Nakuliile umu musumba wa Alicante, uku Spain. Ulupwa luno navyalilwemo lwali ulupina sana, fwandi calenzile ukuti intandike ukwikala sile umu miseo. Ing’anda itu yapalamine ni cikuulwa muno yamendelanga matayala. Ya José María, aeneco ya ncito yizile iyaya anji. Yali aansansa wakwe cimwi nupya yansakamalanga sana kucila na vino ulupwa lwane lwansakamalanga. Insita zimwi ndi naya ni intazi, yangazwanga sile kwati u mwinane nupya yali aacuzane acumicumi nanti cakuti yancizileko imyaka 20.

Ya José María yatandike ukusambilila Baibo na ya Nte Yakwe Yeova. Yatemilwe sana vino yasambililanga muli Baibo nupya iizanga yakunenako vino yakusambilila. Kwene nuvwanga, lelo ntatemilwe vino yalandanga. Lino nali umulumendo nakweti ivyakucita ivingi. Lelo, ivintu vyali nu kusenuka zuwa-zuwa.

Nsilonda nu kulanda pa uzanzo uwancitikiile. Cino ningalanda sile i cakuti, uwelewele wane u wandeteliile. Mu wanda sile onga, umi wane wasenwike iuya sile cuze-cuze. Naali umulumendo uwa maka sana, lelo mu nsita sile inono umwili watiile ukuomba, nupya natandike sile ukwikala umu cipatala. Fwandi catazile sana ukuzizimizya intazi ii. Lyonsi kwene nelenganyanga ukuti: ‘Uzye kwene namapusuka?’

Ya José María iizile umu kundola, nupya yapekinye nu kuti ya Nte Yakwe Yeova umu cilongano cino yaalimo yaiza umu kumpempula umu cipatala. Lyene nakomeleziwe wakwe cimwi lino iizanga umu kumpempula. Lino nuvwileko ningo, natandike ukusambilila Baibo. Nizile imanya ningo icalenga ukuti antu yaacuula nu kufwa alino nu mulandu uno Leza walekela sile iviipe vyalukucitika. Nupya nasambilile vino Leza walaya ukucitiila antu uku nkoleelo lino umu nsi mulaya sile antu amalilike: Kutalaya “nanti wenga alailizyanya apakulwala.” (Ezaya 33:24) Umuku uwo wali ali wakutandikilapo ukuvwa ulayo wakwe Leza usuma cuze.

Lino nafumile umu cipatala, nalundulwike zuwa-zuwa umu kusambilila Baibo. Nataandike nu kuya uku kulongana kwa Nte Zyakwe Yeova nupya naombangako nu mulimo wa kusambilizya antu Baibo, fwandi pakuti nakwanisya, napitilanga pa kajinga kano aalemale yakaomvya. Umu 1988, pa 5 Novemba ala indi ni myaka 20, nawatiziwe lino yaantuwike umwili onsi umu manzi. Yeova Leza wangazwa ukutwalilila ukumuombela. Nomba i vyani vino ningacita pakuti namutaizya?

Namanyile ukuti ukulemala kutanga kundesye ukucita vino ningakwanisya umu kuombela Yeova.  Nalondesyanga sana ukulunduluka. (1 Timoti 4:15) Kwene, pakutandika citali icangupale, pano aamu lupwa yatandike ukunzunya lino nasambililanga icumi. Lelo nakweti yakapepa anji, yaayo aali ainane muli vyakwe Leza. Yakwene aangazwilizyanga ukuzanwa lyonsi umu kulongana nupya yansendangako nu mu mulimo wa kusimikila.

Pacisila, natandike ukulonda icifulo kuno ningazana aakuti yansakamala. Nasusile nazana incende isuma sana muno yakasungila aalemale, umu musumba wa Valencia, apaali makilomita 160, uku ncende iyaela uku Alicante. Uku ncende kwene ii ali kuno natwalilila ukwikala manda yonsi.

Nanti icakuti nalemala, natwalilila ukuombela Yeova. Nakazile kompyuta na foni, naomvizye impiya zino yakapeela swe yalemale, alino na zino yampeelanga izyakungazwilizya. Nupya nisile kompyuta mupipi na bedi ino nalalangapo. Lyene cila-wanda wino akansakamala, akaayula kompyuta, napya foni yane ndi takuomba akancitila ningo pakuti yaomba. Apakuomvya kompyuta, nakwata kamasyini kamwi kano inkasintilizya ku cilezu. Nupya nakwata na kamuti kano nkaluma uku mulomo, aali kano nkaomvya pa kutinika manambala apali foni alino nu kulembela pa kompyuta.

Uzye iviombelo vii vyangavwa uli? Cakutandikilako, vikalenga ukuti nayula webusaiti ya jw.org, alino na LAIBULALE PA INTANETI. Ala mwandi iviombelo vii vikangazwa wakwe cimwi! Cila-wanda nkasumba insita ikulu ku kusambilila alino nu kulondelezya impapulo pakuti ntwalilile ukumanyilako navyuze pali Leza na pa miyele yakwe isuma. Nupya lyonsi lino nazukilwa nanti naya nu ulanda, nkazana ivyeo visuma ivyaya pa webusaiti ivikankomelezya.

