Jeova Anij ej rõjañ kõj ñan kwal̦o̦k bũruod im kõnnaan ñane kõn jabdewõt men jej eddodo kake. (Sam 55:22) Jemaroñ jar kõn jabdewõt men me ej kainepataik kõj, meñe el̦ap ak edik. Ñe eaorõk ippãd, ebar aorõk ippãn Jeova. Ad jar ñane ej juon buñtõn ne elukkuun aorõk bwe jen maroñ lo aenõm̦m̦an ilo kõl̦mãnl̦o̦kjen̦ ko ad.​—Pilippai 4:6, 7.

Ñe jej eñtaan kõn an wõr juon ad nañinmej ilo kõl̦mãnl̦o̦kjen̦, jemaroñ l̦õmn̦ak bwe jej lukkuun make iaad. Armej ro jet remaroñ jab aolep iien lukkuun mel̦el̦e kõn eñjake kein jej bũki. (Jabõn Kõnnaan 14:10) Bõtab ñe jej lukkuun kwal̦o̦k bũruod ñan Anij ilo jar kõn wãween ad eñjake, enaaj aolep iien roñjake kõj im mel̦el̦e kõn eñjake ko ad. Jeova ej lo kõj, ejel̦ã kõn men ko jej eddodo kaki im rej kõmmetak kõj, im ekõn̦aan bwe jen jar ñane kõn jabdewõt men jej inepata kake.​—2 Kronikel 6:29, 30.

Ñe jej kõnono ñan Jeova ilo jar, men in ej kal̦apl̦o̦k ad lõke bwe ej kea kake kõj. Jemaroñ bõk ejja eñjake eo an ri-jeje sam eo me ear jar im ba: “Kwaar lo aõ jorrããn; Kwaar jel̦ã eñtaan ko aõ.” (Sam 31:7) Ad jel̦ã bwe men ko jej iiooni rej jelõt Jeova emaroñ lukkuun jipañ kõj ñan kijenmej ium̦win wãween ko reppen. Bõtab el̦apl̦o̦k men ko ej kõm̦m̦ani jãn an baj kile wõt men ko jej eñtaan kaki. El̦apl̦o̦k an mel̦el̦e jãn jabdewõt armej kõn wãween ko jej iiooni im ej jipañ kõj ñan bõk kaenõm̦m̦an im kõketak jãn Baibõl̦ eo.