Kwõn Jab M̦on̦e Eok Make

“TA EO kwaar kõm̦m̦ane?” Anij ear kajjitõk ippãn Iv ãlikin an kar kañ leen wõjke eo. Iv ear uwaak im ba: ‘Jedpãnit eo ear m̦on̦e eõ, im iar m̦õñã.’ (Jen. 3:13) Setan ear m̦on̦e Iv. Eñin unin Baibõl̦ eo ej n̦aetan ‘jedpãnit e rũtto eo ej m̦on̦e aolepen lal̦.’—Rev. 12:9.

Bwebwenato in ej kalikkar bwe Setan eriab im elukkuun lap an m̦on̦e armej ro. Iv ear m̦õkaj im tõmake naan ko retao an Setan. Bõtab, ejjab Setan wõt im emaroñ m̦on̦e armej ro. Baibõl̦ eo ej kwal̦o̦k bwe armej ro rej bar “m̦on̦e er” make.—Jem. 1:22.

Juon armej emaroñ ke m̦on̦e e make? Ekkar ñan Baibõl̦ eo, men in emaroñ wal̦o̦k. Jen lale juon bwebwenato ilo Baibõl̦ eo. Armej rein rar m̦on̦e er make kõn aer kwal̦o̦k jet l̦õmn̦ak ko rejjab jim̦we. Innem ãlikin am̦ etale bwebwenato in, kwõn kajjitõk ippõm make, ‘Ij ke kwal̦o̦k ejja l̦õmn̦ak rot kein? Ij ke m̦on̦e eõ make?’

Rar M̦on̦e Er Make

Ãlikin aer kar pãd ilo kamakoko ium̦win 70 iiõ ko ilo Babilõn, ri Ju ro rar jebl̦aak ñan Jerusalem. Sairõs ear kakien armej ro bwe ren jebl̦aak im bar kalõke tampel̦ eo. (Ezra 1:1, 2, UBS) Juon iiõ tokelik, armej ro rar kadedel̦o̦k l̦oñtak eo an tampel̦ eo an Jeova. Ri Israel ro rar m̦õn̦õn̦õ im nõbare Jeova kõn an jipañ er ilo jerbal in eaorõk. (Ezra 3:8, 10, 11) Jet armej rar jum̦ae jerbal in im ri Israel ro rar jino ebwer. (Ezra 4:4) Ãlikin aer pãd ilo Jerusalem ium̦win 15 iiõ, juon kiiñ ekããl in Põrsia ear kakien er bwe ren kabõjrak jerbal in ekkal eo aer ilo Jerusalem. Jet iaan ri utiej ro ilo Põrsia rar itok ñan Jerusalem im ‘kabõjrak armej ro kõn aer kajoor.’—Ezra 4:21-24.

Ri Israel ro rar ebwer im jino kwal̦o̦k l̦õmn̦ak ko rebõd. Rar m̦on̦e er make ke rar ba: “Ejjañin jejjet ien bar kalek Temple eo.” (Hag. 1:2, UBS) Rar l̦õmn̦ak bwe Anij ejjab kõn̦aan bwe ren wõnm̦aanl̦o̦k wõt im kalõk tampel̦ eo. Rar bõjrak jãn aer jerbal, im rar jino kakõm̦m̦anm̦anl̦o̦k im kalapl̦o̦k m̦oko im̦wier make. Ri kanaan eo an Anij etan Haggeai ear kajjitõk ippãn armej rein: “Etke komij jokwe ilo moko remmõn ak Temple eo [an Jeova] ej jorrãn wõt?”—Hag. 1:4, UBS.

Ta eo jemaroñ katak jãn bwebwenato in? Jet armej edikl̦o̦k aer poub ilo aer jerbal ñan Jeova kõnke elapl̦o̦k aer kõm̦m̦ani kõn̦aan ko aer make. Rej l̦õmn̦ak bwe erum̦wij an Anij kajejjet ankilaan kõn lal̦ in. Ñan kalikkar unin an bõd l̦õmn̦ak rot in, jen lale juon waan joñak. Kwoj kõm̦m̦ane juon kõjota ilo m̦weo im̦õm. Kwaar kũrtok jet armej ñan kõjota in, kõn men in elap am̦ poub. El̦aññe armej rein renaaj rum̦wijtok, ta eo kwonaaj kõm̦m̦ane? Kwonaaj ke ebwer im bõjrak jãn am̦ keboji m̦õñã ko kõnke rerum̦wij? Jaab!

Eñin men eo Haggeai im Zekaraia rar kõn̦aan bwe armej ro ren mel̦el̦e kake. Jeova ear jab kõn̦aan bwe armej ro ren bõjrak jãn aer kalõke tampel̦ eo. Haggeai ear ba: ‘Jabdrewõt iami en jab ebbwer, ak komin kaleke kinke Jeova ej bed ibbemi.’ (Hag. 2:4, UBS) Armej ro rar aikuj wõnm̦aanl̦o̦k wõt ilo jerbal eo aer. Rar aikuj kwal̦o̦k aer tõmak bwe Jeova enaaj jipañ er. (Zk. 4:6, 7, UBS) Bwebwenato in ej jipañ kõj ñan kile bwe Jeova ejjab kõn̦aan bwe jen kadikl̦o̦k ijo kun̦aad ilo jerbal eo ad ñan e. Jejjab aikuj l̦õmn̦ak  bwe raan eo an Jeova enaaj rum̦wijtok.—1 Kor. 10:11.

