Kwomaroñ ke Itok ñõn Masedonia?

ILO jikin kwelok eo etan Troas me elõñ jikin bo an tima ko ie ilo Asia Minor, dri jilik Paul ear lo juõn vis̃õn. Juõn eman jen Masedonia ear akwelap ñõn e: “Kwon itok ñõn Masedonia im jibõñ kim.” Ke Paul ear lo vis̃õn eo, e im dri itoitak ro mõtõn rar ‘lemnok bwe Iroij e ar kirlok ir bwe ren kwalok gospel’ eo ñõn armij in Masedonia. Ta tõbrõk eo ear walok? Ilo jikin kwelok eo elap ilo Masedonia etan Pilippai, Lidia im ro ilo baamle eo an rar erom dri tõmak ro. Im ro jet ilo Masedonia, me ear ber iomin ailiñ in Rom, rar bareinwõt erom dri tõmak ro.​—Jerb. 16:​9-​15.

Dri Kennan ro an Jeova ranin rej bareinwõt kwalok air kijejeto einwõt ir. Elõñ rar mõnõnõ in mõke kõllã wõnair ñõn emakõt ñõn jikin ko me elap aikwij dri kwalok ro ie. Ñõn wanjoñok, kin an Lisa kõnan kalaplok ijo kwonan ilo jerbal in kwalok nan, ear emakõt jen Canada ñõn Kenya ilo Africa. Trevor im Emily, me rej bareinwõt jen Canada, rar emakõtlok ñõn bar juõn jikin ilo Africa etan Malawi kin ejja mejenkajik eo wõt ñõn kalaplok ijo kwonair ilo jerbal in kwalok nan. Ilo England, kinke Paul im Maggie rar bwijrõk jen air jerbal (retire), rar lo bwe ear bellok juõn ien emõn ñõn airro kalaplok ijo kwonair ilo jerbal eo an Jeova im kin men in rar emakõtlok ñõn turear in Africa. Eor ke ibõm juõn jitõbõn karmijete yuk mõke? Kwomaroñ ke emakõt bareinwõt? Elañe aet, ta nan in kakabilek ko jen Baibel im nan in rejañ ko remaroñ jibõñ yuk ñõn lo tõbrõk?

Etale Kwe Mõke

Juõn men kwoj aikwij lemnok kake ej unin am kõmõni men ko. Jisõs ear ba bwe kien eo elaptata ej: “Kwon yokwe Iroij am Anij kin aolepen buruõm im kin aolepen am, im kin am  lemnok otemjej.” Inem, un ko unin ar kwalok nan ilo ailiñ ko jet ej aikwij itok jen ar yokwe Anij im kõnan kõtõbrõk jerbal eo ñõn kõmõn dri kalor ro. Jisõs ear wõnmanlok im ba: “Im eo ken ka ruo einwõt in, Kwon yokwe dri turõm im einwõt kwe.” Kõnan eo ar emol ñõn jibõñ ro jet ej kalikar ar yokwe ro dri turid. (Mat. 22:36-​39; 28:19, 20) Am jerbal ilo bar juõn ailiñ ejjab juõn ien jambo bajjek, ak ekkã an kitibuj elap jerbal im juõn jitõbõn karmijete kwe mõke. Yokwe ej aikwij kamakõt yuk ñõn am kõmõne men in. Ruo armij jen Netherlands, etair Remco im Suzanne, me rej jerbal kiõ ilo Namibia ilo Africa, rej ba, “Yokwe ej kamakõt kimro ñõn berwõt ijin.”

Juõn circuit overseer ilo Namibia etan Willie ear kile im ba: “Ro me rar emakõt im berwõt ilo ailiñ ko jet rar jab kõtõmene bwe ro jeir im jãtir renaj kabwe aikwij ko air. Ak rar lemnok in jerbal ibeir ñõn jibõñ ir ilo jerbal in kwalok nan.”

Elikin am etale unin am kõmõni men ko, kwon kajitõkin yuk mõke: ‘Ta iminene ko eor iba im imaroñ kajerbali ilo jikin eo inaj emakõtlok ñõne? Ij ke juõn dri kwalok ekabel? Ta kajin ko ijela? I mõnõnõ ke in katak bar juõn kajin?’ Emõn bwe kwon jijõt im konono kake men in iben baamle eo am. Bareinwõt, emõn bwe kwon kajitõk iben elder ro ilo congregation eo kin lemnok ko air, im elaptata kwoj aikwij jar ñõn Jeova kin men in. Kain etale rõt in emaroñ jibõñ yuk ñõn lale elañe kwomaroñ kijenmij ilo am jerbal ilo bar juõn ailiñ.​—Lale bo̦o̦k eo “ Jela kin Kwe Mõke.”

