Boub im Lõñliñ ilo Jerbal eo an Anij

JEOVA ekõnan bwe kwon lõñliñ. (Sam 100:2) Einwõt juõn ian dri korijer ro an, bwelen kwomaroñ boub. Bwelen kwar jab lukkun boub ke kwar wujleplok mour eo am ñõn Anij, bõtab kiõ erro ko am ilo jitõb im ilo jikin jerbal remaroñ kõmõn am mõk. Emaroñ nana am mour ñe kwojjab maroñ kajejit aolep men ko kwar kõnan kõmõni. Ewi wãwen am maroñ lo juõn mour ejokkin wõt juõn im kejbãrok “lõñliñ eo Iroij ej lewõj”?​—Nih. 8:​10, UBS.

Kwoj mour ilo ien ko rebin im elõñ menin ijjibed ko rej jelet yuk, kin men in kwoj aikwij in jela karõk mour eo am. Ikijen men in, nan in kakabilek ko an dri jilik Paul rej lukkun ekkar im jejit: “Komin kanuij lale ekijkan ami etetal, jab einwõt dri jaje, a einwõt dri meletlet; Im wiaik ien, bwe ran ko renana.”​—Ep. 5:​15, 16.

Ñe kwoj lemnok kin nan in kakabilek in ekeie, ewi wãwen kwomaroñ kõmõn mejenkajik ko remõn im jokkin wõt juõn ilo am katak ibõm mõke, lale baamle eo, kwalok nan, jerbal ilo jikin jerbal, im makõtkit ko jet raurõk?

Kwoj kememej ke lõñliñ eo kwar bõke ilo ien eo kwar wujleplok mour eo am ñõn Anij im baptais? Kwar lõñliñ ke kwar jela kin Jeova im karõk ko an. Emaroñ kar bõk elõñ aliñ ko ñõn am katak bwe kwon bõk jelalokjen im lõñliñ in. Bõtab emol bwe ear lukkun or tokjen. Am kar katak ear ukot mour eo am bwe en emõnlok.

Ñõn kejbãrok bwe kwon lõñliñ wõt, kwoj aikwij wõnmanlok wõt im bõk ekan ko lor jitõb. Elañe kwoj lo bwe ebin ñõn am kõmõn ien am riit im katak Baibel, kwon etale lajrõk in men ko kwoj kõmõni jen ran ñõn ran. Meñe ej bõk jejjo minit ko ñõn katak im kalomõnlokjen ilo juõn ran, men in enaj kõmõn bwe kwon ebakelok Jeova, im enaj lukkun jibõñ yuk ñõn lõñliñ wõt.

Enañin aolep dri korijer ro an Anij remaroñ wiaik ien ñõn makõtkit ko raurõk jen ien ko rej kõmõni men ko edrik tokjeir. Kajitõk ibõm mõke, ‘Ewi joñõn aõ jolok ien ñõn riit newspaper ko im magazine ko, aluij TV, roñjake kajõñjõñ ko, ak bukot kein kamõnõnõ ko?’ (1 Tim. 4:8) Elañe kwoj lo bwe wãwen am kajerbal ien eo am ej juõn abañ, bõk buñten ne ko ñõn kõmõn oktõk ilo lajrõk in men ko kwoj kõmõni.

Adam, juõn dri belele, eor jilu nejin, im ej juõn elder, ej ba kin ta ko rej jibõñ e: “Ij kate iõ  ñõn jibarek juõn mour elamwan. Ij bõprae kein kamõnõnõ ko me elap air kõñ ien im mweiuk ko me elap air kamad iõ. Ejjab kinke ij kãlet ñõn mour ilo juõn wãwen ij karmijete aolep kõnan ko aõ ak kinke ij kãlet kein kamõnõnõ ko me rejjab bõk elap ien.”

Am kalomõnlokjen kin tõbrõk ko remõn jen bebe ko kwoj kõmõni emaroñ kakajurlok lõñliñ eo am im jibõñ yuk ñõn drebij juõn lemnok emõn. Ñõn wanjoñok, Mariusz, juõn elder me eor jilu nejin ej ba: “Ke iar jino katak Baibel eo, iar jino erom juõn armij ej kejatrikrik kin men ko remõn ilo ilju im jeklaj. Jen ien ñõn ien, ij jelmae abañ ko me elõñ iair Jeova wõt ejela kaki. Ak ij kamolol bwe kin jibõñ eo an, ij maroñ lõñliñ wõt im reimanlok ñõn ran ko rej ber iman.”

