Em̦õj ke an juon ba ñan kwe kõn juon men me ejjel̦o̦k en̦ ejel̦ã kake?— * (Lale kõmel̦el̦e eo itulal̦.) Baibõl̦ ej kwal̦o̦k kõn juon men eaorõk jãn Anij ak armej rar jab jel̦ã kake kõnke ej juon ‘men ettino.’ Enjel̦ ro rar bar kõn̦aan kal̦apl̦o̦k aer jel̦ã kõn men in. Kokõn̦aan ke jel̦ã ta eo ettino?—

Etto im etto, Anij ear kõm̦anm̦an em̦m̦aan im kõrã eo m̦oktata. Etaer in Adam im Iv. Anij ear lel̦o̦k juon jikierro elukkuun aiboojoj. Etan? Ej jikin kallib in Iden. Ñe Adam im Iv ren kar pokake Anij, erro im ajri ro nejierro ren kar kõm̦m̦an bwe lal̦ in en lukkuun em̦m̦an im aiboojoj ãinwõt kar jikin kallib in Iden. Im ren kar bar mour ñan indeeo ie. Ta eo Adam im Iv rar kõm̦m̦ane?—

Adam im Iv rar jab pokake Anij. Eñin unin lal̦ in ejjab em̦m̦an im aiboojoj kiiõ. Ak Anij ear ba enaaj kõm̦m̦an bwe aolepen lal̦ in en lukkuun aiboojoj. Im aolep armej renaaj mour ñan indeeo im m̦õn̦õn̦õ ie. Ta eo Anij enãj kõm̦m̦ane? Eokwe, jãn jem̦aan in an armej ñak kõn men in. Etke? Kõnke ear juon men ettino.

Ke Jijej ear itok ñan lal̦ in, ear katakin armej kõn men eo ettino bwe ren lukkuun jel̦ã kake. Ear ba bwe men eo ettino ej kõn Kien ak Aelõñ eo an Anij. Im ear ba ren jar kake bwe en itok kõnke Kien in enaaj kõm̦m̦an bwe aolep jikin ilo lal̦ in en lukkuun aiboojoj.

Kokõn̦aan ke jel̦ã ta eo ettino me Baibõl̦ ej ba?— Keememej bwe armej ro wõt rej pokake Jeova renaaj mour ilo lal̦ in ñe Anij enaaj kõm̦m̦an bwe en aiboojoj ak erom Pedetaij. Baibõl̦ ej kwal̦o̦k bwijin bwebwenato ko kõn em̦m̦aan im kõrã ro me rar pokake Jeova. Kokõn̦aan ke katak kõn armej ro rar pokake Jeova?— Eokwe, jen lale wõn rein im elemen bwe jen ãinwõt er.