KŨRJIN ro jinoin rar lukkuun kate er ñan tõpar elõñ armej joñan wõt aer maroñ bwe ren kwal̦o̦k kõn ‘naan eo em̦m̦an kõn Aelõñ eo.’ (Matu 24:14, UBS) Joñan, jet rar etal ñan aelõñ ko jet. Ñan waanjoñak, rijjilõk Paul ear etal ñan ijo me ilo raan kein aelõñin Turkey ej pãd ie, im kwal̦o̦k naan ilo aolep bukwõn ko ijin ilo tõre eo ear itoitak im mijinede. * (Lale kõmel̦el̦e eo itulal̦.) Elõñl̦o̦k jãn 2,000 iiõ ko tokãlik ilo iiõ eo 2014, kar kõm̦m̦ane juon iien ejejuwaan im leto letak bok ko ilo aelõñin Turkey. Etke kar karõk bwe en wõr juon iien ñan leto letak bok ilo jikin in? Wõn ro rar bõk kun̦aaer ilo jerbal in?

Elõñl̦o̦k jãn 2,800 rukwal̦o̦k naan ilo Turkey, ak oran armej ro ilo aelõñ in ej 79 milien. Mel̦el̦ein men in bwe ewõr juon wõt rukwal̦o̦k naan jãn kajjojo kumi in armej ro ilo Turkey me 28,000 uwaaer. Innem ealikkar bwe rukwal̦o̦k naan ro ilo ijin rar maroñ tõpar jejjo wõt armej ilo jikin in. Unleplepin kar kõm̦m̦ane juon iien ejejuwaan ñan kwal̦o̦k naan im leto letak bok, ej bwe ro jeid im jatid ren maroñ tõpar elõñl̦o̦k armej joñan wõt aer maroñ. Enañin 550 em̦m̦aan im kõrã ro jeid im jatid jãn aelõñ ko jet me rej kõnono kajin Turkey, rar etal ñan Turkey im kwal̦o̦k naan ippãn rein jeid im jatid ilo iien eo rar leto letak bok. Ta tõprak ko rar loi?

Rar tõpar elõñl̦o̦k armej. Juon eklejia ilo Istanbul ear je im ba: “Ke armej ro rar loe kõm, rar kajjitõk: ‘Ewõr ami kweilo̦k el̦ap ijin ke? Kõmij loe Ri Kõnnaan ro an Jeova aolep jikin!’” Bar juon eklejia ilo jikin eo etan Izmir ear je: “Juon em̦m̦aan me ej jerbal ilo jikin eo me taxi ko rej baak ie, ear kepaake juon jeid im jatid em̦m̦aan ej lale eklejia im kajjitõk, ‘Ta in kom̦ij kõm̦m̦ane? Em̦õj ami kal̦apl̦o̦k iien ami kwal̦o̦k naan ke?’” Alikkar bwe elõñ armej rar kile jerbal in.

Ro rar itok jãn aelõñ ko jet im jipañ rar lukkuun m̦õn̦õn̦õ ilo aer kar jerbalin kwal̦o̦k naan. Steffen jãn Denmark, ear ba: “Iar maroñ kwal̦o̦k naan aolep raan ñan armej ro rejjañin kar roñ kõn Jeova. Im iar m̦õn̦õn̦õ kõnke iar kile bwe ij jipañ elõñ armej bwe ren jel̦ã kõn ãt eo etan Jeova.” Jean-David jãn France ear je im ba: “Kõmar kwal̦o̦k naan ilo m̦õko rej pãd itõrerein juon ial̦ ium̦win elõñ awa im elukkuun kar em̦m̦an! Elõñ armej rar jab jel̦ã kõn Ri Kõnnaan ro an Jeova. Enañin aolep m̦õko kõmar kwal̦o̦k naan ie, kõmar maroñ jino bwebwenato ippãn armej ro, kwal̦o̦k juon iaan pija in alwõj ko ad ñan er, im lel̦o̦k aer bokin riit.”

 Rein 550 me rar jipañ ilo jerbal in, rar lel̦o̦k enañin 60,000 bok ko ium̦win ruo wõt wiik! Alikkar bwe iien leto letak bok in ear kõm̦m̦an bwe en lõñl̦o̦k armej ro rar tõpar er.

Ear l̦apl̦o̦k aer kijejeto ilo kwal̦o̦k naan. Jerbal in ejejuwaan ear l̦ap an jelõt ro jeid im jatid ijin. Elõñ rar jino l̦õmn̦ak in kal̦apl̦o̦k ijo kun̦aaer ilo jerbalin kwal̦o̦k naan. Ilo m̦ool, oran rekũl̦ar bainier ro ilo Turkey ear l̦apl̦o̦k kõn 24 bõjjããn ium̦win kar 12 allõñ ãlikin kar kõm̦m̦ane jerbal eo ejejuwaan.