Einwõt an walok ilo bwebwenato eo an Mariusz, bõk juõn lemnok emõn eban jolok aolep men ko jej inebata kaki. Bõtab emaroñ kõmõn bwe en emõnlok am mour im jelalok kamarmir abañ ko ilo mour in. Jej riit: “Ran otemjej an ro emwij kejorran ir, re nana; a eo e mõnõnõ buruen ien otemjej, juõn kwojkwoj iben.” (Ken. 15:15) Bareinwõt, kwon kalomõnlokjen kin yokwe eo an Anij me ear kwalok ñõn yuk. Am kalomõnlokjen kin men in emaroñ kadreklok yokwe eo am ñõn e im kalaplok am lõñliñ.​—Mat. 22:37.

Lõñliñ eo an juõn baamle ej laplok ñe rej likit Jeova im men ko an moktata ilo mour eo air. Air kwalok karkar ko karkarin dri Kristian ej kadriklok an or jab errã iben dron im kõmõn bwe ren ebakelok dron im mõnõnõ ñe rej bwebwenato iben dron. Kin men in, mweo imõm enaj juõn jikin elap ainemõn im burukuk ie ñõn aolep ro uan baamle eo.​—Sam 133:1.

Kõmõni makõtkit ko ilo jitõb iben dron einwõt juõn baamle ej kalaplok lõñliñ eo emol. Mariusz ej kemelele: “Ij kaurõk ien ko kimij ber iben dron einwõt juõn baamle. Lio beleiõ elap an kanuij jibõñ im rejetak iõ. Jabrewõt ien, ej ber iba meñe ij ber ilo jerbal in kwalok nan ak ñe ij karreoik imõn ikkure eo mokta jen kwelok ko relap, im ej itok iba ñe ij etal im kwalok katak ko ilo jet congregation ko. Ij lo bwe men in elap an kõkãtõk iõ.”

Baibel eo ej kakien dri Kristian ro ñõn kabwe aikwij ko an baamle ko air ilo kõniek. (1 Tim. 5:8) Bõtab elañe jerbal eo air ej bõk aolep ien im maroñ ko air, emaroñ bõk lõñliñ eo air ilo jerbal eo an Anij. Kwon jar ñõn Jeova kin abañ eo am. (Sam 55:22) Jet rar lo bwe ñõn air likit Ailiñ eo an Anij moktata, rej aikwij bukot bar juõn jerbal. Ejelok juõn dri Kristian ej aikwij kõtlok bwe an lap wõnan im an bõk jerammõn ko jet jen jerbal eo an me elap an bõk ien im maroñ ko an en kabiloik e jen an lemnok kin men ko lor jitõb me elaplok air aurõk.​—Ken. 22:3.

Kwomaroñ lo bwe elap an jibõñ ñe kwoj je aolep men ko remõn im rejjab emõn kin jerbal eo am kiõ ak jerbal eo kwokõnan bõke. Emol bwe aolep rej kõnan juõn jerbal emõn wõnan im ekajuburu. Bõtab, jerbal eo am kiõ ej ke jibõñ yuk ñõn kowõnmanlok mour in jitõb eo an baamle eo am? Lemnok kin aolep un ko im kõmõne juõn bebe me enaj kõmõn bwe kõtan eo am iben Jeova en men eo moktata.

Elañe jerbal eo am kiõ ejjab jibõñ yuk ñõn wõnmanlok ilo jitõb, kwoj aikwij ukote. Elõñ dri Kristian ro rar kõmõn oktõk ko relap bwe ren kõmõn ien ñõn men ko lor jitõb. Juõn brother ilo Poland ej ba: “Men eo wõt iar maroñ kõmõne ej etal jen jikin eo iar jerbal ie kinke ekkã aõ kar itoitak ñõn jikin ko jet ikijen jerbal eo aõ. Ear jab bwe ien ñõn aõ lale aikwij ko an baamle eo aõ im kabwe aikwij ko air ilo jitõb ilo wãwen eo ejime.” Kiõ brother in ej bõk an mour jen juõn jerbal me edriklok an bõk ien im maroñ ko an.

