Vino Antu Yakalanda pa Kupepa Kuli Leza
“Nga nkupepa, nkauvwa kwati Leza ali mupipi nani, watandema ikasa nu kuntungulula lino nkuyuvwa ukuti imponga.”—Ya MARÍA.
“Mamane wafwile pa cisila ca kucuula nu ulwale wakwe kansa pa myaka 13. Nkaiusya ukuti napepanga cila wanda kuli Leza nu kuyuvwa ukuti wisileko sana amano kuli vino nacuulanga. Nayuvwanga ningo.”—Ya RAÚL.
“Ipepo u wila usuma uno Leza wapeela antu.” —Ya ARNE.
Ya María, ya Raúl, na ya Arne na antu aingi yakalola ukuti ipepo u wila ucindame sana. Yakayuvwa ukuti ukupitila umwi pepo, yangalanda na Leza, yangamutaizya nu kulenga uwazwilizyo. Yasininkizya ukuti vino Baibo ikalanda pa kupepa kuli Leza i vyacumi ukuti: “Swemo tukaposya pa manso yakwe Leza, pano twasininkizya ukuti ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.”—1 Yoane 5:14.
Nomba antu aingi, cikayatalila ukuzumila vino Baibo ikalanda apipepo. Ya Steve yalanzile vino yakayuvwa apipepo, Yalanzile ukuti: “Lino nali ni myaka 17 ya cuza yane yatatu yafwile. Wenga pali yayo wafwile umu uzanzo wa pa museo yaili nayo yaponiile muli yemba.” I vyani vino ya Steve yacisile? Yatiile: “Napefile kuli Leza kuti manye umulandu uno ivya musango uu vyacitikile, lelo kutaali icasuko. Fwandi nayuzizye nemwineco ukuti ‘U mulandu ci uno ndinzile ukupepela?’” Aingi yakayuvwa ukuti mapepo yao yatasukwa nupya yakatwisika ndi cakuti yalinzile ukutwalilila ukupepa.
Kwaya na vyuze ivikalenga yamwi yayuvwa ukuti mapepo yatanga yayazwe. Yamwi yakalanda ukuti pa mulandu wakuti Leza wamanya vino tukalondekwa alino ni ntazi zino twakwata, fwandi tutalinzile ukumunena pa vintu vii.
Yamwi nayo yazumila ukuti Leza asilonda ukukutika ku mapepo yao pa mulandu ni viipe vino yacisile mpiti. Ya Jenny yalanzile ukuti: “Intazi ino nakwata i yakuti nkayuvwa uwa silesile. Nacita ivingi ivikalenga nalanguluka, fwandi nkaelenganya ukuti ntalinzile nu kupepa kuli Leza.”
Uzye mukaelenganya uli pa kupepa kuli Leza? Ndi cakuti namwe avino mukayuvwa nanti mukatwisika, amasuko aaya muli Baibo yangamuteekezya. Tungataila vino Baibo ikalanda apipepo; * ingatwazwa ukuzana amasuko uku mauzyo wakwe yaa:
-
Uzye Leza akauvwa mapepo itu?
-
U mulandu ci uno Leza asiasukila amapepo yamwi?
-
Mungapepa uli pakuti Leza aasuka mapepo inu?
-
Uzye mapepo yangamwazwa uli?
^ pala. 9 Muli Baibo mwaya mapepo aingi yano aomvi yakwe Leza aingi yapepanga, ukwikako sile na Yesu Klistu. Mu Malembelo ya Ciyebulai, aakaamwa nu kuti Upangano wa Mpiti, mwaya mapepo ukucila pali 150.
Limwi Mungatemwa Ukulolako na Vii
ACANCE YAKAUZYA
U Mulandu ci Uno Ndinzile Ukupepela?
Uzye ipepo likalenga sile umwi ukuvwa ningo, nanti kwaya na vyuze?
