1 Piter 2:1-25
2 Innem kom̦win jol̦o̦k jãn kom̦ aolep men ko renana kab jerbalin m̦on̦, etao, ebbanban, im kõnanaik ro jet.
2 Ãinwõt niñniñ ko rej kab l̦otak, kom̦win ejaake juon kõn̦aan ñan ijol̦e milik eo ejjel̦o̦k kãre ie jãn naan eo bwe enaaj kõm̦m̦an bwe kom̦win maroñ rũttol̦o̦k im bõk lo̦mo̦o̦r,
3 ijoke kom̦ij aikuj in m̦okta edjoñe jouj eo an Irooj.
4 Armej rar kõjekdo̦o̦ne dekã eo emour, ijoke Anij ear kããlõte im ear watõke bwe eaorõk. Ilo ami itok ñan ippãn,
5 kom̦ eo kom̦ij ãinwõt dekã ko remour, kom̦ij ejaake juon em̦ ikijjeen jetõb kwõjarjar* eo an Anij kõnke kom̦win erom bũrij ro rekkwõjarjar, im kõn tõl eo an jetõb kwõjarjar,* kom̦win maroñ ajel̦o̦k menin katok ko rej kabuñbũruon Anij ikijjeen Jesus Christ.
6 Bwe Jeje ko rej ba: “Roñjake m̦õk! Ij likũt ilo Zaion juon dekã kar kããlõte im eaorõktata ilo pedped eo, im jabdewõt eo ej kwal̦o̦k an tõmak ilo e ejjãmin ajl̦o̦k.”*
7 Kõn men in, elukkuun aorõk ñan kom̦ kõnke kom̦ij rũttõmak; bõtab ejjab ãindein ñan ro rejjab tõmak. Jeje ko rej ba bwe “dekã eo rũkkal ro rar kõjekdo̦o̦ne em̦õj an oktak im erom dekã eo eaorõktata”
8 im ej “juon dekãin tipñõl im juon dekãin kal̦õkatip.” Rein rej l̦õkatip kõnke rejjab pokake naan eo. Eñin ej jem̦l̦o̦k eo an armej rein.
9 Ak kom̦, kom̦ij juon bwij em̦õj kããlõte, ro rej kiiñ im bũrij, juon aelõñ eokkwõjarjar, im an m̦weiuk eaorõk, kõnke kom̦win kwal̦o̦k ilo jikin ko otemjej kõn joñan an em̦m̦an* Eo ear kũr kom̦ jãn marok ñan meram eo an ekanooj em̦m̦an.
10 Bwe m̦okta kom̦ar jab armej ro an Anij, ak kiiõ kom̦ij armej ro an; m̦okta ear jab kwal̦o̦k tũriam̦o ñan kom̦, ak kiiõ ej kwal̦o̦k tũriam̦o ñan kom̦.
11 Kom̦ ro jitõnbõro, ij akwel̦ap ñan kom̦, ãinwõt ke kom̦ij ruwamãejet im eban to ami pãd ilo lal̦ in, bwe en jab bõjrak ami kõjparok kom̦ jãn kõn̦aan ko an kanniõk, ko rej tarin̦aeik kom̦.
12 Kom̦win kwal̦o̦k wõt m̦wil ko rem̦m̦an ilo ami pãd ibwiljin ri-aelõñ ko, kõnke ñe renaaj n̦aruomi im ba bwe kom̦ ri-nana, ren maroñ lo im kam̦ool jerbal ko ami rem̦m̦an, innem remaroñ nõbar Anij ilo raan eo enaaj kõm̦m̦ane iien etale eo an.
13 Kom̦win l̦oor kõn̦aan eo an Irooj ilo ami kõttãik kom̦ ñan men otemjej kõm̦m̦anin armej,* meñe ej ñan juon kiiñ eo eutiej
14 ak ñan kom̦ja* ro ear jitõñ er bwe ren kaje ro renana, im nõbar ro rej kõm̦m̦an em̦m̦an.
15 Kõnke ej ankilaan Anij bwe ilo ami kõm̦m̦an em̦m̦an, kom̦win maroñ kiil lo̦ñiin* ro rejajel̦o̦kjen̦ im rej kwal̦o̦k naan ko ejjel̦o̦k tokjãer.
16 Kom̦ij armej ro ranemkwõj, innem kom̦win kõjerbal anemkwõj in ami ãinwõt juon ri-kõm̦akoko ñan Anij, im jab ãinwõt juon kein kalbubuuk* kõm̦m̦an ko renana.
17 Kom̦win kwal̦o̦k kautiej ñan jabdewõt armej. Kom̦win yokwe aolep ro jeid im jatid ilo tõmak, kom̦win mijak Anij, im kom̦win kautiej kiiñ eo.
18 Ri-karejar ro ren kõttãik er ñan irooj ro aer im ren mijak er, ejjab ñan ro wõt rem̦m̦an im rejouj, ak bareinwõt ñan ro epen kabuñbũrueer.
19 Bwe ej juon menin kabuñbũruon Anij ñe juon ej kijenmej meñe ej iioon apañ* im ej eñtaan kõn wãween ko rejjab jim̦we, kõn an kõn̦aan dãpij juon bõklõkõt em̦m̦an im̦aan mejãn Anij.
20 Bwe ej ke juon menin nõbar el̦aññe rej m̦an kom̦ kõn ami kar jerawiwi im kom̦ij kijenmej kake? Bõtab, el̦aññe kom̦ij kijenmej ium̦win eñtaan kõn ami kõm̦m̦an em̦m̦an, men in ej juon menin kabuñbũruon Anij.
21 Ilo m̦ool, kar kũr kom̦ ñan wãween mour in, bwe meñe Christ ak ear eñtaan kõn kom̦, im ear likũt juon joñak ñan kom̦ bwe kom̦win kanooj anõke jenkwan neen.
22 Ejjel̦o̦k jerawiwi ear kõm̦m̦ane, im ear jab etao ilo naan ko an.
23 Ke rar ba naan ko reddo ñane, ear jab ukotl̦o̦k naan ko reddo ñan er. Ke ear eñtaan, ear jab kalõl̦ño̦ñ er, bõtab ear likũt an kõjatdikdik ilo Eo ej ekajet jim̦we.
24 Im ikijjeen ãnbwinnin, e make ear ineek jerawiwi ko ad ke kar dilaiki ioon jurõn al̦al̦* eo, ilo wãween in jen maroñ mej jãn* jerawiwi im jen mour ilo wãnõk. Im “ikijjeen kinej ko kinjen, kom̦ar mour.”
25 Bwe kom̦ar ãinwõt jiip ko rejebwãbwe ak kiiõ em̦õj ami jepl̦aak ñan eo ej ami jabõt, im ej ri-loloodjake mour ko ami.
Footnotes
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “jook.”
^ Mel̦el̦ein, wãween im kõm̦m̦an ko rem̦m̦an an.
^ Ak “armej rar kajutaki.”
^ Ak “kabna.”
^ Kajin Grik, “lukwõj lo̦ñiin.”
^ Ak “jekpen ñan.”
^ Ak “bũrom̦õj; metak.”
^ Ak “wõjke.”
^ Ak “en jem̦l̦o̦k ad.”
