Wõn Eo Eaorõktata ilo Mour eo Am̦?
Wõn Eo Eaorõktata ilo Mour eo Am̦?
“Kwe eo e utiejtata ioon aolepen lal̦ in.”—SAM 83:18.
1, 2. El̦aññe jekõn̦aan bõk lo̦mo̦o̦r, etke ejabwe ñan ad baj jel̦ã wõt kõn etan Anij?
KWÕJ ke keememej jinoin am̦ kar loe etan Anij ilo Baibõl̦ eo? Bõlen kwaar lukkuun bwilõñ ke kwaar riiti naan kein ilo Sam 83:18: “Bwe ren jel̦ã bwe Kwe wõt, im etam̦ Jeova, Kwe eo e utiejtata ioon aolepen lal̦ in.” Ãlikin am̦ kar jel̦ã kõn ãt in etan Anij, ejjel̦o̦k pere bwe kwaar bar kajerbale eoon in ñan jipañ ro jet bwe ren jel̦ã kõn ãt in etan Anij, Jeova.—Rom 10:12, 13.
2 Meñe eaorõk bwe armej ro ren jel̦ã kõn etan Anij, men in ejabwe. Kiiõ ke kwõjel̦ã etan Anij, ta eo kwõj aikuj kõm̦m̦ane ñan bõk lo̦mo̦o̦r? Juon ri jeje sam ear ba naan kein kõn Jeova: “Kwe eo e utiejtata ioon aolepen lal̦ in.” Aet, Jeova ej eo im eaorõktata ijoko otemjej. Kõnke ear kõm̦anm̦an men otemjej, ewõr an jim̦we im maroñ ñan kõtmãne bwe aolep menin kõm̦anm̦an ko an ren kautiej e. (Rev. 4:11) Eñin unin jej aikuj kajjitõk ippãd make, ‘Wõn eo eaorõktata ilo mour eo aõ, ña ke ak Jeova?’ Elukkuun aorõk bwe jen etale uwaak eo ad ñan kajjitõk in.
Men eo Ear Wal̦o̦k ilo Jikin Kallib in Iden
3, 4. Ewi wãween an kar Setan m̦on̦e Iv, im ta eo Iv ear kõm̦m̦ane?
3 Etke elukkuun aorõk bwe jen uwaake kajjitõk in? Jen bar jepl̦aak likl̦o̦k ñan men eo ear wal̦o̦k ilo jikin kallib in Iden. Ilo ijin, enjel̦ eo enana etan Setan Tepil̦ ear kapoiki Iv. Ear m̦on̦e Iv bwe en likũt kõn̦aan ko an m̦okta im kõjekdo̦o̦n kien eo an Jeova ñan erro Adam. (Jen. 2:17; 2 Ko. 11:3, UBS) Kõn an kar po ippãn Setan, Iv ear kwal̦o̦k an jab kautiej Jeova. Ear kalikkar bwe el̦apl̦o̦k an kaorõk e make jãn Jeova. Ak ewi wãween an kar Setan maroñ in kar kapoiki Iv?
4 Setan ear kajerbal jet wãween ko retao ñan an kapoiki Iv. (Riit Jenesis 3:1-5.) M̦oktata, Setan ear jab kajerbale ãt eo etan Anij, Jeova. Ear kajerbale wõt naan in “Anij.” Ilo okõtan, ri jeje eo an bok in Jenesis ear kajerbale etan Anij ilo eoon eo m̦oktata ilo japter 3. Kein karuo, Setan ear kwal̦o̦k kajjitõk in etao: “E m̦ool ke Anij ear ba, ‘Kom̦win jab m̦õñã jãn wõjke otemjej ilo jikin kallib eo’?” Setan ear jel̦ã kõn kien eo an Jeova ak ear riab. (Jen. 2:16) Ilo wãween in, ear kajjioñ kariab naan ko an Anij ñan Adam im Iv. Setan ear kõn̦aan bwe Iv en jab kaorõk im pokake kien eo an Jeova ñan erro Adam. Kein kajilu, Setan ear jab kajerbale naan in ‘kwe’, ak ear kajerbale naan in ‘kom̦’ ilo an kar kõnnaan ñan Iv. Ilo wãween in, ear kõm̦m̦an an Iv l̦õmn̦ak bwe eutiejl̦o̦k jãn l̦eo pãleen im ej aikuj kõm̦m̦ani pepe ko ñan erro. Ta eo Iv ear kõm̦m̦ane? Ear jab kepaake l̦eo pãleen m̦okta ak ear wõnm̦aanl̦o̦k wõt im uwaake jedpãnit eo im ba: “Kõm maroñ in m̦õñã jãn leen wõjke ko ilo jikin kallib eo.”