Ro rar itok jãn aelõñ ko jet bwe ren jipañ, rar kwal̦o̦k ewi wãween an kar jerbal in jipañ er ke rar ro̦o̦l im kwal̦o̦k naan ijoko jikier. Juon jeid im jatid kõrã jãn Germany, etan Şirin, ear je: “Ear em̦m̦an im pidodo an ro jeid im jatid ilo Turkey kwal̦o̦k naan ilo iien em̦m̦antok. Ikõn jook im mijak ñe ij kwal̦o̦k naan ilo iien rot kein. Ak el̦ap aõ kam̦m̦oolol bwe kõn wõt kar iien jerbal eo ejejuwaan, joñak ko an ro jeid im jatid ilo Turkey, im ikijjeen aõ kar jar, iar maroñ kõm̦m̦ane men in me ear pen aõ kõm̦m̦ane m̦okta. Joñan, iar kwal̦o̦k naan im lel̦o̦k tũrããk ñan ro rej iuwe ilo train ko! Kiiõ ejako aõ ejjookok ãinwõt kar m̦okta.”

Johannes jãn Germany ej ba: “Elõñ men ko iar katak jãn aõ kar kwal̦o̦k naan. Ro jeid im jatid ilo Turkey relukkuun kõn̦aan kwal̦o̦k kõn m̦ool eo ñan elõñ armej joñan wõt aer maroñ. Rej kwal̦o̦k naan ilo jabdewõt iien ko repel̦l̦o̦k. Iar pepe bwe in kab bar kõm̦m̦ane men in ñe inaaj ro̦o̦l ñan Germany. Im kiiõ elõñl̦o̦k armej ro ij kwal̦o̦k naan ñan er jãn kar m̦okta.”

Zeynep jãn France ear ba: “Iien leto letak bok ko ear l̦ap an jipañ wãween aõ jerbal in kwal̦o̦k naan. Ear jipañ eõ bwe en l̦apl̦o̦k aõ peran im kõm̦m̦an bwe en l̦apl̦o̦k aõ lõke Jeova.”

Ear l̦apl̦o̦k an rukwal̦o̦k naan ro epaake doon. Yokwe im bõrokuk eo ibwiljin ro jeid im jatid me rar itok jãn aelõñ ko reoktak jãn doon, ear l̦ap an jelõt er. Jean-David, eo kar kwal̦o̦k kake m̦okta ear ba: “Kõmar loe an kar rein jeid im jatid kwal̦o̦k karwainene ñan kõm.” Ear bar ba: “Rar watõk kõm ãinwõt ro jerãer im ãinwõt ro uwaan baam̦le ko aer, im rar kõpel̦l̦o̦k m̦õko im̦weer ñan kõm. Iar jel̦ã bwe kõj aolep ipel̦aakin lal̦ in jej jemjein jemjati, im elõñ alen aõ riit im lo men in ilo bok ko ad. Ak kiiõ, ij kab lukkuun loe kõn meja. Ear l̦apl̦o̦k aõ lukkuun m̦õn̦õn̦õ kõnke ij juon iaan armej  ro an Jeova im ij kam̦m̦oolole kõn jeraam̦m̦an in el̦ap.”

Claire jãn France ej ba: “Meñe kõmar itok jãn aelõñ ko reoktak jãn doon ãinwõt Denmark, France, Germany, im Turkey, ak kõmar juon wõt baam̦le. Ear ãinwõt ñe Anij ear kakobaik kõm bwe kõmin juon wõt jekdo̦o̦n ñe ear oktak aelõñ kein am jãn doon.”

Stéphanie jãn France ear ba: “Iien leto letak bok ko ear katakin kõm bwe kõmin kile bwe men eo ej kõm̦m̦an bwe jen bõrokuk ippãn doon ejjab kõn m̦anit im kajin, ak ej kõn yokwe eo ad ñan Jeova.”

Elõñ iaan ro rar itok jãn aelõñ ko jet bwe ren jipañ, rar jino l̦õmn̦ak in em̦m̦akũtl̦o̦k ñan Turkey ñan jipañ kõm̦m̦ane jerbal eo ekanooj l̦ap ijin. Im ewõr jet iaan rein em̦õj aer em̦m̦akũt. El̦ap ad kam̦m̦oolol rein me rar em̦m̦akũt in jipañ ijin me el̦ap aikuj ie.

Ñan waanjoñak, ewõr juon kumi jidikdik in rukwal̦o̦k naan ro me 25 uwaaer im rej pãd ilo juon jikin ettol̦o̦k. Ium̦win elõñ iiõ, ekar wõr juon wõt em̦m̦aan ej lale eklejia. Bõtab, l̦õmn̦ak m̦õk kõn joñan an kar rukwal̦o̦k naan rein m̦õn̦õn̦õ ilo kar 2015 eo, ke 6 iaan ro jeid im jatid jãn Germany im Netherlands rar em̦m̦akũtl̦o̦k ñan ijin bwe ren jipañ er!

