Mark 5:1-43
5 Innem rar tõparl̦o̦k ijo jikin ri-Gerasa ro ilo turãjetin lom̦al̦o eo.
2 Jesus ej tol̦o̦k wõt jãn wa eo ak juon em̦m̦aan me jetõb ettoon ear mo̦k* n̦a ippãn ej itok jãn ibwiljin lõb* ko im wõnm̦aiki.
3 Em̦m̦aan in ej jokwe ibwiljin lõb ko, im aolep iien ko ear pãd ijin, ejjel̦o̦k armej ear maroñ lukwõje jekdo̦o̦n ñe rej kõjerbal jeen.
4 Elõñ alen aer kar lukwõje pein im neen kõn jeen, bõtab ej kajju tũm̦wi jeen kein. Ejjel̦o̦k juon ear maroñ kabõjrake kõn an kajoor.
5 Raan im boñ ej pãd ilo lõb ko im tol̦ ko, im ej ellam̦õjm̦õj im kakinejneje ãnbwinnin kõn dekã.
6 Ke ej reilo̦k im lo Jesus jãn ijo ettol̦o̦k, ear ettõrl̦o̦k ñan ippãn im buñpedo ñane.
7 Im ear lam̦õj im ba: “Jesus, Nejin Anij eo Eutiejtata, ta n̦e kokõn̦aan jãn ña? Ij akwel̦ap ñan eok bwe kwõn kajje kõn Anij bwe kwoban kaeñtaan eõ.”
8 Unin an ãindein ej kõnke Jesus ear ba ñane: “Jetõb ettoon, kwõn diwõjtok jãn em̦m̦aan n̦e.”
9 Innem Jesus ear kajjitõk ippãn im ba: “Etam̦?” Im ear uwaak im ba: “Eta in Jarin Tarin̦ae,* kõnke kõm lukkuun lõñ.”
10 Im el̦akkar akwel̦ap ñan Jesus bwe en jab jilkinl̦o̦k er jãn jikin eo.
11 Ilo kar tõre in, elõñ piik rej m̦õñã ilo juon tol̦.
12 Im jetõb ettoon ko rar akwel̦ap ñane im ba: “Kwõn jilkinl̦o̦k kõm ñan ilowaan piik kan̦ bwe kõmin mo̦k n̦a ippãer.”
13 Innem ear kõtl̦o̦k aer etal. Kõn men in, jetõb ettoon ko rar diwõjl̦o̦k jãn em̦m̦aan eo im etal im mo̦k n̦a ippãn piik ko, enañin 2,000 oran aolepen piik kein. Innem piik ko rar ettõr im wõtlo̦k jãn tõrerein tol̦ eo* ñan lo̦jet, im aolepeer rar mal̦oñ im mej.
14 Ro rar lale piik ko rar ko, im rar ilo̦k im kwal̦o̦k ñan armej ro ilo bukwõn eo im jikin ko ipel̦aakin. Kõn men in, armej ro rar etal bwe ren lale ta eo ear wal̦o̦k.
15 Innem armej ro rar itok ñan ippãn Jesus im rar loe em̦m̦aan eo jarin tarin̦ae* in jetõb ettoon ko rar mo̦k n̦a ippãn.* Armej ro rar jino mijak kõnke rar loe an em̦m̦aan eo jijet ijo, bõtab ej nuknuk im ejako an wũdeakeak.
16 Bareinwõt, ro rar lo ta eo ear wal̦o̦k rar kõnnaanek armej rein kõn em̦m̦aan eo im piik ko.
17 Kõn men in, rar akwel̦ap ñan Jesus bwe en etal jãn ijo jikier.
18 Im ke Jesus ear uwel̦o̦k ioon wa eo, em̦m̦aan eo jetõb ettoon ear mo̦k n̦a ippãn ear akwel̦ap in etal ippãnl̦o̦k.
19 Bõtab ear jab kõtl̦o̦k an etal ak ear ba ñane: “Kwõn jepl̦aak ñan m̦weo im̦õm̦ im ñan ippãn ro nukum̦, im kwal̦o̦k ñan er kõn aolep men ko Jeova* ear kõm̦m̦ani ñan kwe im kõn an kar tũriam̦okake eok.”
20 Innem em̦m̦aan eo ear etal ñan jikin ko ilo Dekapolis* im ear jino kwal̦o̦k kõn aolep men ko Jesus ear kõm̦m̦ani ñane, im aolep armej ro rar bwilõñ.
21 Ãlikin an Jesus jerak jãn ijo ñan turãjetin lom̦al̦o eo, juon jarlepju el̦ap ear kajju wõnm̦aiki ke ej pãdwõt iparijet.
22 Jairõs, juon iaan ro rej lale im̦õn kabuñ eo ilo jikin eo, ear itok im ke ej loe, ear bukwelõlõ ñane.
23 Im elõñ alen an akwel̦ap im ba: “Ledik en̦ nejũ elukkuun do̦o̦lol.* Kwõn jouj im itok im likũt peim̦ ioon bwe en maroñ mour.”