5. (a) Ta eo Setan ear m̦on̦e Iv bwe en l̦õmn̦ak wõt kake? (b) Ilo an kar kañ leen wõjke eo, ta eo Iv ear kalikkare?
5 Setan ear bar riab im ba bwe ejjab jim̦we an Anij kakien Adam im Iv bwe ren “jab m̦õñã jãn wõjke otemjej ilo jikin kallib eo.” Setan ear bar kõm̦m̦an bwe Iv en l̦õmn̦ak kõn e make im mour eo an. Ear riabe Iv im ba bwe emaroñ “ãinwõt Anij.” Ãliktata, ear maroñ kõm̦m̦an bwe Iv en lukkuun l̦õmn̦ak wõt kõn wõjke eo im jab kõn kõtaan eo an eaorõk ippãn Jeova, eo ear lel̦o̦k ñan e men otemjej. (Riit Jenesis 3:6.) Ekabũrom̦õjm̦õj bwe ilo an kar kañ leen wõjke eo, Iv ear kalikkar bwe mour eo an el̦apl̦o̦k an aorõk jãn Jeova.
Men eo Ear Wal̦o̦k ñan Job
6. Ta eo Setan ear ba kõn Job? Im ta eo ear pel̦l̦o̦k ñan an Job kõm̦m̦ane?
6 Elõñ iiõ ko tokãlik, Job ear bar wõnm̦ae ejja men in wõt. Ear pel̦l̦o̦k juon iien ñan an maroñ kalikkar wõn Eo el̦apl̦o̦k an aorõk ilo mour eo an. Ke Jeova ear kwal̦o̦k ñan Setan bwe Job ear juon eo etiljek, Setan ear ba: “Ta Job enaj kar kautiej yuk elañe kwar jab kejerammõne ke?” (Riit Job 1:7-10, UBS.) Setan ej pere Job im ba bwe unin an karejar ñan Anij ej kõnke Anij ej kajeraam̦m̦ane im ejjab kõnke ej yokwe Anij. Job wõt emaroñ kariabe naan kein retao an Setan, im ear pel̦l̦o̦k juon iien ñan an kõm̦m̦ane men in.
7, 8. Ta mãlejjoñ ko Job ear iioni ilo mour eo an? Ta eo Job ear kalikkar im kwal̦o̦ke ilo an kar tiljek wõt?
7 Jeova ear kõtl̦o̦k an Setan bõktok elõñ jorrããn ko ñan Job. (Job 1:12-19) Ta eo Job ear kõm̦m̦ane ke ear iion jorrããn kein? Baibõl̦ eo ej ba bwe “ear jab jerawiwi im notaik Anij.” (Job 1:22, UBS) Mekarta, Setan ear jab ebbeer. Ear bar ba ñan Jeova: “Juõn armij emaroñ jolok men ko otemjej mweien kinke en kejbarok mour eo an.” (Job 2:4, UBS) Setan ear ba bwe el̦aññe mour an Job enaaj pãd ilo kauwõtata, Job enaaj jol̦o̦k an tiljek im enaaj kalikkar bwe el̦apl̦o̦k an aorõk mour eo an jãn Jeova.
8 Setan ear kõm̦m̦an bwe Job en bõk juon nañinmej ekajõjõ im ekõmetak. Bareinwõt, lio pãleen Job ear iuuni bwe en kõnono n̦ae Anij im mej. Im tokãlik, l̦õm̦aro jilu m̦õttan rar itok im n̦aruon Job bwe unin an iioni men kein ej kõnke enana men ko ear kõm̦m̦ani. (Job 2:11-13; 8:2-6; 22:2, 3) Bõtab, meñe Job ear lukkuun eñtaan, ear dãpij wõt an tiljek ñan Jeova. (Riit Job 2:9, 10, UBS.) Ilo an kar tiljek, ear kalikkar bwe Jeova ej eo eaorõktata ilo mour eo an. Joñak in an Job ear bareinwõt kalikkar bwe armej ro rejjab weeppãn ewõr aer maroñ ñan kariabe naan ko retao an Setan.—Keidi Jabõn Kõnnaan 27:11.
Jijej Ear Kalikkar Wõn Eo Eaorõktata ilo Mour eo An
9. (a) Ewi wãween an kar Setan kajjioñ kapo Jijej? (b) Ta eo Jijej ear kõm̦m̦ane?