Jerbal Ia

Ilo juõn vis̃õn, kar kir Paul ñõn Masedonia. Ranin, Jeova ejjab kajerbal wãwen ko  rekabwilõñlõñ ñõn tel kij. Bõtab, ikijen buk in im buk ko jet, armij ro an Anij rej katak kin elõñ jikin ko me elap aikwij ie. Inem kwon jino ilo am kõmõne juõn lajrõk in etan jikin ko me elap aikwij ie. Elañe kwojjab pojõk ñõn katak bar juõn kajin ak ejamin to am ber ilo bar juõn ailiñ, bwelen kwomaroñ lemnok ñõn jerbal ilo juõn jikin me emwij am jela kajin eo. Inem lali men ko raurõk einwõt elañe jej aikwij kajerbal visa, ial ñõn itoitak, elañe ejjab kauwatata ñõn ber ie, wõnan mour, im mejatoto eo ie. Emaroñ juõn menin jibõñ ñõn konono iben ro im rar bareinwõt emakõt ñõn bar juõn jikin. Kwon jar im kajitõk jibõñ ñõn kajerbal melele kein ñõn am maroñ kõmõne bebe eo emõntata. Kememej bwe ilo ien ko an Paul im ro mõtõn ‘Jitõb Kwojarjar eo ear jiroñ ir bwe ren jab kwalok nan i Esia.’ Meñe rar kajeoñ in etal ñõn Bitinia ‘Jitõb an Jisõs ear jab kõtlok air etal.’ Ilo ejja wãwen in lok wõt, emaroñ bõk ien ñõn am jela ia eo kwomaroñ etal im jibõñ ie.​—Jerb. 16:​6-​10.

Bwelen kiõ emwij am kile jet jikin ko kwokõnan etal ñõni. Elañe kwoj lemnok in jerbal ilo bar juõn ailiñ, kwon jeje ñõn ra ko an Dri Kennan ro an Jeova ilo ailiñ ko kwoj lemnok in etal ñõni. Kõlajrõki jerbal ko kwar kõmõni mokta im kwoj kõmõni kiõ ilo rolul eo an Jeova ekoba kajitõk ko am, einwõt kin wõnan mour, jikin jokwe rõt ko kwomaroñ jokwe ie, elañe eor jikin taktõ, im jikin jerbal ko rebellok. Inem lelok letter eo ak letter ko am ñõn service committee eo ilo congregation eo am. Renaj kobaik letter eo air me ej kalikar bwe kwoj juõn ian Dri Kennan ro an Jeova im kajju jilkinlok ñõn ra ko kwar kwaloki ilo letter eo am. Uak ko jen ra ko renaj jibõñ yuk ñõn kãlet ia eo emaroñ lap am jibõñ ro jeer im jãter ie.

Willie, eo kar kwalok kake mokta, ear ba: “Ro me rar lo tõbrõk kar ro im rar etal ñõn ailiñ eo mokta ñõn bukot jikin ko me remaroñ mour im mõnõnõ ie. Ruo dri belele rar kile bwe enaj kar bin ñõn airro jokwe ilo juõn jikin etolok. Kin men in, rar mõnõnõ in emakõt ñõn juõn bukwon, ijo me rar aikwij jibõñ ie ak ear jab bin ñõn airro mour ie.”

Jelmae Wãwen ko Rebin

Ejelok berre kwomaroñ jelmae wãwen ko rebin ñe kwoj emakõt jen kabijuknõm ñõn bar juõn jikin. Lisa, eo kar kwalok kake mokta, ej ba: “Iñjake ko kwoj bõki kin am mõke iam emaroñ lukkun bin.” Ta eo ear jibõñ e? Ej ilo an ber ebake ro ilo congregation eo ilo jikin eo ear emakõt ñõne. Ear kõmõn juõn mejenkajik ñõn an jela etan aolep. Ñõn an maroñ kõtõbrõk men in, ear mõkõj ñõn ien kwelok ko im ear to an ber elikin kwelok ko bwe en maroñ kõmao iben ro jein im jãtin. Lisa ear jerbal iben ro jet ilo jerbal in kwalok nan, ear kir elõñ ian ro jein im jãtin ñõn mweo imõn, im ear ejaak jimjera ko ibeir. Ej ba: “Ijjab ajlok kin men ko iar karmijeteiki. Jeova ear lukkun kejerammõn iõ.”

 Elikin an ajiri ro nejin Paul im Maggie ridtolok im etal jen mweo, irro ear bareinwõt emakõt jen mweo me rar jokwe ie iomin 30 yiõ ko. Leo ej ba: “Ear biruru ñõn amro etal jen men ko mweiemro. Bõtab ñõn am etal jen baamle eo amro, men in ear lukkun bin ñõn joñõn eo kimro ear jab kõtõmene kake. Ear lukkun lap amro jõñ ke kimro ar ber ilo balun eo. Ebiruru ñõn amro kar bõk lemnok in, ‘Kimij jab maroñ kõmõne men in.’ Bõtab kimro ar atartar wõt ion Jeova. Ilo am ejaake jimjera ko rekãl, men in enaj lap an jibõñ yuk ñõn wõnmanlok im kajejit men eo kwar bebe kake.”