Kajim̦we L̦õmn̦ak ko Ad

Rijjelõk Piter ear kwal̦o̦k kõn karõk eo an Anij kõn “lañ ko re kããl im lal̦ e kããl.” (2 Pit. 3:13) Ear kwal̦o̦k bwe jet armej rar l̦õmn̦ak bwe Anij eban jol̦o̦k aolep nana ko im jipañ armej ro an ilo lal̦ in. Rar ba bwe Anij eban kõm̦m̦an jabdewõt kõnke ‘men otemjej rejja ãindein wõt jen kar jinoin kõmõnmõn lal̦.’ (2 Pit. 3:4) Piter ear jab errã ippãn armej rein. Ear kõn̦aan kakeememej armej ro doon Anij bwe l̦õmn̦ak kein rebõd. Anij ear jol̦o̦k nana ko im jipañ armej ro an ilo iien ko etto ke ear bõktok ibwijleplep eo.—2 Pit. 3:1, 5-7.

Haggeai ear rõjañ ri Ju ro im rar ebwer in kalõke tampel̦ eo. Ear ba: “Komin lemnak kin men kein rej walok ñõn kom!” (Hag. 1:5, UBS) Ear kõn̦aan bwe armej rein ren l̦õmn̦ak kõn ta ko elap aer poub kaki ilo mour ko aer. Rar mel̦o̦kl̦o̦ke kallim̦ur ko an Anij im ear kakeememej er. (Hag. 1:8; 2:4, 5, UBS) Ãlikin an Haggeai kakajoorl̦o̦k armej ro, rar bar jino kalõke tampel̦ eo. Ri jum̦ae ro rar bar kajjioñ kabõjrak jerbal eo. Tokelik, Kiiñ in Põrsia eo ear kamãlim aer ekkal. Armej ro rar kadedel̦o̦k tampel̦ eo ium̦win l̦alem wõt yiõ meñe rar iion jum̦ae.—Ezra 6:14, 15; Hag. 1:14, 15.

L̦õmn̦ak Kõn Men ko Kwoj Kõm̦m̦ani

Ri Ju ro rar jino ebwer ke rar iion mãlejjoñ ko. Ak kwe? Kwoj ke jino ebwer ñe kwoj iione mãlejjoñ ko? El̦aññe kwoj ebwer, emaroñ pen am̦ bõk kun̦aam im kijejeto wõt ilo kwal̦o̦k naan. Jet armej rej ebwer kõn an nana an armej ro ilo lal̦ in jerbal ñan doon. Ear lap nana ilo raan ko an Habakkuk. Ear kajjitõk ippãn Jeova: “Ewi toan aõ naj kir ñõn yuk kin jibañ ak kwoj jañin uak im lomoren kim jen jorrãn kein?” (Hab. 1:2, UBS) Jet ro doon Jeova remaroñ l̦õmn̦ak bwe erum̦wij an Anij kajejjet ankilaan kõn lal̦ in. Kõn men in, ejakol̦o̦k aer kaorõki jerbal ko aer ñan Jeova kõnke elap aer kate er bwe ren m̦weiie. Men in ej ke wal̦o̦k ñan kwe? El̦aññe kwoj l̦õmn̦ak bwe erumij an Anij kajejjet ankilaan kõn lal̦ in, kwoj m̦on̦e eok make. Kate eok ñan roñjake im jerbale naan in kakapilõk ko jãn Baibõl̦. Jej aikuj bareinwõt etale mour ko ad im kajim̦we wãween ad l̦õmn̦ak. Jet armej rej inepata kõnke rar kõtmãne bwe Anij en kar kajejjet ankilaan kõn lal̦ in kadede, ak ejañin.

Juon Iien Kõttar

Jej aikuj ke inepata kõn ad l̦õmn̦ak bwe eto an Anij kajejjet ankilaan? Ñan uwaake kajjitõk in, jen l̦õmn̦ak kõn naan ko an Jijej ke ear kõnnaan kõn jem̦l̦o̦kin raan ko ãliktata. Ilo bok in Mark, Jijej ej kakkõl kõj elõñ alen bwe jen pojak wõt ilo raan kein ãliktata. (Mark 13:33-37) Ilo bok in Revelesõn jej bar bõk naan in rõjañ bwe jen pojak wõt. (Rev. 16:14-16) Etke elukkuun lõñ alen an Baibõl̦ eo kakkõl kõj? Unin ej kõnke jet armej remaroñ  mel̦o̦kl̦o̦k bwe jej mour ilo jem̦l̦o̦kin raan ko ãliktata. Rem̦õk in kõttar, im ejako aer poub ilo jerbal ko aer ñan Anij.