9 Ãlikin an kar Jijej peptaij, Setan ear kajjioñ kapo e. Ear kajjioñ kõm̦m̦an bwe Jijej en kalikkar bwe eaorõkl̦o̦k kõn̦aan ko an jãn Jeova. Ewõr jilu men ko Setan ear kajjioñ kapo Jijej kaki. M̦oktata, ear kajjioñ kapo Jijej bwe en ukot dekã ko ñan pilawã. (Matu 4:2, 3) Jijej ear lukkuun kwõle kõnke ear jitlo̦k ium̦win 40 raan. Kõn men in, Setan ear kajjioñ m̦on̦e Jijej bwe en kajerbale kajoor eo an ilo kabwilõñlõñ ñan katõprak kõn̦aan in an. Ta eo Jijej ear kõm̦m̦ane? Ear jab ãinwõt Iv, ak ear l̦õmn̦ak wõt kõn naan ko an Jeova im ilo m̦õkaj ear jum̦ae Setan.—Riit Matu 4:4.
10. Etke Setan ear kõn̦aan bwe Jijej en kãlal̦l̦o̦k jãn raan tampel̦ eo?
10 Setan ear bar kajjioñ kapo Jijej bwe en l̦õmn̦ak kõn e make. Ear ba ñan Jijej bwe en kãlal̦l̦o̦k jãn ilõñin tampel̦ eo. (Matu 4:5, 6) Etke Setan ear kõn̦aan bwe en kõm̦m̦ane men in? Setan ear ba bwe el̦aññe Jijej enaaj kãlal̦l̦o̦k im ejjel̦o̦k jorrããn ej wal̦o̦k ñan e, innem men in enaaj kam̦ool bwe ej “Nejin Anij.” Setan ear kõn̦aan bwe Jijej en l̦õmn̦ak kõn e make im bwe en buñbuñ im̦aan mejen armej. Setan ejel̦ã bwe juon emaroñ kõm̦m̦ani men ko rekauwõtata kõnke ekõn̦aan buñbuñ im̦aan mejen ro jet im ejjab kõn̦aan bwe armej ro ren l̦õmn̦ak bwe epuwal̦. Setan ear bar kajerbale naan ko an Anij ilo etao, bõtab Jijej ear jab po kõnke el̦ap an kar mel̦el̦e kõn naan ko an Jeova. (Riit Matu 4:7.) Ilo an kar jab po ippãn Setan, Jijej ear kalikkar bwe Jeova eaorõkl̦o̦k jãn mour eo an make.
11. Etke Jijej ear m̦akoko in bõke men eo Setan ear kajjioñ in lel̦o̦k ñan e?
11 Ãliktata, Setan ear kajjioñ lel̦o̦k aolep aelõñ ko ilo lal̦ in ñan Jijej. (Matu 4:8, 9) Jijej ear jab po ilo men in. Ear kile bwe el̦aññe enaaj bõke men in Setan ej lel̦o̦k ñan e, enaaj kaarmejjeteik eo Eutiejtata, Jeova Anij. (Riit Matu 4:10.) Ilo aolep wãween kein, Jijej ear uwaake Setan ilo an kar kajerbali eoon ko im rej kalikkar an kautiej Jeova.
12. Ta men eo epen Jijej ear jelm̦ae? Im ta eo jemaroñ katak jãn joñak eo an?
12 Ke ear epaakel̦o̦k iien mej eo an, Jijej ear jelm̦ae juon men epen. Ilo aolepen iien ko ear kwal̦o̦k naan, Jijej ear kalikkar bwe ear m̦õn̦õn̦õ in ajel̦o̦k mour eo an. (Matu 20:17-19, 28; Luk 12:50; Jon 16:28) Bõtab, ear kile bwe armej ro renaaj n̦aruon kõn jet men ko renana im rejjab m̦ool. Renaaj bareinwõt m̦ane kõnke rej l̦õmn̦ak bwe ear juon eo ear jerawiwi n̦ae Anij. Wãween kein renana im renaaj wal̦o̦k ñan e rar lukkuun kõm̦m̦an bwe en inepata. Jijej ear jar ñan Anij im ba: “O Jema, el̦aññe e maroñe en ilo̦k kab in jãn Eõ.” Bõtab ear wõnm̦aanl̦o̦k wõt im ba: “A en jab ankil Aõ, a ankil Am̦.” (Matu 26:39) Aet, Jijej ear tiljek wõt m̦ae tõre eo ear mej im ear lukkuun kalikkar bwe Jeova ej eo eaorõktata ilo mour eo an!
Wõn Eo Eaorõktata ilo Mour ko Ad?
