Imfwa ikalenga antu ukuya sana nu ulanda. Ali mulandu uno Baibo ikaamila imfwa ukuti umulwani. (1 Kolinto 15:26) Umwi Sambililo 27 mwasambilile ukuti Yeova alacimvya umulwani wii. Nomba i vyani ivilacitika uku antu afwa mpiti? Umwi sambililo lii, mumasambilila na vyuze ivingi pa ulayo uno Yeova walaya uwa kutuutulula antu aingi pakuti yakaipakizye umi manda pe. Alayatuutulula. Uzye cico cingacitika? Uzye alayatuutulula pakuti yakikale ukwi yulu nanti pano nsi?

1. I vyani vino Yeova akalonda ukucitila atemwikwa itu afwa?

Yeova akalondesya ukutuutulula antu afwa. Umonsi wa utailo Yobo, wasininkizye ukuti Leza ataali nu kumwilila ndi cakuti wafwa. Wanenyile Leza ukuti: “Ulangama, nga nani ndasuka [ukufuma umwi lindi].”—Belengini Yobo 14:13-15, NWT.

2. Uzye twamanya uli ukuti afwe yalatuutululwa?

Lino Yesu wali pano nsi, Leza wamupeezile amaka ya kutuutulula antu. Yesu watuutulwile umukazyana uwa myaka 12 nu mwana umonsi wakwe mukamfwilwa. (Mako 5:41, 42; Luka 7:12-15) Lino papisile insita, cuza wakwe Yesu Lazalo wafwile. Nanti icakuti papisile amanda 4 ukufuma pano Lazalo wafwilile, Yesu wamutuutulwile. Pa cisila ca kupepa kuli Leza, Yesu watiile: “Lazalo, fuma!” Lyene “umuntu uwali umufwe wafumile.” (Yoani 11:43, 44) Elenganyini vino ya lupwa na ya cuza yakwe Lazalo yali ni nsansa!

3. I vyani vilacitikila atemwikwa inu afwa?

Baibo yalaya ukuti: “Kulaya ukutuutuluka.” (Milimo 24:15) Antu yano Yesu watuutulwile lino wali pano nsi yataile ukwi yulu. (Yoani 3:13) Lino Yesu wayatuutulwile ikalanga pano nsi kwene nupya yali ni nsansa. Vikwene a vino Yesu wasya ace atuutulule antu aingi sana, pakuti yakaipakizye umi uwa manda pe umu paladaise pano nsi. Walanzile ukuti “yonsi aya umu malindi yaliusiwa” nanti icakuti kutaya umuntu aliwensi aakaiusya ukuti antu yayo akuno yali.—Yoani 5:28, 29.

 LONDELEZYINI NA VYUZE

4. Yesu walangilile ukuti angatuutulula afwe

Sambililini na vyuze pali vino Yesu wacitiile cuzakwe Lazalo. Belengini Yoani 11:14, 38-44, alino mulanzyanye mauzyo yaa:

• Uzye twamanya uli ukuti Lazalo wafwile?—Lolini cikomo 39.

• Ndi cakuti Lazalo waile ukwi yulu, uzye mukwelenganya ukuti nga Yesu wamutuutulwile?

Tambini VIDYO.

5. Antu aingi yalatuutululwa

Belengini Masamu 37:29, alino mulanzyanye iuzyo lii:

• Uzye antu aingi sana aalatuutuluka yalikala kwi?

Yesu alatuutulula antu aingi ukwikako sile na aatapepanga Yeova. Belengini Milimo 24:15, alino mulanzyanye iuzyo lii:

• Aaweni yano mukulondesya ukwizalola kuno yakutuutuluka?

• Uzye upaalilo wakuti kulaya ukutuutuluka wateekizye nu kukomelezya uli avyazi yakwe Phelicity?

 VINO TWASAMBILILA

Baibo yalaya ukuti antu aingi sana yalatuutululwa. Yeova akalonda ukuti yakaye nu umi nupya, nupya wapeela Yesu amaka akuyatuutulula.

I vyani vino mwasambilila?

• Uzye Yeova na Yesu yakayuvwa uli pa kutuutulula antu?

• Uzye antu aingi sana aalatuutululwa yalikala u kwi yulu nanti pano nsi? U mulandu ci uno mwalandila vivyo?

• I vyani vyalenga musininkizye ukuti atemwikwa inu yangaya nu umi nupya?