Jon 18:1-40
-
Judas ej ketake Jesus (1-9)
-
Piter ej kõjerbale juon jãje (10, 11)
-
Rej bõkl̦o̦k Jesus ñan ippãn Annas (12-14)
-
Iien eo kein kajuon Piter ej kaarmejjete Jesus (15-18)
-
Jesus ej jutak im̦aan mejãn Annas (19-24)
-
Iien eo kein karuo im kajilu in an Piter kaarmejjete Jesus (25-27)
-
Jesus ej jutak im̦aan mejãn Pail̦at (28-40)
-
“Aelõñ eo aõ ejjab m̦õttan lal̦ in” (36)
-
18 Ãlikin an Jesus ba men kein, ear etal ippãn ri-kal̦oor ro an ñan juon jikin kallib ej pãd iturin Kom̦lal̦ Kidron.*
2 Judas, ri-ketak eo, ear jel̦ã kajjien jikin in kõnke ekkã an kar Jesus im ri-kal̦oor ro an itok ñane.
3 Innem Judas ear bõktok juon kumi in rũttarin̦ae im ri-waj ro an bũrij ro reutiej im Parisi ro ippãntok, im rar itok kõn kein romrom* im l̦aam̦ im kein tarin̦ae.
4 Jesus ear jel̦ã kõn aolep men ko rej pojakin wal̦o̦k ñane, innem ear wõnm̦aanl̦o̦k ñan ippãer im ba: “Wõn eo kom̦ij pukote?”
5 Rar uwaak im ba: “Jesus ri-Nazeret.” Im ear ba ñan er: “Ña e.” Judas, ri-ketak eo, ear bar jutak ijo ippãer.
6 Bõtab ke Jesus ear jiroñl̦o̦k er im ba, “Ña e,” rar kãlikl̦o̦k im okjak.
7 Innem ear bar kajjitõk ippãer im ba: “Wõn eo kom̦ij pukote?” Rar uwaak im ba: “Jesus ri-Nazeret.”
8 Im Jesus eba: “Iar ba ñan kom̦ bwe ña e. El̦aññe ña eo kom̦ij kappukote, kom̦win kõtl̦o̦k em̦m̦aan rein bwe ren etal.”
9 Ear kõm̦m̦ane men in bwe en jejjet kũtien an kar ba: “Iaan aolep ro kwaar letok ñan ña, ejjel̦o̦k juon iaaer ear jako jãn ña.”
10 Innem Saimõn Piter, eo ear wõr juon jãje ippãn, ear kadiwõjtok jãje eo an im jek lo̦jilñin ri-karejar* eo an bũrij l̦apl̦ap eo, lo̦jilñi eo ituanmoon̦. Etan ri-karejar eo in Malkõs.
11 Bõtab Jesus ear ba ñan Piter: “Kwõn likũti jãje n̦e ilo men n̦e nien. Ta ijjab aikuj idaak jãn cup* eo Jema ear letok ñan ña ke?”
12 Innem rũttarin̦ae ro im kapen in jarin tarin̦ae eo im ri-waj ro an ri-Ju ro rar jibwe* Jesus im lukwõje pein.
13 Rar bõkl̦o̦ke m̦okta ñan ippãn Annas kõnke e jemãn lio pãleen Keiapas, bũrij l̦apl̦ap eo ilo kar iiõ eo.
14 Keiapas eo ear kakapilõke ri-Ju ro bwe enaaj em̦m̦anl̦o̦k ñan er ñe juon wõt armej enaaj mej kõn aolep.
15 Ilo tõre in, Saimõn Piter im bar juon iaan ri-kal̦oor ro rar l̦oorel̦o̦k Jesus. Bũrij l̦apl̦ap eo ear jel̦ã kajjien ri-kal̦oor in, kõn men in, ear etal ippãn Jesus ñan mel̦an eo an bũrij l̦apl̦ap eo,
16 ak Piter ear jutak wõt inabõj ilo kõjãm eo.* Kõn men in, ri-kal̦oor eo me bũrij l̦apl̦ap eo ejel̦ã kajjien ear etal im kõnnaan ippãn ri-lale kõjãm eo im ear kadel̦o̦ñe Piter.
17 Jiroñ eo* ej lale kõjãm eo ear ba ñan Piter: “Kwe bar juon iaan ri-kal̦oor ran̦ an em̦m̦aan en̦ ke?” Im ear ba: “Ejjab.”
18 Ilo tõre in, ri-karejar ro im ri-waj ro rar kõjo̦e juon kijeek im jutak turin im kõmmããn̦ãn̦ kõnke el̦ap m̦õl̦o. Piter ear bar jutak iturier im kõmmããn̦ãn̦.
19 Innem bũrij eo eutiej ear kajitũkini Jesus kõn ri-kal̦oor ro an im kõn katak ko an.
20 Jesus ear uwaake im ba: “Iar kwal̦o̦k naan ñan armej ilo̦bwilej. Aolep iien iar katakin ilo im̦õn kabuñ ko im ilo tampel̦ eo, ijoko me ri-Ju ro rej kobatok ippãn doon ie, im ejjel̦o̦k men en̦ iar ba ilo ittino.
21 Etke kwõj kajitũkin eõ? Kwõn kajitũkin ro rar roñ men ko iar ba ñan er, rejel̦ã ta ko iar ba.”
22 Ãlikin an Jesus ba men kein, juon iaan ri-waj ro rej jutak ijo ear jeptake im ba: “Ta ãinden̦e am̦ uwaake bũrij n̦e eutiej ke?”
