Milungu inono ilondelilepo, antu yalasoolola intunguluzi umu mpanga izingi umu nsi yonsi. Antu aingi yakwelenganya pa ntunguluzi ino yalasoolola.

 Uzye Baibo ikalandapo uli?

 Baibo ikalanda muno intunguluzi zya yantunze zilinzile ukupeleela lino zikutungulula.

•   “Mutataila muli yakateeka, umu mwana wa muntu atange amupususye. Lino yafwa, yene yakaswilila ukwivu, nu wanda kwene uo amapange yao yasililikila.”—Masamu 146:3, 4.

 Na antunze kwene amanya ningo ukutungulula, nayo kwene yakafwa. Nupya nga caya vivyo, ivisuma vino intunguluzi yacisile visitwalilila ndi cakuti piiza intunguluzi yuze.—Kasambilizya 2:18, 19.

 Icisinka cino Baibo ikalandapo i cakuti, antunze yatapanzilwe ukuti yaitungulula.

•   “Kusi umuntu uwakwata amaka apa umi wakwe.”—Yelemiya 10:23.

 Uzye kwaya umuntu aangatungulula ningo ndakai?

 Baibo ikalondolola ukuti Leza wasonta intunguluzi iyakwata amaka nupya ino tungataila kuli kuti Yesu Klistu. (Masamu 2:6) Yesu u Mwene wa Wene wakwe Leza, uuteeko uwa kwi yulu.—Mateo 6:10.

 Uzye mulasoolola Yesu ukuya intunguluzi inu? Baibo ikalondolola umulandu uno iuzyo lii lyacindamila.

•   “Tonsolini umwana umonsi pakuti ataya nu ukali, pano wene nga wasoka angamulovya mwensi. Icipyu cakwe cikaaka zuwa. Aansansa a yayo aakazina muli aliwe.”—Masamu 2:12, NWT.

 Ii ali nsita ino mulinzile ukupingulapo. Usesemo wa muli Baibo ukalangilila ukuti Yesu watandike ukuteeka umu 1914 nu kuti likwene sile Uwene wakwe Leza wasya usisye mauteeko yonsi ayantunze nu kutandika ukuteeka.—Danieli 2:44.

 Pakuti musambilile na vyuze pali vino mungacita pakuti mwatungilila utunguluzi wakwe Yesu, belengini icipande icakuti “Soololini Ukutungilila Uwene Wakwe Leza Ndakai!”