Jerbal 3:1-26
3 Juon raan ke ear iien jar ilo 3 awa jim̦a* ãlikin raelep, Piter im Jon rar wanlõñl̦o̦k ñan tampel̦ eo.
2 Ilo tõre in, jet armej rar kotaketok juon em̦m̦aan ear jaje etetal jãn ke ear l̦otak. Aolep raan rar bõktok im likũti iturin kõjãm eo etan Aiboojoj ilo tampel̦ eo bwe en kajjitõk m̦weien tũriam̦o ippãn ro rej del̦o̦ñl̦o̦k ilo tampel̦ eo.
3 Ke ear lo an Piter im Jon itõn del̦o̦ñl̦o̦k ilo tampel̦ eo, ear jino kajjitõk m̦weien tũriam̦o ippãerro.
4 Bõtab Piter im Jon rar kalimjeke, im Piter ear ba ñane: “Reitok m̦õk ñan kõm̦ro.”
5 Innem ear kalimjek erro im ear kõtmãne bwe ewõr men en̦ renaaj lel̦o̦k ñane.
6 Bõtab Piter ear ba: “Ejjel̦o̦k jelba im gold ippa, bõtab inaaj lewaje men eo ewõr ippa. Ilo etan Jesus Christ ri-Nazeret, kwõn etetal!”
7 Ãlikin wõt an ba men in, ear jibwe anbwijmaroñin pein em̦m̦aan eo im kajutake, im ilo iien eo wõt ear kajju kajoorl̦o̦k neen.
8 Innem ear make jutak im jino etetal im ear etal ippãerl̦o̦k ñan tampel̦ eo, bõtab ej etetal im ekkãke im nõbar Anij.
9 Aolep armej rar lo an etetal im nõbar Anij,
10 im rar jino kile bwe l̦eo in ekõn jijet im kõttar aer lel̦o̦k m̦weien tũriam̦o ñane iturin Kõjãm eo etan Aiboojoj ilo tampel̦ eo, im rar lukkuun bwilõñ im l̦o̦kjenaer kõn men eo ear wal̦o̦k ñane.
11 Ke em̦m̦aan eo ej dãpiji wõt pein Piter im Jon, aolep armej ro rar ettõrl̦o̦k ñan ippãer ilo jikin eo etan Ettõñaak eo an Solomon, im rar lukkuun bwilõñ.
12 Ke Piter ear lo men in, ear ba ñan armej ro: “Em̦m̦aan in Israel ran̦, etke kom̦ij bwilõñ kõn men in im etke kom̦ij kalimjek kõm̦ro rot n̦e? Ta kom̦ij l̦õmn̦ak bwe kõm̦ro kar kõm̦m̦an bwe l̦ein en maroñ etetal kõn kajoor ko am̦ro make ak kõn am̦ro tiljek ñan Anij ke?
13 Anij eo an Ebream, Aisak, Jekob, im an ro jim̦m̦aad, ear kaiboojoj Jesus, ri-Karejar eo an, eo kom̦ar liaakel̦o̦k im kaarmejjeteiki im̦aan mejãn Pail̦at, meñe Pail̦at ear pepe in karõl̦o̦ke.
14 Aet, kom̦ar kaarmejjeteik em̦m̦aan in eokkwõjarjar im ewãnõk, im kom̦ar kajjitõk bwe ren karõl̦o̦k ñan kom̦ juon ri-uror,
15 ak kom̦ar m̦an ri-Tõl eo El̦ap im ej tõl armej ñan mour. Bõtab Anij ear kõjerkake jãn mej, im kõmij ri-kam̦ool kõn men in.
16 Innem ikijjeen ãt eo etan, im kõn am̦ro tõmak ilo etan, men in ear kõm̦m̦an bwe em̦m̦aan in kom̦ij loe im jel̦ã kake en kajoorl̦o̦k. Tõmak eo am̦ro ilo e ear kõm̦m̦an bwe em̦m̦aan in en lukkuun ãjmour im̦aan mejãmi aolep.
17 Innem kiiõ, em̦m̦aan ran̦ jeiũ im jatũ, ijel̦ã bwe kom̦ar kõm̦m̦ane men in kõn ami jaje, ãinwõt bar ri-tõl ro ami.
18 Bõtab ilo wãween in, Anij ear kajejjet kũtien men ko ear kwal̦o̦k m̦oktal̦o̦k ikijjeen aolep ri-kanaan ro,* bwe Christ enaaj eñtaan.
19 “Kõn men in, kom̦win ukel̦o̦k im oktak jãn kõm̦m̦an ko ami bwe jerawiwi ko ami ren jako im bwe Jeova* en kõkajoor kom̦
20 im enaaj jilkintok Christ, eo ear kããlõte ñan kom̦, armej in ej Jesus.
21 Enaaj aikuj pãdwõt ilañ ñan ñe enaaj iien kõkããl men otemjej, ãinwõt an kar Anij ba ikijjeen ri-kanaan ro an rekkwõjarjar ilo iien ko etto.
22 Ilo m̦ool, Moses ear ba: ‘Jeova* Anij enaaj kããlõt juon ami ri-kanaan ãinwõt ña jãn ibwiljin ro jeimi im jatimi. Kom̦ij aikuj roñjake jabdewõt men ej ba ñan kom̦.
23 Jabdewõt eo ejjab roñjake ri-Kanaan in, naaj jol̦o̦ke jãn ibwiljin armej ro doon Anij.’
24 Aolep ri-kanaan ro jãn kar Samuel liktak, rar kanaan im kwal̦o̦k ilo alikkar kõn raan kein.
25 Kom̦ij ro nejin ri-kanaan ro im kom̦ij ri-jolõt ilo bujen eo Anij ear kõm̦m̦ane ippãn ro jim̦m̦ami. Ear ba ñan Ebream: ‘Ikijjeen eo nejũm̦,* baam̦le otemjej ilo lal̦ in renaaj jeraam̦m̦an.’
26 Ãlikin an kar Anij kããlõt ri-Karejar eo an, ear jilkinwaj ñan ippemi m̦oktata ñan kõjeraam̦m̦an kom̦ ilo an jipañ kajjojo iaami bwe kom̦win oktak jãn kõm̦m̦an ko ami renana.”
Footnotes
^ Kajin Grik, “awa eo kein karatimjuon.”
^ Kajin Grik, “ikijjeen lo̦ñiin aolep ri-kanaan ro.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “ineem̦.”
