2 Korint 2:1-17
2 Em̦õj aõ pepe ippa make bwe ñe inaaj lowaj kom̦, iban bar kõm̦m̦an bũrom̦õj.
2 El̦aññe inaaj kõm̦m̦an ami bũrom̦õj, innem wõn enaaj kam̦õn̦õn̦õik eõ ijello̦kun wõt kom̦ ro iar kabũrom̦õj er?
3 Unin aõ kar je men kein ej bwe in l̦ak iwõj, in jab bũrom̦õj kõn ro me in kar lañlõñ kõn er, kõnke ij lukkuun tõmak bwe men ko el̦ap aer kalañlõñ eõ rej bar kalañlõñ kom̦ aolep.
4 Ke iar jejewaj ñan kom̦, iar kanooj inepata im ear eddo bũruõ, im el̦ap an kar to̦o̦r dãnnin kõmjaal̦al̦ jãn meja. Iar jab kõm̦m̦ane men in ñan kabũrom̦õj kom̦, bõtab iar kõm̦m̦ane ñan kwal̦o̦k joñan an l̦ap aõ yokwe kom̦.
5 El̦aññe jabdewõt ear kõm̦m̦an bũrom̦õj, ejjab ña eo ear kabũrom̦õje, ak ear kabũrom̦õj kom̦ aolep. Jol̦o̦k aõ bõd ñe ekajju aõ kõnnaan.
6 Enañin aolepemi rar lel̦o̦k kaje rot in ñan armej n̦e, im ebwe joñan n̦e.
7 Kiiõ kom̦ij aikuj m̦õn̦õn̦õ in jol̦o̦k an bõd im kaenõm̦m̦ane bwe en jab ebbeer kõn an l̦e jãn joñan an bũrom̦õj.
8 Kõn men in, ij akwel̦ap ñan kom̦ bwe kom̦win kam̦ool ñane bwe kom̦ij yokwe e.
9 Un eo juon in unin aõ kar jejewaj ñan kom̦: ej ñan jel̦ã el̦aññe kom̦ naaj kam̦ool bwe kom̦ij pokake ilo men otemjej.
10 El̦aññe kom̦ij jol̦o̦k an juon bõd kõn jabdewõt men ear kõm̦m̦ane, ij bareinwõt jol̦o̦k an bõd. Ilo m̦ool, el̦aññe ij jol̦o̦k an jabdewõt armej bõd (el̦aññe ewõr bõd en̦ em̦õj aõ jol̦o̦ke), ij kõm̦m̦ane kõn wõt kom̦ im̦aan mejãn Christ,
11 bwe Setan en jab anjo̦ iood,* kõnke jejel̦ã kõn wãween ko ej kõjerbali.*
12 Ke iar tõparl̦o̦k Troas bwe in kwal̦o̦k kõn ennaan eo em̦m̦an kõn Christ im ear pel̦l̦o̦k juon iien em̦m̦an* ñan aõ kõm̦m̦ane jerbal eo an Irooj,
13 ear inepata bũruõ* ke iar jab loe jatũ Taitõs. Innem iar yokyokwe ri-kal̦oor ro ijo im ilo̦k ñan Masedonia.
14 Jen kam̦m̦oolol Anij, eo ej tõl kõj aolep iien ilo ad pãd ilo juon m̦aaj in anjo̦ ippãn Christ, im ej kõjerbal kõj ñan kajeeded* ñan aolep jikin jel̦ãl̦o̦kjen̦ eo kõn E me ej ãinwõt bwiin mãlu!
15 Ippãn Anij, kõj ro me jej kwal̦o̦k kõn Christ, jej ãinwõt bwiin mãlu ibwiljin ro renaaj bõk lo̦mo̦o̦r im ro renaaj jako.
16 Ñan ro renaaj jako, bwiin* in ej ãinwõt bwiin mej im ej tõll̦o̦k ñan mej, bõtab ñan ro renaaj mour, bwiin in ej juon bwiin mãlu in mour im ej tõll̦o̦k ñan mour. Innem wõn ekkar ñan an bõk jerbal in?
17 Ekkar bwe en kõj eo kõnke jejjab wiakake* naanin Anij ãinwõt elõñ armej, bõtab jãn juon bõro em̦õn̦õn̦õ jej kõnono ãinwõt ke Anij eo ear jilkintok kõj. Aet, jej kõm̦m̦ane men in im̦aan mejãn Anij im ippãn Christ.
Footnotes
^ Ak “m̦on̦e kõj.”
^ Ak “kõttõpar ko an; ial̦ in m̦on̦ ko an.”
^ Kajin Grik, “juon kõjãm.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “kaalikkar.”
^ Ak “bwiin mãlu.”
^ Ak “kõm̦m̦an jããn kake; peejnej kake.”