Nupya kompyuta ikalenga nukuti nakutika alino nu kulandapo pa kulongana ukwa pa cilongano. Fwandi pa mulandu wakuti nakwata kompyuta cikalenga ukuti naasukapo pakulongana, ukupepa mapepo, ukulandako malyasi, alino nu kuwelengako magazini ya Lupungu Lwa Mulinzi ndi cakuti iyampeela ukuwelenga. Nanti cakuti nsikwanisya ukupita pakuti inzanwe umu kulongana, lelo nkayuvwa sana uwa nsansa, pano namanya ukuti nkapendelwa umu cilongano cino nayamo.

Nupya kompyuta na foni vikalenga ukuti naombako sana umulimo wa kusimikila. Kwene icacumi ntanga inkwanisye ukuya umu kusimikila uku ng’anda ni ng’anda wakwe vino ya Nte Yakwe Yeova aingi yakacita. Lelo cico citalenga ukuti inte ukusimikila. Fwandi iviombelo kwene vii ali vino inkaomvya pa kunenako anji icumi ca muli Baibo. Cumi kwene, nkaipakizya wakwe cimwi ukulanzyanya na antu pa foni cakuti na ya eluda aamu cilongano cino nayamo yakanena ukuti naombako kampeni yakusimikila ukuomvya foni. Kampeni kwene ii ika-avwa sana na yauze aamu cilongano yano yasifuma pa mang’anda yao pa mulandu wa kulwalilila.

Lelo iviombelo vii asi vilivyo sile ivyalenga ukuti  nkwate insansa. Cila-wanda ya cuza yane aantemwa wakwe cimwi yakaiza umu kundola. Yakaiza na ya lupwa yao alino na ya cuza yao aakalondesya ukusambilila Baibo. Nupya lyonsi ndi iza, yakanena ukuti intandike ukulanzyanya nayo. Alino insita zimwi, avyazi aakwata ana yakaiza umu kumpempula nupya yakanena ukuti tusambilile Baibo capamwi nu lupwa lwao amanguzi. Nkauvwa ningo sana maka-maka ana ndi iza ikala pali bedi pano inkalala alino iyatandika ukunena icalenga ukuti yatemwe Yeova.

Nkauvwa ningo sana ukupokelela aenyi aingi. Ku muputule uno inkalala kukazuula ya cuza yane aakaiza uku kundola, nupya yamwi yakafuma umupipi alino yamwi yene yakafuma ukutali sana. Icumi kwene, namwe mungelenganya ukuti ukutemwa kuno aina yaa yakwata kukazungusya sana na antu kwene aakansakamala. Cila-wanda inkataizya Yeova pa kundeta umwi uvi lyakwe, umwaya antu aatemwana cuze.

Lyonsi lino umwi wandamuka wati: “Muli uli,” inka-asuka ukuti, “ncili nkulwisya ulwi!” Icumi kwene namanya ukuti nanti nalemala, intaya nenga foo. Swe Ina Klistu twamanya ukuti asi mulandu ni vintu ivikatucitikila, tukalwisya “ulwi usuma wa kusunga utailo.” (1 Timoti 6:12) I cani icangazwa ukuti intwalilile ukuombela Yeova pa myaka iingi nanti cakuti nalemala? Cila-wanda inkapepa kuli Yeova nu kumutaizya pali vino walenga umi wane ukuya ucindame. Nupya lyonsi nkaombela Yeova ukulingana na papezile maka yane, alino nkaelenganya sana pa vintu ivisuma ivilacitika uku nkoleelo.

Ilingi inkaelenganya vino insi ipya ilaya alino na vino cilaya lino indatandika ukusimula nu kutolooka. Insita zimwi nga tukuseka na ya José María ya cuzane, aakacula ukundwala ino yakaati polyo, inkayuuzya ukuti: “Uzye ngatwatiile tusimwile capamwi a weni angasya umuze?” Lyene nayo yaka-asuka iyati: “Ukucimvyanya kutakweti incito, icicindame ukwizaikala umu paladaise.”

Kwene citangupala ukuzizimizya intazi yi iyakulemala. Namanya ukuti lino nali mwance nacisile ivyauwelewele ivyalenga naacuula ukuntazi kwene ii. Lelo, inkauvwa ningo sana pano Yeova atantazyela. Wampeela ivintu ivingi wakwe cimwi; naaya umu ulupwa lwakwe yakapepa, ndakai ncili nu umi, nkaya nu luzango lino inkwazwa anji ukumanya icumi, nupya namanya ukuti ivintu uku nkoleelo vilaziipa cuze. Fwandi ningalanda ukuti, icumi kwene Yeova wampeela ivintu ivingi ukucila na pali vino inkalonda.