Matu 20:1-34
20 Aelõñin lañ* ej ãinwõt juon em̦m̦aan ewõr juon an jikin kallib kũreep. Ke ej jibboñtata, ear ilo̦k im kappok an ri-jerbal ñan jikin kallib kũreep eo an.
2 Ãlikin an kõm̦m̦an kon̦ ippãn ri-jerbal ro bwe enaaj kõl̦l̦ãik er kõn juon denariõs* ilo juon raan, ear jilkinl̦o̦k er ñan jikin kallib kũreep eo an.
3 Ke ej 9 awa jim̦a ilo jibboñ,* em̦m̦aan eo ear bar ilo̦k, im ear lo jet em̦m̦aan ejjel̦o̦k aer jerbal rej jutak ilo juon jikin wia,
4 im eba ñan er, ‘Kom̦win bareinwõt ilo̦k ñan jikin kallib kũreep en̦, innem inaaj kõl̦l̦ãik kom̦ kõn juon on̦ããn em̦m̦an.’
5 Im l̦õm̦aro rar ilo̦k. Em̦m̦aan eo ear kõm̦m̦ane ejja wãween eo wõt ke ej 12 awa jim̦a* im bareinwõt ke ej 3 awa jim̦a ãlikin raelep.*
6 Ãliktata, ke ej 5 awa jim̦a ilo jota, em̦m̦aan eo ear ilo̦k im lo jet em̦m̦aan rej pãd bajjek. Innem ear kajjitõk ippãer im ba, ‘Etke kom̦ l̦akkar pãd bajjek aolepen rainin ak kom̦ij jab jerbal?’
7 Im rar uwaak im ba, ‘Kõnke ejjel̦o̦k en̦ ej kõjerbal kõm.’ Im eba, ‘Kom̦win bareinwõt ilo̦k ñan jikin kallib kũreep en̦.’
8 “Ke ej jotal̦o̦k, em̦m̦aan eo an jikin kallib kũreep eo ear ba ñan ri-jerbal eo ej bõk eddon jikin kallib eo im ba, ‘Kwõn kũrtok ri-jerbal ro im kõl̦l̦ãik er. M̦okta kwõn kõl̦l̦ãik ro rar itok im jerbal ãliktata, im kõjjem̦l̦o̦k ippãn ro rar itok im jerbal m̦oktata.’
9 Ke ear jãdetok em̦m̦aan ro me rar itok im jerbal in 5 awa jota,* ear kõl̦l̦ãik kajjojo iaaer kõn juon denariõs.*
10 Innem ke ri-jerbal ro m̦oktata rar itok, rar l̦õmn̦ak bwe enaaj l̦apl̦o̦k on̦ãer, bõtab ear bar kõl̦l̦ãik kajjojo iaaer kõn juon denariõs.*
11 Ãlikin aer bõk kõl̦l̦ã ko aer, rar jino kõnono n̦ae em̦m̦aan eo an jikin kallib eo.
12 Im rar ba ñane, ‘Juon wõt awa in an kar ri-jerbal rein ãliktata jerbal, ak kwaar kõm̦m̦an bwe en joñan wõt juon on̦ãer ippemmim meñe kõmar jerbal aolepen rainin ium̦win det!’
13 Bõtab ear uwaake juon iaaer im ba, ‘Jera, ejjel̦o̦k men en̦ enana iar kõm̦m̦ane ñan kwe. Em̦õj am̦ kar errã bwe on̦ãm̦ enaaj juon denariõs,* kwõjjab keememej ke?
14 Kwõn bõk men n̦e on̦ããm̦ im ilo̦k. Ikõn̦aan kõl̦l̦ãik ri-jerbal rein ãliktata kõn ejja joñan eo wõt ij kõl̦l̦ãik eok kake.
15 Ta ejjab mãlim aõ kõm̦m̦ane men ko ikõn̦aan kõn jããn ko aõ make ke? Ke ta, kwõj ebbanban kõnke iar kwal̦o̦k jouj ñan er?’
16 Ilo ejja wãween in wõt, ro rej pãd ãliktata renaaj oktak im pãd m̦oktata, im ro rej pãd m̦oktata renaaj oktak im pãd ãliktata.”
17 Ke Jesus im ri-kal̦oor ro 12 rar etal ñan Jerusalem, ear bõk ri-kal̦oor ro jãn ibwiljin armej ro jet im ear ba ñan er:
18 “Jej ilo̦k ñan Jerusalem im armej ro renaaj lel̦o̦k Nejin armej* ñan bũrij ro reutiej im skraib ro, im renaaj liaakel̦o̦ke ñan mej.
19 Bareinwõt renaaj liaakel̦o̦ke ñan armej in aelõñ ko bwe ren kõm̦m̦an kõjak kake im deñl̦o̦ke im m̦ane ilo aer dilaiki ilo jurõn al̦al̦. Bõtab ilo raan en̦ kein kajilu, enaaj bar mour.”