Greg im Crystal rar kãlet ñõn emakõt jen Canada ñõn Namibia kinke rar jela kajin Belle, kajin eo me elap air kajerbale ijo. Ak tokelik, rar kile bwe enaj laplok an or tokjen elañe rej katak juõn ian kajin ko an ailiñ eo. “Jet ien, kimro ar ebwer. Bõtab, elikin wõt amro katak kajin eo, kimro ar jino melele kin mõnit ko an ailiñ eo. Ilo amro ber ebake ro jeim im jãtim ijo, men in ear jibõñ kimro ñõn jino iminene kin wãwen mour ilo jikin in ekãl.”

Kain lemnok rõt in me ej kwalok etã buru im ñõn mõnõnõ in jibõñ emaroñ jelet ro jeer im jãter ilo ailiñ eo ilo juõn wãwen emõn. Jenny ej kememej jet baamle ko me rar emakõtlok ñõn Ireland, ijo ear ridtolok ie. Ej ba, “Rar lukkun kwalok air karuwainene. Rar itok bwe ren jerbal ñõn ro jet, im jab bwe ro jet ren jerbal ñõn ir. Kinke rar lukkun kijejeto im mõnõnõ, iar bareinwõt kõnan jerbal ilo jikin ko me elap aikwij ie.” Ranin Jenny im leo iben rej jerbal in mejinede ilo ailiñ in Gambia.

Kejerammõn jen Jeova Ej “Namweien Armij”

Elõñ tõbrõk ko Paul ear iioni ke ear ber ilo Masedonia! Enañin joñoul yiõ ko tokelik, ear jeje ñõn ro jein im jãtin ilo Pilippai: “Ij kamolol aõ Anij ilo aolepen aõ kememej kom.”​—Pil. 1:3.

Trevor im Emily, ro me rar jerbal ilo Malawi mokta jen air kar bõk nan in kir eo ñõn ber ilo Watchtower Bible School in Gilead, rar bõk ejja lemnok in wõt. “Jet ien kimar lemnok elañe ejime men eo kimro ar kõmõne, bõtab kimro ar lukkun mõnõnõ. Kimro ar lukkun ebake dron im iñjake an Jeova kejerammõn kimro.” Greg im Crystal, eo kar kwalok kake ir mokta, rar ba, “Ejelok bar juõn men kimro kõnan kõmõne ijellokin men in.”

Ilo mol, ejjab aolep eor air maroñ ñõn jerbal ilo ailiñ ko jet. Ñõn jet emaroñ emõnlok ñõn air berwõt ilo ailiñ eo air im emakõt ñõn jikin ko elap aikwij ie. Ro jet remaroñ jibarek mejenkajik ko ñõn jerbal ilo congregation ko jet me rej ber ebake jikin eo rej jokwe ie. Men eo elukkun aurõk ej bwe kwon kõmõn joñõn wõt am maroñ ilo jerbal eo am ñõn Jeova. (Kol. 3:​23) Inem nan ko rekakõrmol an Anij renaj jejit ñõn kwe: “Kejerammõn jen Jeova, ej namweien armij; im E jab kobaik buromõj na iben.”​—Ken. 10:22.

[Bo̦o̦k/Pija eo ilo peij 5]

 Jela kin Kwe Mõke

Ñõn am etale kwe mõke ñõn jela elañe kwomaroñ jerbal ilo ailiñ ko jet, kwon lemnok kin kajitõk kein ilõl. Inem ilo jar kwon lukkun etale elañe ej juõn bebe emõn ñõn am emakõt. Katak ko jen buk in Imõniaroñroñ ilo yiõ ko remotlok remaroñ jibõñ yuk ñõn kõmõne men in.

• Ij ke juõn armij eridto ilo jitõb?​—“Buñten Ne ko ñõn Lo Mõnõnõ” (Mei 1, 1998, peij 6)

• Ij ke juõn dri kwalok ekabel?​—“Wãwen eo ñõn Lo Tõbrõk ilo Jerbal in Pioneer” (w89-E 5/15, peij 21)

• Imaroñ ke etal jen baamle eo aõ im ro mõta?​—“Anjo Ion Am Oñkake Baamle eo Am ilo Jerbal eo an Anij” (w94-E 5/15, peij 28)

• Imaroñ ke katak bar juõn kajin?​—“Jerbal ilo Juõn Congregation me Ej Konono Bar Juõn Kajin” (w06-E 3/15, peij 17)

• Ebwe ke jããn ko iba ñõn kabwe aikwij ko aõ ñe inaj emakõt?​—“Kwomaroñ ke Jerbal ilo Bar Juõn Ailiñ?” (w99-E 10/15, peij 23)

[Pija eo ilo peij 6]

Juõn lemnok me ej kwalok etã buru im ñõn mõnõnõ in jibõñ emaroñ jelet ro jeer im jãter ilo ailiñ eo ilo juõn wãwen emõn

[Pija eo ilo peij 7]

Ro rej itok bwe ren jerbal ñõn ro jet rej ro im elap air lo tõbrõk