Baibo italanda umu kulungatika pa kusindula. a Lelo, vino yalanda pa umi ni mfwa vikatwazwa sana. Ukukoma kutazumiliziwa, nomba citanga cilondekwe ukwezya sana na maka ukutantalizya uumi lino iciloleka paswe ukuti umuntu ali umu kufwa.

 Baibo ikati Leza ali Kaumba witu, “intendekelo ya umi.” (Masamu 36:9; Milimo 17:28) Leza wacindika sana umi. Fwandi ali mulandu uno Leza atazumilizizya umuntu ukukoma umuntu muze nanti umuntu umwineco ukuikoma. (Kufuma 20:13; 1 Yoane 3:15) Nupya Baibo ikati tulinzile ukwezya na maka ukucingilila umi witu nu umi wa yantu yauze. (Malango 22:8) Fwandi Leza akalonda twacindika sana umi.

Nga ndi cakuti umuntu watalwalisya icakuti atanga apole?

 Baibo itazumilizya ukukoma umuntu nanti icakuti iciloleka apaswe ukuti asikupola. Icacitiike uku Mwene Saulo uwa ina Izlaeli cikatungilila icisinka cii. Lino wacisike sana umu ulwi, wanenyile umuomvi wakwe ukuti amumalilile sile. (1 Samueli 31:3, 4) Umuomvi wakwe Saulo wakanyile. Nomba umuntu muze wizile asomba ukuti wacisile vino Saulo walondanga kuli kuti ukumumalilila. Davidi wapingwile umuntu wiya ukuti wali inkomi. Wamupingwile vivyo pano walolanga umi wakwe vino Leza akaulola.—2 Samueli 1:6-16.

Uzye tulinzile sile ukutantalizya umi na lino umuntu atanga apole?

 Ndi cakuti iciloleka ukuti umuntu amafwa, Baibo itaalanda ukuti tulinzile ukwezya na maka ukutantalizya umi. Lelo Baibo ikalanda ivyuvwike. Imfwa u mulwani witu umwipisye, tukafwa pa mulandu nu luyembu. (Loma 5:12; 1 Kolinto 15:26) Nanti icakuti tusilonda ukufwa, tutalinzile ukutiina imfwa, pano Leza walaya ukuti alatuutulula afwe. (Yoane 6:39, 40) Umuntu uwacindika umi akalonda ukulwaziwa ukusuma ukwayako. Lelo ukucita vivyo kusipiliula ukulonda ukulwaziwa ukungatantalizya umi na lino iciloleka apaswe ukuti umuntu asikupusuka.

Uzye ukuikulika u luyembu luno Leza atanga aeleele umuntu?

 Awe, Baibo itaalanda ukuti ukuikulika kwaya pa maifyo yano Leza atanga aeleele umuntu. Nanti icakuti ukuikoma u mulandu uwipisye, b Leza akamanya ivikalenga antu yamwi ukuikulika wakwe indwala ya mu melenganyo, ukusakamikwa sana, nanti sile vino umuntu waya ivingalenga alondesya ukuikulika. (Masamu 103:13, 14) Muli Baibo mwaya amazwi aafuma kuli Leza aakakomelezya antu aali ni ntazi izipisye. Nupya Baibo ikati: “Asuma na aipe, yalazyukuka kufuma ku afwe.” (Milimo 24:15) Amazwi yaa yakalangilila ukuti kwaya upaalilo wa kuti na antu kwene aluvyanyizye sana, Leza angaca ayatuutulule, pali yayo paaya na yano yaikuliike.