Uzye Leza waomvizye ukusanguka pa kuumba ivya umi ivipusanepusane?
Vino Baibo yalandapo
Awe. Baibo ikalondolola ningo ukuti Leza waumvile antu ni nyama mu “misango” ipusanepusane alino ni vimelwa. a (Utandiko 1:12, 21, 25, 27; Kusokolola 4:11) Ikalanda ukuti antu yonsi yafumile kuli Adamu na Eva, avyazi itu akutandikilapo. (Utandiko 3:20; 4:1) Baibo isitungilila icisambilizyo cakuti Leza waomvizye ukusanguka pa kuumba ivintu ivipusanepusane ivya umi. Lelo Baibo isikana vino ya sayansi yakalanda ukuti iciumbwa conga ica umi cikaya umu misango ipusanepusane. b
Uzye Leza waomvizye ukusanguka?
Antu aazumila ukuti Leza waomvizye ukusanguka pa kuumba ivintu vya umi yakaelenganya ivipusane pali vino cali pakuti acite vivyo. Ibuku lyakuti Encyclopædia Britannica likalanda ukuti antu yakaelenganya ukuti “imilolekele ya viumbwa vya umi ukulingana ni ncende ino vyayelako ali nzila ino Leza akaomvya pa kutungulula ivintu vya mu nsi.”
Antu akaelenganya ukuti ivintu vyaumvilwe ukupitila umu kusanguka yakaelenganya na vii:
Ivya umi vyonsi ivyayako vyasangwike ukufuma ku vya umi vyuze ivyaliko mpiti sana.
Iciumbwa conga ica umi cingasanguka ukuya iciumbwa cuze icipusaneko, icisambilizyo cii acino yakaama ukuti ukusanguka ukulingana ni ncende.
Yakati umu nzila imwi Leza aliwe akalenga ivya musango uu ukucitika.
Uzye ukusanguka kukauvwana na vino Baibo ikalanda?
Aakaelenganya ukuti Leza akaomvya ukusanguka pa kuumba ivintu yakati ivyalembwa muli Baibo umwi buku lya Utandiko visi vya cumi sana. Lelo Yesu walozizye ukwi lyasi ilyaya umwi buku lya Utandiko ukuti i vintu ivyacitike. (Utandiko 1:26, 27; 2:18-24; Mateo 19:4-6) Baibo ikalanda ukuti lino Yesu atatala wiza pano nsi, wali ukwi yulu pamwi na Leza nupya wavwile Leza ukuumba “ivintu vyonsi” ivyayako. (Yoani 1:3) Fwandi imyelenganyizizye yakuti Leza waomvizye ukusanguka pa kuumba ivintu ivipusanepusane ivya umi isiuvwana na vino Baibo ikasambilizya.
Uzye vino ivimelwa vikasenuka umu milolekele ukulingana ni ncende kuno viyelile, cikalangilila ukuti vyasangwike?
Baibo italondolola uwingi wa misango ipusanepusane ingayako iya ciumbwa conga. Nupya isikana ukuti inyama izipusanepusane ni vimelwa vino Leza waumvile vingapusana umu milolekele lino vikusandana nanti ukuloleka umu musango upusaneko ukulingana ni ncende kuno viyelile. Nanti icakuti yamwi yakaelenganya ukuti ivya musango uwo nga vyacitika ale ivya umi vyasanguka, kusiya ivya umi ivipya ivikapangika.
a Baibo ikaomvya izwi lyakuti “misango” ilyakwata amaupiliulo aingi ukucila ukuomvya izwi lyakuti “milolekele” wakwe vino ya sayansi yakalanda. Ilingi ya sayansi yakasoololapo ukulanda ukuti iciumbwa cimwi icisanguka ndi cakuti yalola imisango yuze iya ciumbwa icili cimwi kwene, wakwe vino izwi lyaomviwa umu Utandiko.
b Icisambilizyo cii insita zimwi cikalozya uku kusanguka ukulingana ni ncende.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye ya Nte Yakwe Yeova Yazumila Ukuti Ivintu Vyaumvilwe Umu Manda 6?
Uzye mwamanya ukuti vino yamwi asambilila sana pa uumbo yakalanda visiuvwana na vino Baibo ikasambilizya?
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.