Baibo ikalangilila ukuti Yesu atatwazile, nanti icakuti isilanda mu kulungatika vino wali. a Lolini ivyalondelelapo.

1.   Ilingi Baibo ikalanda pa lupwa lwakwe Yesu na pa anaci yano amulondelanga lino waombanga umulimo wa kusimikila na yaya azanyilweko lino yamukomanga, lelo isilanda ukuti wakweti umuci. (Mateo 12:46, 47; Mako 3:31, 32; 15:40; Luka 8:2, 3, 19, 20; Yoane 19:25) Cino Baibo italandilapo pa utwazi wakwe i cakuti Yesu ataatazile atwalepo.

2.   Lino Yesu walanzile pali yayo aakasololapo ukukaanatwala pakuti ike sana mano ku mulimo wakwe Leza, wanenyile alondezi yakwe ukuti: “Lekini angikala ukwaula kutwala [usimbe] aikale vivyo kwene.” (Mateo 19:10-12, NWT) Wimike icilangililo kuli yayo aakasoolola ukwikala usimbe pakuti ike sana mano ku kuombela Leza.—Yoane 13:15; 1 Kolinto 7:32-38.

3.   Lino atatala wafwa, wapekinye vino nyina wali nu kusakamalwa. (Yoane 19:25-27) Ndi cakuti Yesu atwala nanti ukukwata ana, nga wasile wapekanya vino ulupwa lwakwe lonsi lwali nu kusakamalwa.

4.   Baibo ikanena ya iya kukolanya Yesu, lelo isilanda pali vino Yesu wasunganga umuci wakwe. Ikalanda ukuti: “Namwe mwe onsi mutemwe aci inu wakwe vino Klistu watemilwe iuvi nga nu kupeela umi wakwe pa mulandu wakwelyo.” (Efeso 5:25) Ndi cakuti Yesu wakweti mama lino wali pano nsi, uzye citanga cilinge sana ukulanda pali vino ya iya yangakolanya vino wasunganga umuci kulingana na vino icikomo cii cikalanda?

 Ee, Yesu wakweti atowakwe 6. Pali yaa paali Yakobo, Yosefu, Simoni, na Yuda alino na ya kaci yakwe yaili. (Mateo 13:54-56; Mako 6:3) Atowakwe yaa yali a mwana nyina wakwe Yesu kwene Maliya umuci wakwe Yosefu. (Mateo 1:25) Baibo ikaama Yesu ukuti “iyeli” lyakwe Maliya icikasenula ukuti Maliya wakweti ana na yauze.—Luka 2:7.

 Pa kutungilila icisinka cakuti Maliya watwalilile ukuya nacisungu manda yonsi aumi wakwe, yamwi yalanda ivipusaneko api izwi lyakuti “aina.” Yamwi yakalola kwati aina yakwe Yesu yali ana yakwe Yosefu yano wavile lino atatala watwala Maliya. Lelo, Baibo ikalangilila ukuti Yesu wapyanyile insambu zya kuya mu lupwa lwa wene wakwe Davidi. (2 Samueli 7:12, 13; Luka 1:32) Ndi cakuti Yosefu wakweti ana aonsi aikolo kuluta pali Yesu, uwali mukalamba nga aliwe wapyanyile insambu zizyo.

 Uzye izwi lii likalozya ku alondezi yakwe Yesu nanti aina muli vyakwe Leza? Ukwelenganya kwa musango uu kwapusana na vino Baibo ikalanda ukuti pa nsita imwi “Na ina yakwe kwene yatamutaile.” (Yoane 7:5) Baibo ikapusanya aina yakwe Yesu ku alondezi yakwe.—Yoane 2:12.

 Kulingana na masambililo yamwi, aina yakwe Yesu yali avyala yauze. Lelo Malembelo ya Cigiliki yene yakaomvya mazwi apusanepusane wakwe “mwina,” “lupwa,” nu “muvyala.” (Luka 21:16; Kolose 4:10) Ya kalemba yakwe Baibo aingi yalanda ukuti aina na yakaci yakwe Yesu ayaya kwene yano yavilwe yonsi. Ibuku lyakuti The Expositor’s Bible Commentary likalanda ukuti: “Inzila isuma ingalenga tuvwikisye upiliulo wi izwi lyakuti ‘aina’ . . . i yakuti izwi lii likalozya ku ana yakwe Maliya na Yosefu kuli kuti ana avilwe muli Maliya.” b