Lo Lõñliñ ilo Am Jibõñ Ro Jet

Jisõs ear ba: “Mõnõnõ in lelok elap jen bõk.” (Jerb. 20:35) Eor iben dri Kristian ro ien ko remõn im rebellok ñõn air lelok ñõn ro jet. Jet ien, men eo wõt kwomaroñ kõmõne ej ettõñdikdik, idik pein, ak kwalok juõn nan in kamolol ñõn juõn eo me ear kate ñõn kwalok katak eo an ilo kwelok, men kein remaroñ bõktok lõñliñ ñõn komro jimor.

 Dri jilik Paul ear rejañ dri Kristian ro mõtõn: “Kaberan ro rej kũmkũm [ak buromõj], jibõñ ro re mõjino.” (1 Tes. 5:​14) Ro elap air buromõj remaroñ lemnok bwe rejjab maroñ kijenmij iomin inebata ko kin kajur eo air mõke. Kwomaroñ ke jibõñ rein? Elañe kwoj lo bwe juõn ian ro jeõm im jãtõm ejokolok an lõñliñ ilo jerbal eo an Jeova, kwon kajeoñ jibõñ e. Am kõmõne men in enaj bareinwõt kõkãtõk yuk. Elõñ jet abañ ko me armij ro rejjab maroñ kamarmiri. Bõtab, kwomaroñ kwalok am itoklimo im melele kin iñjake ko an eo jeõm im jãtõm im rejañ e ñõn atartar wõt ion Jeova bwe en jibõñ e. Ro rej lelok jibõñ renaj mõnõnõ.​—Sam 27:10; Ais. 59:1.

Bar juõn wãwen ekeie ñõn jibõñ eo me kwoj lo bwe ejokolok an lõñliñ ej ilo am kir e bwe en kwalok nan ibõm. Ke Jisõs ear jilkinlok dri kalor ro 70, ear “karuolok” iair. (Luk 10:1) Bwelen kwomaroñ errã bwe wãwen in Jisõs ear kõmõne ear jibõñ armij ro ruo ñõn rejañ dron. Kwomaroñ ke lor wãwen in ñõn jibõñ ro jet bwe ren bar lo lõñliñ ranin?

Kij ranin elõñ un ko iber kin unin jej inebata. Bõtab, Paul ej rejañ kij: “Komin lõñliñ ilo Iroij ien otemjej: im ij bar ba, komin lõñliñ.” (Pil. 4:4) Kinke kwoj yokwe Anij, bokake e, im kijejeto ilo jerbal eo ear lewoj bwe kwon kõmõne, eor unin mour eo am. Men in ej bõktok lõñliñ ñõn yuk. Men eo elaplok ej bwe Jeova ej jibõñ yuk ñõn kamarmir abañ ko im ijjibed ko kwoj jelmaiki.​—Rom. 2:​6, 7.

Eor ar tõmak bwe jej ebakelok lõl eo ekãl me Jeova ear kalimur kake. Elap wõt an naj lõñ jerammõn im un ko unin ar lõñliñ ilo ien in! (Sam 37:34) Inem jemaroñ lõñliñ wõt. Jen jab meloklok kin ewi joñõn Jeova ej kejerammõn kij ranin. Kin men in, jemaroñ “korijer ñõn [Jeova] ilo lõñliñ.”​—Sam 100:⁠2.

[Pija eo ilo peij 8]

(Ñan lale pija eo, jouj im lale ilo bok eo)

Kwomaroñ aikwij kõmõn oktõk ilo wãwen kwoj kajerbal ien ko am bwe kwon lõñliñ wõt

MENIN KAMÕNÕNÕ KO

LALE MWEO IM BAAMLE EO

JIKIN JERBAL

KWELOK KO AN KRISTIAN

KATAK IBÕM MÕKE

JERBAL IN KWALOK NAN

[Pija ko ilo peij 10]

Kwomaroñ ke jibõñ ro jet ñõn bar lõñliñ?