Wãween Kwal̦o̦k Yokwe ñan Armej Ro
Kõnke jej itok jãn armej eo m̦oktata, Adam, kõj aolep jej juon wõt baam̦le. Meñe ro uwaan juon baam̦le rej aikuj yokwe im kautiej doon, bõtab ilo raan kein epen ñan lo kain yokwe rot in. Anij eo ad me el̦ap an yokwe ejjab kõn̦aan eo an in.
TA EO JEJE KO REKKWÕJARJAR EJ BA KÕN YOKWE
“Kwõn yokwe ri-turum̦ ãinwõt am̦ yokwe eok make.”—LIVITIKÕS 19:18, UBS.
“Wõnm̦aanl̦o̦k wõt im yokwe ro rej kõjdate kom̦.”—MATU 5:44.
TA MEL̦EL̦EIN ÑAN YOKWE ARMEJ RO
Lale wãween an Anij kõmel̦el̦eik naan in yokwe ilo naan ko an ilo 1 Korint 13:4-7:
“Yokwe ej meanwõd im jouj.”
L̦õmn̦ak kõn men in: Ewi wãween am̦ eñjake ñe ro jet rej kwal̦o̦k aer meanwõd im jouj ñan kwe im rejjab illu kõn bõd ko kwõj kõm̦m̦ani?
“Yokwe ejjab ebbanban.”
L̦õmn̦ak kõn men in: Ewi wãween am̦ eñjake ñe el̦ap an ro jet jab lõke eok ak ebbanbane eok?
Yokwe “ejjab l̦õmn̦ak wõt kõn e make.”
L̦õmn̦ak kõn men in: Ewi wãween am̦ eñjake ñe ro jet rej m̦õn̦õn̦õ in kautiej l̦õmn̦ak ko am̦ im ejjab aolep iien rej kapen l̦õmn̦ak ko aer?
“Yokwe ejjab bwini bõd ko an ro jet.”
L̦õmn̦ak kõn men in: Anij ej m̦õn̦õn̦õ in jol̦o̦k bõd ko an armej ro rar jerawiwi me rar ukel̦o̦k jãn bõd ko aer. “Eban en̦o̦uk iien otemjej, im ejãmin dãpij An illu.” (Sam 103:9) El̦ap ad kam̦m̦oolol ñe juon armej me jaar bõd n̦ae ej jol̦o̦k ad bõd. Innem jej aikuj in pojak ñan jol̦o̦k an ro jet bõd ñe rej bõd n̦ae kõj.—Sam 86:5.
Yokwe “ejjab m̦õn̦õn̦õ kõn men ko rejjab jim̦we.”
L̦õmn̦ak kõn men in: Ñe juon men enana ej wal̦o̦k ñan kõj, jejjab kõn̦aan bwe ro jet ren lañlõñ kõn ad eñtaan. Kõn men in, jejjab lañlõñ ñe ro jet rej iioon el̦ap eñtaan, meñe ear jab em̦m̦an aer kõm̦m̦an ñan kõj.
Bwe jen lañlõñ kõn jeraam̦m̦an ko jãn Anij, jej aikuj yokwe ro jet meñe reoktak jãn kõj. Juon wãween jemaroñ kõm̦m̦ane men in ej ilo ad jipañ ro rej pãd ilo aikuj.
