Matu 13:1-58
-
ANJOÑAK KO KÕN AELÕÑ EO (1-52)
-
Eo ej jeor ine (1-9)
-
Unin Jesus ear kõjerbal waanjoñak ko (10-17)
-
Kõmel̦el̦e in waanjoñak eo kõn eo ej jeor ine (18-23)
-
Wiit ko im mar ko (24-30)
-
Ineen mustard eo im iij eo (31-33)
-
An kõjerbal waanjoñak ko rej kajejjet kũtien kanaan ko (34, 35)
-
Kõmel̦el̦e in waanjoñak eo kõn wiit im mar ko (36-43)
-
Juon m̦weiuk eaorõk kar n̦ooje im pearl eo em̦m̦an (44-46)
-
Ok in eo̦ñõd (47-50)
-
M̦weiuk ko rekããl im ko eto aer pãd (51, 52)
-
-
Aer kõjekdo̦o̦n Jesus ilo kapijukunen (53-58)
13 Ilo raan eo, Jesus ear etal jãn m̦weo im ear ilo̦k im jijet iturin lo̦jet.
2 Juon jarlepju el̦ap ear itok ñan ippãn, innem ear uwel̦o̦k ioon juon wa im jijet im wõnmetol̦o̦k jidik, im aolepen jarlepju in armej ro rar jutak iparijet.
3 Innem ear katakin er elõñ men ko ikijjeen an kar kõjerbal waanjoñak ko. Ear ba: “Ewõr juon ri-kallib ear ilo̦k im jeor ine.
4 Ke ear jeor ine, jet ine rar wõtlo̦k itõrerein ial̦ eo im bao ko imejatoto rar kãtem kañi.
5 Ine ko jet rar wõtlo̦k ilo ijo edekãke im edik bwidej eo ie, im ear m̦õkaj aer eddek kõn an mãni bwidej eo.
6 Bõtab kõn an kajoor an det rar aemedl̦o̦k, im kõn an ejjel̦o̦k okraer rar mej.
7 Im ine ko jet rar wõtlo̦k ibwiljin mar kãlõklõk ko. Im ke kãlõklõk ko rar eddekl̦o̦k rar kapañ aer eddek.
8 Im bar jet ine rar wõtlo̦k ioon bwidej eo em̦m̦an, im rar jino kalle. Jet kar 100 alen an kar l̦apl̦o̦k aer kalle, im jet 60, im ko jet 30.
9 Eo ewõr lo̦jilñin, en roñjake.”
10 Innem ri-kal̦oor ro an rar itok ñan ippãn im ba: “Etke kwõj kõjerbal waanjoñak ilo am̦ kõnnaan ñan er?”
11 Im ear uwaak im ba: “Em̦õj kõtl̦o̦k bwe kom̦win mel̦el̦e kõn men ko rettino im rekkwõjarjar an Aelõñin lañ,* bõtab kar jab kõtl̦o̦k men in ñan armej rein.
12 Innem jabdewõt eo emel̦el̦e, naaj kõm̦m̦an bwe en l̦apl̦o̦k wõt an mel̦el̦e, im tokãlik enaaj jel̦ã kõn aolep men. Bõtab, jabdewõt eo ejjab mel̦el̦e, meñe jidik wõt jel̦ã ippãn ak enaaj jako jãne.
13 Armej rein rej reito reitak ak ejjel̦o̦k tokjãn aer reito reitak, rej roñjake ak ejjel̦o̦k tokjãn aer roñjake, im rejjab mel̦el̦e ñan jidik. Eñin unin ñe ij kõnono ñan er, ij kõjerbal waanjoñak ko.
14 Wãween in ej wal̦o̦k ñan er ej kajejjet kanaan eo Aiseia ear kwal̦o̦ke, ke ear ba: ‘Kom̦ naaj roñ ak kom̦ ban mel̦el̦e ñan jidik, kom̦ naaj reito reitak bõtab ejjel̦o̦k men en̦ kom̦ naaj loe ñan jidik.
