Milimo ya Atumwa 9:1-43
9 Lelo Saulo uwatwalilile ukutiinya asambi nupya uwalondesyanga ukuyakoma, waile kuli simapepo mukalamba
2 nupya wamulenzile makalata aakutwala ku masunagogi mu Damasika pakuti angaya akaleme aonsi na anaci aya umu Nzila ya Mwene nu kuyaleta uku Yelusalemu.
3 Lyene lino wali pa lwendo ala akupalama uku Damasika, papo kwene sile uluswepo ukufuma ukwi yulu lwamuzingulwike,
4 nupya waponyile pansi nu kuvwa izwi likuti: “Saulo, Saulo, u mulandu ci uno ukuncuzizya?”
5 Saulo uzizye ati: “Uzye wewe weni Mwene?” Nawe waswike ati: “Nene Yesu, wino ukucuzya.
6 Lelo katuka, uwingile umu musumba, nupya ulanenwa vino ulinzile ukucita.”
7 Aonsi aali pa lwendo na Saulo imilile ukwaula kuvwanga, yuvwanga izwi lelo yatalolanga uwavwanganga.
8 Lyene Saulo wakatwike, nupya nanti cakuti manso yakwe yali ayulike atalolanga nanti acimwi. Fwandi yamulemile api kasa nu kumutwala mu musumba wa Damasika.
9 Nupya pa manda yatatu, atalolanga nanti acimwi, nupya atalyanga nanti ukumwa.
10 Mu Damasika mwali umusambi uwi zina lyakuti Ananiya, nupya Umwene wamwamile umu cilolwa ati: “Ananiya!” Nawe waswike ati: “Anene Mwene.”
11 Lyene Umwene wamunenyile ati: “Katuka, yanga ku museo uukaamwa ukuti Uwololoke ukalonde umonsi uwi zina lyakuti Saulo uwa ku Tasi pa ng’anda yakwe Yuda. Pano pa nsita yii akupepa,
12 nupya umu cilolwa watalola umuntu uwi zina lyakuti Ananiya wingila nu kwika makasa yakwe pali aliwe pakuti atandike ukulola.”
13 Lelo Ananiya waswike ati: “Mwene nuuvwa uku yantu aingi pa muntu wii, pa viipe vyonsi vino wacitila antu yako amuzilo umu Yelusalemu.
14 Nupya lyene paa, ya simapepo akalamba iyamupeela amaka aakulema yonsi aakalanda api zina lyako.”
15 Lelo Umwene wamunenyile ati: “Pitanga! Pano umuntu wii imusoolola ukuti akamanyisye izina lyane uku yantu amu nko na kuli ya mwene alino nu ku yana yakwe Izlaeli.
16 Pano ndamulanga ivintu ivingi vino alaculako pa mulandu wi zina lyane.”
17 Lyene Ananiya waile aingila umu ng’anda nu kwika makasa yakwe pali Saulo nu kumunena ati: “Saulo, mwinane, Umwene Yesu uwalolekile kuli wewe pa museo uno waomvizye lino wizanga kuno, watantuma kuli wewe pakuti utandike ukulola nu kupokelela umupasi wa muzilo.”
18 Nupya lilyo kwene sile, ivyalolekanga wa mamba ya nswi vyaponyile umu manso yakwe, watandike nu kulola. Lyene wakatwike nu kubatiziwa.
19 nupya waliile ivyakulya, aya na maka.
Wikazile manda yamwi na asambi umu Damasika,
20 nupya lilyo kwene sile watandike ukusimikila pali Yesu umu masunagogi ukuti wii u Mwana wakwe Leza.
21 Lelo yonsi amuvwanga yazungwike nupya yalandanga yakuti: “Uzye wii asi ali umuntu uwazanzanga amu Yelusalemu aakalanda api zina lii? Uzye atizile kuno umu kuyalema pakuti ayatwale kuli ya simapepo akalamba?”
