutandikila pali Samweli alino na amulondelilepo, nayo kwene yalanzile pa vintu ivikucitika ndakai.
25 Mwemwe yana yakwe ya kasesema nupya mwemwe mpyanyi zya upangano uno Leza wapangine ni vikolwe vinu, lino wanenyile Abulahamu ati: ‘Mu mwanako ali muno indupwa zyonsi pano nsi zilapaalilwa.’
26 Lino Leza watuutulwile Umuomvi wakwe, watandikilepo ukumutuma kuli mwemwe pakuti amwavwe ukuleka ukucita iviipe.”
Mafutunoti
^ Mu Cigiliki: “Iawala ilyalenga 9.”