15 Epen bũruon armej rein. Rej roñ kõn lo̦jilñier ak rejjab l̦oori, im em̦õj aer kiil mejãer bwe ren jab lo jabdewõt men kõn mejãer im roñ kõn lo̦jilñier im mel̦el̦e kõn bũrueer im oktaktok ñan ña bwe in kõmour er.’
16 “Bõtab kom̦, kom̦ij m̦õn̦õn̦õ kõnke kom̦ij lo men kein kõn mejãmi im roñ kõn lo̦jilñũmi.
17 Ij ba ñan kom̦ bwe elõñ ri-kanaan ro im armej ro rewãnõk rar kõn̦aan loi men kein kom̦ij loi ak rar jab maroñ, im rar kõn̦aan roñ kõn men kein kom̦ij roñ kaki ak rar jab maroñ.
18 “Kiiõ kom̦win roñjake mel̦el̦ein waanjoñak eo kõn em̦m̦aan eo ear jeor ine.
19 Ine ko rar wõtlo̦k itõrerein ial̦ eo rej jitõñl̦o̦k ñan jabdewõt eo ej roñ kõn ennaan eo kõn Aelõñ eo,* bõtab ejjab mel̦el̦e kake. Innem ri-nana eo ej itok im julo̦k men ko kar likũt ilo bũruon.
20 Ine ko rar wõtlo̦k ilo ijo edekãke rej jitõñl̦o̦k ñan jabdewõt eo ej roñ ennaan eo im em̦õkaj an tõmak im m̦õn̦õn̦õ kake.
21 Bõtab jidik wõt iien an tõmak kõnke ine eo ear jab eddek ilo bũruon. Innem ke ear iioon eñtaan ak jum̦ae kõn wõt naan eo, em̦õkaj an ebbeer.
22 Ine ko rar wõtlo̦k ibwiljin mar kãlõklõk ko rej jitõñl̦o̦k ñan jabdewõt eo ej roñjake ennaan eo, bõtab inepata ko an jukjukun pãd in* im aujiid eo kõn m̦weiuk rej kapañ ennaan eo bwe en jab kalle.
23 Ine ko rar wõtlo̦k ilo bwidej eo em̦m̦an rej jitõñl̦o̦k ñan jabdewõt eo ej roñjake ennaan eo im mel̦el̦e kake. Ine kein rar eddekl̦o̦k im lõñ leer. Jet rar kalle 100, jet 60, im ko jet 30.”
24 Innem ear bar kwal̦o̦k juon waanjoñak ñan er ke ear ba: “Aelõñin lañ ej ãinwõt juon em̦m̦aan me ear kalibwin ine ko rem̦m̦an ilo mel̦aaj eo an.
25 Ke armej ro rar kiki, eo ej kõjdate em̦m̦aan eo ear itok im ekkat mar* ibul̦õn wiit ko im etal.
26 Ke wiit ko rar eddekl̦o̦k im wõr leer, mar ko rar bareinwõt wal̦o̦k.
27 Innem ri-karejar* ro an em̦m̦aan eo rar itok im kajjitõk ippãn im ba, ‘Irooj, kwaar jab kallib ine em̦m̦an ilo mel̦aaj en̦ am̦ ke? Mar kan̦ rej itok jãn ia?’
28 Ear uwaake er im ba, ‘Eo ej kõjdate eõ ear kõm̦m̦ane men in.’ Im reba ñane, ‘Em̦õj kokõn̦aan ke bwe kõmin etal im tũm̦wi?’