Jijej ear kwal̦o̦k juon bwebwenato kõn juon ri ko̦o̦t. Bwebwenato in emaroñ jipañ kõj ñan kile etke jej aikuj pojak wõt ilo ad kõttare an raan kein ãliktata jem̦l̦o̦k. Juon boñ, juon ri ko̦o̦t ear deloñe juon em̦ im ko̦o̦te. El̦aññe armej eo ilo m̦weo en kar jel̦ã bwe ri ko̦o̦t eo enaaj kar itok in boñ, ta eo enaaj kar kõm̦m̦ane? Eban kar kiki, ak enaaj kar emmej wõt im kõttare ri ko̦o̦t eo. Ak ta kõn kõj raanin? Jijej ear ba: “Kom̦win barãinwõt pojak, bwe ilo awa [eo] kom̦ij jab l̦õmn̦ak, Nejin Armej ej itok.”—Matu 24:43, 44.

Ãinwõt an bwebwenato in kwal̦o̦k, jej aikuj pojak im kõttar wõt. Jen jab l̦õmn̦ak bwe elukkuun to an Anij kajejjete ankilaan kõn lal̦ in. Ri Israel ro rar l̦õmn̦ak bwe ‘ejañin jejjet iien ñan kalõk tampel̦ eo.’ Jen jab m̦on̦e kõj make im ba bwe ejañin iien ñan an Anij kajejjete ankilaan! L̦õmn̦ak rot in enaaj kõm̦m̦an bwe en dikl̦o̦k kõn̦aan eo ad kin jerbal in kwal̦o̦k naan.—Rom 12:11.

Jol̦o̦k L̦õmn̦ak ko Rebõd

Jej aikuj jol̦o̦k l̦õmn̦ak ko rebõd. Bok in Galetia 6:7, UBS ej kakapilõk kõj, “Komin jab mone kom make . . . Juõn armij enaj madmid leen men ko wõt ear kalbwini.” Ekkã an mar ko eddek ijoko ejjel̦o̦k keinikkan ie. El̦aññe jejjab kajim̦we l̦õmn̦ak ko ad, enaaj wal̦o̦k l̦õmn̦ak ko rebõd. Jet armej rejel̦ã bwe raan eo an Jeova enaaj itok. Bõtab rej ba, ‘Ej to wõt an itok.’ L̦õmn̦ak rot in emaroñ kõm̦m̦an bwe ren jab kaorõki jerbal ko an Anij. Im enaaj kõm̦m̦an bwe en jako aer kijejeto ilo aer jerbal ñan Jeova. Innem ñe raan eo an Jeova ej itok, armej rein renaaj ilbõk im jaje ta eo ren kõm̦m̦ane.—2 Pit. 3:10.

Ewi wãween jemaroñ kõjparok kõj bwe jen jab kwal̦o̦k l̦õmn̦ak kein rebõd? Jemaroñ kõm̦m̦ane men in ilo ad kam̦ool ñan kõj make kõn men ko rej ‘ankilan Anij im remmõn, rewebben im rej kabuñburuen.’ (Rom 12:2, UBS) Juon wãween em̦m̦an ñan ad kõm̦m̦ane men in ej ilo ad riiti Baibõl̦ eo kajjojo raan. Naan kein renaaj kakajoorl̦o̦k kõj ñan lukkuun tõmak bwe Jeova enaaj kajejjet ankilaan ilo iien eo em̦õj an karõke.—Hab. 2:3, UBS.

Jen wõnm̦aanl̦o̦k wõt im katak ipped make im ippãn baam̦le ko ad. Jen niknik ilo ad jar. Jen ekkeini ad pãd ilo kwelo̦k ko kajjojo wiik. Jen kijejeto wõt ilo ad jerbal in kwal̦o̦k naan. Jen bareinwõt kwal̦o̦k jouj im kõm̦m̦an em̦m̦an ñan ro jet. Aolep men kein renaaj jipañ kõj bwe jen pojak wõt ilo ad ‘kõttare raan eo an Jeova.’ (2 Pit. 3:11, 12, UBS) Jeova ej loe aolepen jerbal kein ad ñan e. Rijjelõk Paul ej kakememej kõj: “Jen jab mõk in kõmmõn emmõn, bwe elañe jejjab ebbwer, jenaj madmid ilo ien jonikkan.”—Ga. 6:9, UBS.

Jen jab m̦on̦e kõj make im l̦õmn̦ak bwe Jeova em̦õj an karum̦wijl̦o̦k raan eo an. Jen jutak pen wõt kõnke raan eo an Jeova ej epaaktok wõt!

[Pija ilo peij 4]

Haggeai im Zekaraia rar kakajoorl̦o̦k ri Ju ro bwe ren bar jino ekkal

[Pija ilo peij 5]

El̦aññe armej eo ilo m̦weo en kar jel̦ã bwe ri ko̦o̦t eo enaaj kar itok in boñ, ta eo enaaj kar kõm̦m̦ane?