Nanti icakuti Baibo italanda pa “kuponya inda,” ivikomo ivingi vikalanda pali vino Leza akalola uumi uwa muntu, ukwikako sile nu umi wa mwana aacili ukuvyalwa.

 Umi uupe uno Leza watupeela. (Utandiko 9:6; Masamu 36:9) Akalola ukuti umi onsi wacindama, kumwi nu wa mwana acili ukuvyalwa. Fwandi umwi nga wakoma umwana aacili uku vyalwa ukumufulo sile, ala muntu wiyo inkomi.

 Isunde lino Leza wapeezile Aina Izlaeli lyatangi: “Antu yamwi aonsi ndi yakulwa, alino yakunula umwanaci asenzile indilwa, nga ni ndilwa iyo yononeka kwaula kumucisa mu musango uli onsi, lyene wiyo uwatamukunula alinzile ukulipa iya wa mwanaci wiyo kulingana nu uputuzi wa cilye. Lelo ndi umwanaci umwisikulu wacisika, lyene uvunuko ulinzile ukuya wakwe vi: uumi pa uumi.”—Kufuma 21:22, 23. a

•  A lilaci lino umi wa muntu ukatandika?

•  Uzye Leza angeleela umuntu uwaponyizyepo inda?

•  Uzye ukuponya inda kwipa ndi cakuti umi wakwe nyina nanti uwa mwana uli umu uzanzo?

 Leza akalola ukuti umi wa muntu ukatandika lino umwana watandika kupangwa umunda. Leza walangilila imiku iingi umwi Izwi lyakwe, Baibo, ukuti akalola umwana aacili ukuvyalwa ukuti u muntu. Lolini vimwi ivikalangilila ukuti Leza akalola uumi wa mwana acili ukuvyalwa ukuti waya icili cimwi nu wa mwana uwavyalwa.

•   Umupasi walenzile Umwene Devedi anene Leza ati: “Wemo wambweni calimwi lino ntacili mvyalwe.” (Masamu 139:16) Leza walolanga Devedi ukuti wali umuntu na lino atali avyalwe.

•   Nupya, Leza wamanyile ukuti wali nu kupeela kasesema Yelemiya umulimo ucindame sana na lino Yelemiya acili ukuvyalwa. Leza walanzile kuli Yelemiya ati: “Nakusolwile lino ntacili nkuumbe mu ndilwa yakwe mayo wako, Lino utali uvyalwe ala nakusonta mpiti, kuti uce uye kasema wa mitundu yonsi.”—Yelemiya 1:5.

•   Kalemba umwi wakwe Baibo Luka, uwali dokota, waomvizye izwi limwi lya Cigliki pa kulondolola umwana atali avyalwe wakwe lili kwene lino waomvizye pa kulondolola umwana uwavyalwa.—Luka 1:41; 2:12, 16.

 Leza angeleela antu aaponyizyepo inda. Ndi cakuti iza yasambilila vino Leza akalola umi, yatalinzile ukulasakamala nu kulaipeela imilandu. “Yeova uwaluse, uwa cikuku, . . . ndi vino ufumondaka watalukana nu uwondaka, avino nawe akafuntusya uyi kunotuli.” b (Masamu 103:8-12) Yeova akaeleela yonsi akalapila ukufuma pa nsi ya mwenzo ku membu zino yacisile, kumwi nu kuponya inda.—Masamu 86:5.

 Ukulingana na vino Baibo ikalanda pa umi wa mwana atali avyalwe, citanga ciye ningo umuntu ukuponya inda pa mulandu wakuti umi wakwe nyina nanti uwa mwana uli umu uzanzo.

 Nga ndi cakuti kwacitika vimwi ivingalenga yalondekwe ukusoololapo nga yamacingilila uumi wakwe nyina nanti uwa mwana aacili ukuvyalwa? Nga caaya vivyo, ale yonsi yano icikuma yalinzile ukupingulapo wino yamacingilila nga anyina nanti umwana.