29 Im eba, ‘Ejjab, ikkõl ñe kom̦ tũm̦wi mar kan̦ im ebar tũm̦ wiit kan̦ ippãer.
30 Kom̦win kõtl̦o̦k bwe ren eddek ippãn doon m̦ae iien m̦adm̦õd. Ñe enaaj jejjet iien m̦adm̦õd, inaaj ba ñan ri-m̦adm̦õd ro: Kom̦win tũm̦wi m̦okta mar kan̦ im lukwõji ippãn doon im tũli. Ãlikin, kom̦win aini wiit kan̦ im bõkl̦o̦k ñan im̦õn kakkon̦ en̦ aõ.’”
31 Ear kwal̦o̦k bar juon waanjoñak ñan er im ba: “Aelõñin lañ ej ãinwõt juon ineen mustard* me juon em̦m̦aan ear kalibwini ilo mel̦aaj eo an.
32 Ine in ediktata iaan aolep ine. Bõtab, ñe ej eddekl̦o̦k ekilep jãn keinikkan otemjej ilo juon jikin kallib. Ej erom juon wõjke, im bao in mejatoto ko rej kãtem pãd ilo ra ko raan.”
33 Ear kwal̦o̦k bar juon waanjoñak im ba: “Aelõñin lañ ej ãinwõt iij. Juon kõrã ej bõke iij eo im iiõke ippãn jilu joñak in pilawã* im euwe aolepen pilawã eo.”
34 Jesus ear kwal̦o̦k aolep men kein ñan jarlepju in armej ro ilo an kõjerbal waanjoñak ko. Aolep iien ear kõjerbal waanjoñak ñe ej kõnnaan ñan armej ro,
35 bwe en jejjet men eo ri-kanaan eo ear ba: “Inaaj kõjerbal waanjoñak ko ñe ij katakin armej. Inaaj kwal̦o̦k men ko rar n̦ojak jãn jinoin.”*
36 Innem ãlikin an kar jilkinl̦o̦k armej ro, ear etal ñan juon em̦. Im ri-kal̦oor ro an rar itok ñan ippãn im ba: “Kwõn kõmel̦el̦eik kõm ta mel̦el̦ein waanjoñak eo kõn mar ko ilo mel̦aaj eo.”
37 Ear uwaake er im ba: “Eo ear kalibwini ine ko rem̦m̦an ej jitõñl̦o̦k ñan Nejin armej,*
38 im mel̦aaj eo ej jitõñl̦o̦k ñan lal̦ in. Ine ko rem̦m̦an rej jitõñl̦o̦k ñan ro nejin Aelõñ eo, im mar ko rej jitõñl̦o̦k ñan ro nejin ri-nana eo.
39 Ri-kõjdat eo me ear kalibwini mar ko ej jitõñl̦o̦k ñan Tepil̦ eo. Iien m̦adm̦õd eo ej jitõñl̦o̦k ñan jem̦l̦o̦kin jukjukun pãd* in. Im ri-m̦adm̦õd ro ej jitõñl̦o̦k ñan enjel̦ ro.
40 Innem ãinwõt aer kar tũm̦wi mar ko im tũli, enaaj ãindein an men in wal̦o̦k ilo jem̦l̦o̦kin jukjukun pãd* in.
41 Nejin armej enaaj jilkintok enjel̦ ro an, im renaaj jol̦o̦k jãn Aelõñ eo an aolep armej ro rej kõm̦m̦an an ro jet jerawiwi im ro rej kõm̦m̦ani men ko renana.
42 Renaaj jol̦o̦k er ilo kijeek, ijo renaaj jañ im kij dekein ñier ie.
43 Im ilo naaj iien en̦, ro rewãnõk renaaj romaak ãinwõt meramin al̦ ilo Aelõñ eo an Jemãer. Eo ewõr lo̦jilñin, en roñjake.
44 “Aelõñin lañ ej ãinwõt juon m̦weiuk eaorõk kar n̦ooje ilo juon mel̦aaj. Juon em̦m̦aan ear loe im bar n̦ooje. Joñan an m̦õn̦õn̦õ ear etal im wiakake aolep men ko m̦weien bwe en maroñ wiaiki mel̦aaj eo.