22 Lelo Saulo watwalilile ukukwatilako maka nupya wazungusyanga Ayuda aikalanga umu Damasika, pano wapeelanga usininkizyo usuma uwakuti wii a Klistu.
23 Lyene lino papisile manda aingi, Ayuda yapangiine ukuti yamukome.
24 Lelo Saulo wizile amanya vino yapanganga ukucita kuli aliwe. Nupya yalindanga ni mpongolo umusanya nu usiku pakuti yamukome.
25 Fwandi asambi yakwe yamwisile muli basiketi nu kumufumizya pa cipongo ca ciumba ci linga usiku.
26 Lino wafisile umu Yelusalemu, wezizye na maka kuti ailunde uku yasambi, lelo yonsi yamutiinanga, pano yatazumiile ukuti wali u musambi.
27 Fwandi Banaba wizile amwavwa nu kumutwala uku yatumwa, nupya wayalondolwelile vino Saulo waweni Umwene umu nzila, nu kuti Umwene walanzile nawe na vino wasifile pa kulandila umwi zina lyakwe Yesu uku Damasika.
28 Acino wikazile nayo, wapitananga umu Yelusalemu ukwaula ukutiina ala akulanda nu kusipa umwi zina lya Mwene.
29 Walandanga na Ayuda alandanga Cigiliki nu kupaazyanya nayo, lelo yene yalondanga ukumukoma.
30 Lino aina yamanyile vivyo, yamutwazile uku Kesaliya nu kumutuma uku Tasi.
31 Lyene amu vilongano vyonsi ivyayelile umu Yudeya, Galili na Samaliya izile iyaya nu mutende, ala yakukomeleziwa; nupya vino yatiinanga Yeova nu mupasi wa muzilo wayakomyanga, yatwalilile ukuvulilako.
32 Lino Petulo wapitanga umu ncende zyonsi, waile apita nu ku yantu amuzilo aikalanga umu Lida.
33 Wazanyileko umuntu uwi zina lyakuti Eneya uwalalanga sile pali bedi yakwe pa myaka 8, pano wali icite.
34 Petulo wamunenyile ati: “Eneya, Yesu Klistu wakupozya. Katuka uwanze bedi yako.” Nawe wakatwike papo kwene sile.
35 Lino yonsi aikalanga umu Lida nu mu Syaloni yaweni ivyacitikile Eneya, yataile umu Mwene.
36 Mu Yopa mwali umusambi uwi zina lyakuti Tabita, ilikapiliula ukuti “Dokasi.”* Wacitanga ivisuma nupya wavwanga apiina.
37 Lelo umu manda yaaya walwile nu kufwa. Fwandi yamufuzile nu kuyamulalika umu muputule wa papela.
38 Vino umusumba wa Lida wali apiipi na Yopa, lino asambi yuvwile ukuti Petulo ali umu musumba uwo, yatumile antu yaili akuyamunena iyati: “Twapaapata iza likwene.”
39 Lilyo kwene Petulo wakatwike apitila pamwi nayo. Nupya lino wafisile, yamutwazile mu muputule wa papela; nupya ya mukamfwilwa yonsi yaile kuli aliwe ala yakulila nu kumulanga ivyakuzwala ivingi vino Dokasi wayasumiile lino wali nayo.
40 Lyene Petulo wafumizye yonsi panzi, nupya wafukiime, apepa. Lino wapiliukile ukwali citumbi, walanzile ati: “Tabita, katuka!” Nawe wazyusile, nupya lino waweni Petulo, wakatwike aikala.
41 Petulo wamulemile ikasa nu kumukatusya, nupya wamile amuzilo na ya mukamfwilwa, nayo yaweni ukuti aali nu umi.
42 Ilyasi lii lyamanyikwe umu mpanga yonsi iya Yopa, nupya antu aingi yataile Umwene.
43 Petulo wikazile manda anono umu Yopa na Simoni kanyuka wa mpapa.
Mafutunoti
^ Izina lya Cigiliki lyakuti Dokasi ni lya Cialamaiki lyakuti Tabita yonsi yakapiliula ukuti “Mpombo.”