23 Jesus ear uwaake im ba: “El̦aññe elõñ men en̦ ebõd iar ba, kwõn kwal̦o̦ke. Bõtab el̦aññe ejim̦we men ko iar ba, innem etke kwaar jeptak eõ?”
24 Innem Annas ear jilkinl̦o̦ke ñan ippãn Keiapas, bũrij l̦apl̦ap eo, ak ekar loklok wõt pein Jesus.
25 Ilo tõre in, Saimõn Piter ear jutak wõt ijo im kõmmããn̦ãn̦, innem rar ba ñane: “Kwe bar juon iaan ri-kal̦oor ran̦ an l̦een̦ ke?” Bõtab ear jiroñl̦o̦k er* im ba: “Ejjab.”
26 Juon iaan ri-karejar ro an bũrij l̦apl̦ap eo im ej nukũn l̦eo Piter ear jek lo̦jilñin ear ba: “Ejjab ke kwe eo iar lo eok ilo jikin kallib eo ippãn l̦een̦?”
27 Bõtab Piter ear bar kariabe, im m̦õjin wõt an kõnnaan ak ekkũr kako.
28 Innem ke ej jibboñtata rar bõk Jesus jãn ippãn Keiapas im bõkl̦o̦ke ñan m̦weo im̦õn kom̦ja* eo. Bõtab rar jab del̦o̦ñ ilowaan m̦weo im̦õn kom̦ja eo kõnke rejjab kõn̦aan bwe ren ettoon, unin ej kõnke rekõn̦aan kõjota* ilo Kwõjkwõjin Kijoone eo.
29 Innem Pail̦at ear diwõj nabõjl̦o̦k ñan ippãer im ba: “Ta ko renana em̦m̦aan in ear kõm̦m̦ani?”
30 Rar uwaak im ba: “El̦aññe en kar jab juon ri-nana, kõm ban kar bõktok ñan ippam̦.”
31 Innem Pail̦at ear ba ñan er: “Kom̦win bõke im ekajete ekkar ñan kien ko ami.” Ak ri-Ju ro rar ba ñane: “Ejjab mãlim ñan ammim m̦an jabdewõt armej.”
32 Ear wal̦o̦k men in ñan kajejjet kũtien naan ko an Jesus ke ear kwal̦o̦k kõn wãween an naaj mej.
33 Kõn men in, Pail̦at ear bar del̦o̦ñ ilo m̦weo im̦õn im ear kũrtok Jesus im ba: “Kwe ke Kiiñ eo an ri-Ju?”
34 Jesus ear uwaak im ba: “Am̦ make kajjitõk in ke ak ro jet rar ba ñan kwe kõn ña?”
35 Pail̦at ear uwaak: “Kwõjel̦ã bwe ejjab ña juon ri-Ju. Ri-aelõñ n̦e am̦ im bũrij ran̦ reutiej rar bõktok eok ñan ippa. Ta eo kwaar kõm̦m̦ane?”
36 Jesus ear uwaak: “Aelõñ eo aõ* ejjab m̦õttan lal̦ in. El̦aññe Aelõñ eo aõ en kar m̦õttan lal̦ in, armej ro aõ renaaj kar ire bwe ren jab liaakel̦o̦k eõ ñan ri-Ju ro. Ijoke, Aelõñ eo aõ ejjab jãn lal̦ in.”
37 Innem Pail̦at eba ñane: “Em̦õj, kwe ke juon kiiñ?” Jesus ear uwaak: “Ejim̦we am̦ ba bwe ña ij juon kiiñ. Unin aõ kar l̦otak im unin aõ kar itok ñan lal̦ in ej bwe in kwal̦o̦k kõn m̦ool eo. Aolep ro rej pokake m̦ool eo, rej roñjake ainikiõ.”
38 Ak Pail̦at ear ba ñane: “Ta in m̦ool?”
Ãlikin an ba men in, ear bar diwõjl̦o̦k ñan ippãn ri-Ju ro im ba ñan er: “Ijjab lo ruõn em̦m̦aan in.
39 Ejjab men in wõt ak ekkar ñan m̦anit eo ami, ij aikuj karõl̦o̦k juon em̦m̦aan ñan kom̦ ilo iien Kwõjkwõjin Kijoone eo. Kom̦ kõn̦aan ke bwe in karõl̦o̦k ñan kom̦ Kiiñ eo an ri-Ju?”
40 Innem rar lam̦õj im ba: “Ejjab l̦õn̦e, kwõn karõl̦o̦k Barabbas!” Barabbas ear juon ri-ko̦o̦t.
Footnotes
^ Juon reba ejjel̦o̦k kobban, ej wõr wõt dãn ie ilo iien m̦õl̦o ñe ej wõt mijeljel.
^ Ak “pãle.”
^ Ak “ri-kõm̦akoko.”
^ “Cup” in ej kõkkar kõn an Anij kõtl̦o̦k an armej ro liaakel̦o̦k Jesus ñan mej meñe rar riab im ba bwe ear aikuj mej kõn an kõnono n̦ae Anij.
^ Ak “kalbuuji.”
^ Ak “jikin del̦o̦ñ eo.”
^ Jiroñ in ej juon ri-jerbal.
^ Kajin Grik, “ear kariab er.”
^ Ak “kabna.”
^ Kajin Grik, “m̦õñã.”
^ Ak “Kien eo aõ.” Lale “Aelõñ eo an Anij” ilo Kõmel̦el̦e Ko.
