Ya dofini yakalizya viunda vipusane pusane nupya yakakutika icongo ca viunda vikufuma kuli vino yakulizya pakuti yamanye ukwakuya alino na vino incende iyo ili. Ya sayansi nayo yezya ukukolanya ciunda cakwe dofini cino akalizizya uku mpuno isongole pa kupanga viombelo ivyakwika umu manzi pakuti vingaomviwa uku kumala intazi zino vimasyini ivyayako ndakai vitanga vimale.

Elenganyini pali cii: Dofini akazana ni inswi izyafisama mu mucanga pansi yakwe yemba nupya akamanya nu upusano wa nswi ni ciliwe. Nupya kulingana na vino Keith Brown, uwasambilile pa univeziti ya pa Heriot-Watt, mu Edinburgh, ku Scotland walanzile, dofini “angamanya ni ncende apali amanzi azuke, akantuke, alyompelele alino na mafuta ale aali apatali apangatalimpa mamita 10.” Ya sayansi yangatemwa ukupanga iviombelo ivingaomba wakwe vino dofini akacita.

Aakalondelezya pa vintu yezya ukupituluka muli vino dofini akalizya ciunda nu kuvwa nupya yezya ukupanga iviombelo ukuvikolanya kuli dofini. Lyene icacitika i cakuti yapanga iciombelo ukuomvya tuntu utwingi utwa malaiti nupya iingizya ciombelo cico muli cimwi icaya wi botolo ilikaomviwa kukupimilako ilitanga licile na mita yonga umu utali. Lyene ciombelo cico yakacikambatika ukwi loboti lya mu manzi ilyakolana ni bomu lya pa manzi, cikaomviwa ku kuceceta pansi yakwe yemba, kuzana ivyazikama muli yemba ivili wa ntambo nanti mipaipi alino nu kulola ndi cakuti ivintu vivyo vili ningo ukwaula ukuvilema umukulungatika. Ciombelo cico cikayavwa ukumanya vino mafuta yali alino nu muza. Ciunda cakwe Dofini caluta na vino iviombelo vino yakolanyako vikaomba, ivikaavwilizya ya injiniya ukumanya incende isuma mu manzi apangikala iviombelo, ukulola muno iviombelo vikononeka, wakwe umuli milale ku vyela ivyatungilila vimasyini vya kwimbilako mafuta alino nu kulola muno mipapi yalepuka.

Uzye mukwelenganyapo uli? Uzye mungati ciunda cakwe dofini caiziile sile nanti kwaya uwalenzile?