24 Innem Jesus ear etal ippãnl̦o̦k, im juon jarlepju el̦ap ear l̦oorel̦o̦k im el̦ap aer ko̦baje.
25 Ak kiiõ ewõr juon kõrã ijo ear to̦o̦rl̦o̦k kõn bõtõktõk ium̦win 12 iiõ.
26 El̦ap an kar eñtaan ippãn taktõ ro ear etal ippãer, im ear kõjerbale aolepen jããn ko an bwe en pukot kilen an mour. Bõtab, ear jab mour jãn nañinmej eo an, ak ear nanal̦o̦k wõt.
27 Kõrã in ear roñ kõn men ko armej ro rar ba kõn Jesus. Kõn men in, ear etal ibul̦õn armej ro l̦o̦k im pãd ilikin im uñũri nuknuk eo an,
28 kõnke el̦akkar ba ilo bũruon im ba: “Ñe inaaj uñũri wõt nuknuk en̦ an, inaaj mour.”
29 Innem ear kajju bõjrak an to̦o̦rl̦o̦k, im ear eñjake an mour jãn nañinmej eo an.
30 Im em̦õkaj an Jesus kile an kajoor diwõjl̦o̦k jãne, innem ej oktak likl̦o̦k ñan ippãn armej ro im ba: “Wõn ear uñũr nuknuk e aõ?”
31 Ak ri-kal̦oor ro an rej uwaake im ba: “Etke kwõj kajjitõk im ba, ‘Wõn ear uñũr eõ?’ ke kwõj lo wõt an armej rein ko̦baj eok?”
32 Bõtab ear reito reitak im pukot wõn eo ear uñũri.
33 Kõrã eo ear jel̦ã bwe emour jãn nañinmej eo an. Innem ej mijak im wũdiddid wõt ak ej jãdel̦o̦k im bukwelõlõ im̦aan Jesus im kwal̦o̦k aolep men ñane.
34 Im Jesus ear ba ñane: “Nejũ, am̦ tõmak ear kõmour eok. Kwõn ilo̦k ilo aenõm̦m̦an, em̦õj am̦ mour jãn nañinmej eo am̦.”
35 Ke ej kõnono wõt, jet em̦m̦aan jãn m̦weo im̦õn Jairõs rar itok im ba: “Em̦õj an mej ledik eo nejũm̦! Ebwe n̦e am̦ kaabn̦õn̦õik ri-Kaki n̦e.”
36 Bõtab Jesus ear roñ ta ko rej ba im ear ba ñan Jairõs: “Kwõn jab inepata, kwõn kwal̦o̦k wõt am̦ tõmak.”
37 Im Jesus ear jab kõtl̦o̦k an jabdewõt ilo̦k ippãnl̦o̦k ijello̦kun wõt Piter, im jemjein jemjati ro ruo etaer, Jemes im Jon.
38 Innem ke rar tõparl̦o̦k m̦weo im̦õn Jairõs, ear loe an armej ro kõm̦m̦an iruj im aer ekkeilo̦k im jañ.
39 Ke ej del̦o̦ñl̦o̦k ear ba ñan er: “Etke kom̦ij jañ im kõm̦m̦an iruj? Ejjab mej ledik en̦, ak ej kiki.”
40 Innem armej ro rar jino kajjirere kake e. Bõtab ãlikin an kadiwõjl̦o̦k er, ear bõk jemãn im jinen ledik eo im ri-kal̦oor ro ippãnl̦o̦k ñan ijo ledik eo ej pãd ie.
41 Im ear jibwe pein ledik eo im ba: “Talita kumi,” mel̦el̦ein naan kein ñe jej ukoti ej, “Ledik en̦, ij jiroñ eok, kwõn jerkak!”
42 Im em̦õkaj an ledik eo jerkak im jino etetal. (12 an ledik eo iiõ.) Ke jemãn im jinen rej loe men in, rar lukkuun bwilõñ, im ear l̦ap aer m̦õn̦õn̦õ.
43 Ak elõñ alen an* jiroñ er bwe ren jab kõnnaanek jabdewõt kõn men in. Innem ear ba bwe ren lel̦o̦k kijen ledik eo bwe en m̦õñã.
Footnotes
^ Ak “del̦o̦ñ.”
^ Kajin Grik, “libõn keememej.”
^ Kajin Grik, “Legion.” Ilo iien ko etto ilo jarin tarin̦ae eo an aelõñin Rom, juon legion ej tarrin 4,000 l̦o̦k ñan 6,000 rũttarin̦ae. Ilo Baibõl̦, naan in legion ej kõnono kõn juon joñan eo ekanooj l̦ap.
^ Ak “jirũm̦le eo ilo tol̦ eo.”
^ Naan eo ilo kajin Grik ej dai·mo·niʹzo·mai, ej jitõñl̦o̦k ñan eo emo̦k enjel̦ ro renana n̦a ippãn.
^ Lale “Jeova” ilo Kõmel̦el̦e Ko.
^ Ak “Jikin ko Joñoul.”
^ Ak “epaak an jako.”
^ Ak “ear lukkuun.”
