Yobo 26:1-14
26 Lyene Yobo waswike ati:
2 “Iyee mwe vino wavwa umuntu aatakweti maka!
Iyee mwe vino wapususya umuntu umutonte!
3 Iyee mwe vino wapanda mano umuntu aatakweti mano
Na vino wasokolola mano yako!
4 A kuli weni kuno ukulanda,Nupya a weni uwatakukomelezya ukulanda ivintu vya musango uwo?
5 Aafwe aatakwata maka yakatiina Leza;Yaya pisika lya manzi ni vikaikalamo.
6 Kusi icili consi icaya umwi Lindi* icafisama kuli Leza,Nupya akalola vyonsi ivyaya umu ncende ya ononesi.
7 Wanza iyulu lya ku katutu umu lwelele,Wakoweka insi apataya nanti acimwi;
8 Akapomba manzi umu makumbi yakwe,Pakuti makumbi yatalepuka pa mulandu nu kufina;
9 Akavimba icilimba cakwe ica wene,Akacivimba ni kumbi.
10 Akaika umupaka pakasi ka lwelele na yemba;Akaika umupaka pakasi ka luswepo ni mfinzi.
11 Incesi zi yulu zikatenkana;Zikazakaza ndi cakuti Leza wakalipa.
12 Akasunkanya yemba ukuomvya maka yakwe,Nupya pa mulandu nu kwiluka kwakwe akaputoola icilyanyi ca pali yemba umu vimpilinsya.
13 Akalenga iyulu ukuswepa ukuomvya umupu wakwe;Ikasa lyakwe likalasa icizoka icikasimulisya.
14 Vii i vinono sile pa vintu vino wacita;Tuvwa sile utunono pali aliwe!
Uzye fwandi a weni angiluka ukupangalakansya kwakwe ukwa maka?”
Mafutunoti
^ Mu Ciebele: “Syeo.” Lolini Ulondolozi wa Mazwi.