20 Innem kõrã eo pãleen Zebedi kab l̦õm̦aro ruo nejin rar itok ñan ippãn Jesus, im kõrã eo ear kwal̦o̦k kautiej* ñane kõnke ewõr juon men ekõn̦aan kajjitõk kake.
21 Im Jesus ear ba ñane: “Ewõr ta kokõn̦aan?” Im kõrã eo ear ba: “Ikõn̦aan bwe l̦õm̦arein nejũ ren kab jijet iturum̦ ilo Aelõñ eo am̦,* juon ituanbwijmaroñin peim̦ im eo juon ituanmiiñ.”
22 Jesus ear jiroñ l̦õm̦aro im ba: “Komiro ejjab mel̦el̦e kõn men eo komiro ej kajjitõk kake. Komiro maroñ ke idaak jãn cup* eo ij itõn idaak jãne?” Erro ar uwaak im ba: “Aet, kõm̦ro maroñ.”
23 Innem ear ba: “M̦ool bwe komiro naaj idaak jãn cup eo aõ. Bõtab, ejjel̦o̦k aõ maroñ ñan kããlõt wõn ro renaaj jijet ituanbwijmaroñin peiũ im ituanmiiñũ kõnke jikin kein rej an ro em̦õj an Jema kõpooji ñan er.”
24 Ke rijjilõk ro joñoul rar roñ kõn men in, rar illu ippãn jemjein jemjati rein ruo.
25 Bõtab Jesus ear kũrtok er im ba: “Kom̦ jel̦ã bwe ri-tõl ro an aelõñ ko rej tõl armej ekkar ñan kõn̦aan ko aer, im enana an ri-utiej ro kõm̦m̦an ñan armej ro rej pãd ium̦win maroñ ko aer.
26 Bõtab kom̦win jab ãinwõt er. El̦aññe jabdewõt iaami ekõn̦aan bwe en utiej, ej aikuj ri-jerbal ñan kom̦.
27 Im el̦aññe jabdewõt iaami ekõn̦aan bwe en m̦oktata, ej aikuj jerbal ñan kom̦ ãinwõt juon ri-karejar.*
28 Ãindein Nejin armej, ear jab itok bwe ro jet ren jerbal ñane, ak ear itok bwe en jerbal ñan er. Bareinwõt, ear itok bwe en kõl̦l̦ã kõn mour eo an ñan lo̦mo̦o̦ren elõñ armej.”
29 Ke rar ilo̦k jãn Jeriko, juon jarlepju el̦ap ear l̦oore.
30 Ruo em̦m̦aan repilo rej jijet iturin ial̦ eo rar roñ bwe Jesus ej itok ilo ial̦ eo tok. Innem rar kũri im ba: “Irooj, Nejin Devid,* kwõn tũriam̦okake kõm̦ro!”
31 Bõtab armej ro rar luuki erro im ba bwe ren jab keroro, ak erro ar kal̦apl̦o̦k wõt ainikierro im ba: “Irooj, Nejin Devid, kwõn tũriam̦okake kõm̦ro!”
32 Kõn men in, Jesus ear bõjrak im kũrtok erro im ba: “Ewõr ta imaroñ kõm̦m̦ane ñan komiro?”
33 Im erro ba: “Irooj, kwõn kõm̦m̦an bwe kõm̦ro en bar lol̦o̦kjen̦.”
34 Kõn an Jesus tũriam̦okake erro, ear uñũri mejãerro, im ilo iien eo wõt, erro ar bar lol̦o̦kjen̦. Innem erro ar l̦oore.
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Jããn jelba in Rom. Lale “Denariõs” ilo Kõmel̦el̦e Ko.
^ Kajin Grik, “enañin awa eo kein kajilu.”
^ Kajin Grik, “enañin awa eo kein kajiljino.”
^ Kajin Grik, “awa eo kein karatimjuon.”
^ Kajin Grik, “ilo awa eo kein kajoñoul juon.”
^ Jããn jelba in Rom. Lale “Denariõs” ilo Kõmel̦el̦e Ko.
^ Jããn jelba in Rom. Lale “Denariõs” ilo Kõmel̦el̦e Ko.
^ Jããn jelba in Rom. Lale “Denariõs” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Ak “buñpedo.”
^ Ak “Kien eo am̦.” Lale “Aelõñ eo an Anij” ilo Kõmel̦el̦e Ko.
^ “Cup” in ej kõkkar kõn an Anij kõtl̦o̦k an armej ro liaakel̦o̦k Jesus ñan mej meñe rar riab im ba bwe ear aikuj mej kõn an kõnono n̦ae Anij.
^ Ak “ri-kõm̦akoko.”
^ Lale “Nejin Devid” ilo Kõmel̦el̦e Ko.