Ta ko ro rar em̦m̦akũt im jipañ ilo Turkey rej ba kõn aer mour ijin? Em̦ool bwe jet iien epen, ak elõñ jeraam̦m̦an ko me ro rej em̦m̦akũt im jipañ ilo jikin kein el̦ap aikuj ie rej loi. Lale ta ko jet iaan rein rar ba.

Federico, juon jeid im jatid em̦m̦aan 40 an iiõ im ewõr pãleen me ear em̦m̦akũt jãn Spain, ej ba: “Kõn an jab lukkuun lõñ m̦weiõ, ekõm̦m̦an bwe in jab m̦ad ak in l̦õmn̦ak wõt kõn men ko raorõktata.” Federico enaaj ke rõjañ ro jet ñan bar mour ilo wãween in? Ej ba: “Aet inaaj.” Ej wõnm̦aanl̦o̦k im ba: “Ñe kwõj em̦m̦akũt ñan aelõñ ko jet bwe kwõn jipañ armej ro bwe ren jel̦ã kõn Jeova, kwõj kõtl̦o̦k bwe Jeova en lale im kõjparoke eok. El̦apl̦o̦k am̦ kile bwe Jeova ej lukkuun kea kake eok.”

Rudy, juon jeid im jatid em̦m̦aan me 50 jim̦a an iiõ jãn Netherlands, im em̦õj an m̦are ej ba: “Elukkuun l̦ap am m̦õn̦õn̦õ in jipañ ijin me el̦ap aikuj rukwal̦o̦k naan  ie, im kwal̦o̦k kõn m̦ool eo ñan elõñ armej ro me rejjañin kar roñ im jel̦ã kake m̦okta. Ear l̦ap am lañlõñ ke kõmar loe an armej ro m̦õn̦õn̦õ in itok ñan m̦ool eo.”

Sascha, juon jeid im jatid em̦m̦aan me 40 jim̦a an iiõ jãn Germany, im em̦õj an m̦are ej ba: “Aolep iien ñe ij kwal̦o̦k naan, ij iioone armej ro me ej kab kein kajuon in aer roñ kõn m̦ool eo. Ilukkuun m̦õn̦õn̦õ ilo aõ jipañ rein bwe ren jel̦ã kõn Jeova.”

Atsuko, juon jeid im jatid kõrã me 30 jim̦a an iiõ jãn Japan, im em̦õj an m̦are ej ba: “Kar m̦okta, ikar lukkuun kijoorore an itok Armageddon. Ak ãlikin aõ kar em̦m̦akũtl̦o̦k ñan Turkey, ilukkuun kam̦m̦oolol Jeova kõn an kwal̦o̦k wõt an meanwõd. El̦apl̦o̦k aõ kõn̦aan epaakel̦o̦k Jeova ke ij kile wãween an tõl jerbalin kwal̦o̦k naan.”

Alisa, juon jeid im jatid kõrã me 30 jim̦a an iiõ jãn Russia ej ba: “Ilo aõ karejar ñan Jeova im jipañ ijo el̦ap aikuj ie, ejipañ eõ ñan kile bwe Jeova em̦m̦an. (Sam 34:8) Jeova ejjab baj Jema wõt, ak ej bar juon m̦õtta me el̦ap aõ epaake im el̦apl̦o̦k aõ jel̦ã kajjien ilo aolep wãween ko ij iiooni. Elõñ iien ko rekam̦õn̦õn̦õ im rem̦m̦an me iar iiooni ilo mour e aõ, im bareinwõt elõñ jeraam̦m̦an ko ij loi!”

Elõñl̦o̦k armej ro ilo Turkey rar roñ kõn ennaan eo em̦m̦an kõn wõt iien eo ejejuwaan me rar leto letak bok. Bõtab, ej lõñ wõt teretore ko me rejjañin tõpari. Aolep raan, ro me rar em̦m̦akũtl̦o̦k ñan Turkey im jipañ rar iioon armej ro rejjañin kar roñ kõn Jeova. Kokõn̦aan ke jerbal ilo teretore rot in? El̦aññe aet, l̦õmn̦ak kõn naanin rõjañ in ej ba: “Kom̦win reilo̦k im lale jikin kallib ko; rekalo kiiõ, tõrein m̦adm̦õd.” (Jon 4:35, UBS) Kwõmaroñ ke jipañ ilo jikin ko me el̦ap aikuj ilo teretore ko, ak ilo kõkkar ‘rekalo im ej tõrein ñan m̦adm̦õd’? Ñe aet, em̦m̦an kwõn jino kõm̦m̦ani buñtõn ne ko ñan am̦ tõpar mejãnkajjik in. Men eo eaorõk im kwõnaaj kile ej bwe elõñ jeraam̦m̦an ko kwõnaaj loi ilo am̦ kal̦apl̦o̦k ijo kun̦aam̦ ñan kajeedede nuuj eo em̦m̦an ñan “ãne eo ettol̦o̦ktata ilal̦.”—Jrb. 1:8.