45 “Bareinwõt, Aelõñin lañ ej ãinwõt juon ri-wia ej itoitak im kappok pearl ko rem̦m̦an.
46 Ke ear lo juon pearl el̦ap on̦ããn, ear m̦õkaj in ro̦o̦l im wiakake aolep men ko m̦weien bwe en wiaiki pearl eo.
47 “Aelõñin lañ ej ãinwõt juon ok in eo̦ñõd rar doorlal̦l̦o̦k ilo̦jet im eko̦jek jabdewõt kain ek.
48 Ke ear obrak ok eo, rar kanõk ãnel̦o̦k ñan parijet. Innem rar jijet im kõjenolo̦k ek ko rem̦m̦an im kanni iep ko aer kaki, bõtab rar julo̦k ek ko renana.
49 Enaaj ãindein ilo naaj jem̦l̦o̦kin jukjukun pãd* in. Enjel̦ ro renaaj itok im kõjenolo̦k ro renana jãn ibwiljin ro rewãnõk,
50 im renaaj jol̦o̦k ro renana ilo kijeek. Eñin ej ijo renaaj jañ im kij dekein ñier ie.
51 Innem Jesus ear kajjitõk ippãer im ba: “Kom̦ mel̦el̦e ke kõn aolep men kein?” Rar uwaake im ba: “Aet.”
52 Im ear ba ñan er: “Kõn ami mel̦el̦e kõn men kein, kom̦ij aikuj bar jel̦ã men in: Jabdewõt eo ej katakin ro jet, ñe ej ekkatak kõn Aelõñin lañ, ej ãinwõt juon em̦m̦aan eo ej bõran juon baam̦le. Em̦m̦aan in ej kadiwõjtok elõñ men ko jãn im̦õn kakkon̦ m̦weiuk eo an, men ko rekããl im men ko eto aer pãd.”
53 Ãlikin an Jesus kwal̦o̦k waanjoñak kein, ear ilo̦k jãn ijo.
54 Ke ear tõparl̦o̦k bukwõn eo an, ear jino katakin armej ro ilo im̦õn kabuñ eo aer. Rar kanooj bwilõñ, im rar ba: “L̦ein ear bõk jãn ia an mãlõtlõt? Im etke emaroñ in kõm̦m̦ani menin bwilõñ kein?
55 Ejjab l̦eo nejin kaam̦tõ eo in ke? Ejjab ke etan jinen in Meri, im etan l̦õm̦aro jatin ej Jemes, Josep, Saimõn im Judas?
56 Lim̦aro jatin rej jokwe ippãd ilo bukwõn in, ejjab ke? El̦aññe ãindein, ej mãlõtlõt tok jãn ia im ear bõk jãn ia an maroñ ñan kõm̦m̦an menin bwilõñ?”
57 Kõn men in, rar jab kõn̦aan tõmake. Ak Jesus ear ba ñan er: “Aolep iien armej rej kautiej juon ri-kanaan. Bõtab ro ilo bukwõn eo an im ro ilo m̦weo im̦õn rejjab kautieje.”
58 Im kõn an ejjel̦o̦k aer tõmak, ear jab kõm̦m̦an elõñ menin bwilõñ ilo bukwõn eo.
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “Kien eo.” Lale “Aelõñ eo an Anij” ilo Kõmel̦el̦e Ko.
^ Ak “mour in.” Lale “Jukjukun pãd” ilo Kõmel̦el̦e Ko.
^ Juon kain mar me eitõn ãinwõt wiit ak ebaijin.
^ Ak “ri-kõm̦akoko.”
^ Ak “juon ine jidikdik.” Juon ine ilo Israel. Ine in emaroñ eddekl̦o̦k im erom juon wõjke 15 ne aetokan.
^ Joñak kein 3 rej tarrin 20 bo̦unin pilawã.
^ Ak emaroñ, “jãn jinoin lal̦.”
^ Lale “Nejin armej” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