13. Ta ko jemaroñ katak jãn joñak eo an Iv, Job, im Jijej?
13 Ta ko em̦õj ad katak kaki kiiõ? Jaar katak bwe ro im rej ãinwõt Iv rej kalikkar bwe Jeova ejjab aorõktata ilo mour ko aer. Etke? Kõnke el̦ap aer l̦õmn̦ak kõn er make im kõn̦aan ko aer. Jaar bar katak jãn joñak eo em̦m̦an an Job. Ear kwal̦o̦k bwe armej ro rejjab weeppãn ewõr aer maroñ ñan kalikkar bwe Jeova eaorõktata ilo mour ko aer meñe rej iion el̦ap mãlejjoñ ko im rejjab lukkuun mel̦el̦e etke rej wal̦o̦k ñan er. (Jem. 5:11) Ãliktata, joñak eo an Jijej ej katakin kõj bwe eaorõkl̦o̦k ñan kabuñbũruon Jeova meñe jemaroñ jook ak nana etad ippãn armej ro. (Hi. 12:2) Bõtab, ewi wãween jemaroñ l̦oori waanjoñak kein ilo mour ko ad iien otemjej?
14, 15. Ewi wãween an kar Jijej oktak jãn Iv ke ear iion menin kapo ko? Im ewi wãween jemaroñ anõk joñak eo an Jijej? (Jouj im uwaak jãn pija eo ilo peij 18.)
14 Jab kõtl̦o̦k bwe menin kapo ko ren kõm̦m̦an am̦ mel̦o̦kl̦o̦k Jeova. Ke Setan ear kapo e, Iv ear jab bõjrak an kallimjeke ak l̦õmn̦ak kõn men eo im Setan ear kapoik e kake. Ear lukkuun kallimjeke leen wõjke eo im ear “loe joñan an aibuijuij wijki eo, im joñan an enno men ko leen ñõn mõñã.” (Jen. 3:6, UBS) Men in Iv ear kõm̦m̦ane ear lukkuun oktak jãn men eo Jijej ear kõm̦m̦ane ke Setan ear kajjioñ kapoiki! Job ear jab kõtl̦o̦k bwe menin kapo ko ren kõm̦m̦an an mel̦o̦kl̦o̦k ta ko renana remaroñ wal̦o̦k ñan e el̦aññe enaaj po. Ear kõtl̦o̦k wõt bwe Naan in Anij en tõl e.
15 El̦aññe jej iion menin kapo ko, ta eo jej aikuj kõm̦m̦ane? El̦aññe enaaj to l̦o̦k wõt ad l̦õmn̦ak kõn menin kapo eo, enaaj penl̦o̦k ñan ad kõm̦m̦ane men eo ejim̦we. (Jem. 1:14, 15) Jej aikuj in m̦õkaj im jol̦o̦k kõn̦aan in enana jãn ippãd, meñe emaroñ lukkuun pen. (Matu 5:29, 30) Jej aikuj ãinwõt Jijej im l̦õmn̦ak kõn ta ko remaroñ wal̦o̦k el̦aññe jej kõm̦m̦ane juon pepe, im ewi wãween pepe eo ad emaroñ jelõt kõtaan eo ad ippãn Jeova. Jej aikuj keememej naan in jiroñ ko an Jeova ilo Baibõl̦ eo. Ilo wãween in, jenaaj kalikkar ñan Jeova bwe eaorõktata ilo mour ko ad.
16-18. (a) Ta ko rej kabũrom̦õj kõj? (b) Ta eo enaaj jipañ kõj ñan kijenmej wõt?
16 Jab n̦aruon Jeova el̦aññe kwõj iion jorrããn ko. (JK. 19:3, UBS) Ke jej epaakel̦o̦k jem̦l̦o̦kin jukjuk im pãd in enana, elõñl̦o̦k ro doon Jeova rej iion jorrããn ko. Jejjab kõtmãne bwe Jeova enaaj kõjparok ro doon ilo kabwilõñlõñ ñe rej iion men kein. Ãinwõt Job, jet iien jemaroñ bũrom̦õj im ebbeer ñe ro rejitenburu ippãd rej mej ak ñe jej iion apañ ko rel̦ap.
17 Job ear jab mel̦el̦e ta unin an kar Jeova kõtl̦o̦k bwe jorrããn ko ren wal̦o̦k ñan e, im jet iien emaroñ ãindein ad l̦õmn̦ak. Bõlen em̦õj ad roñ bwe elõñ ro jeid im jatid rar mej kõn an wal̦o̦k jorrããn ko. Ñan waanjoñak, jet ro jeid im jatid rar mej ke juon m̦akũtkũt lal̦ ear wal̦o̦k ilo Haiti. Ak bõlen em̦õj ad roñ bwe jet ri nana rar m̦ane juon jeid im jatid ak bwe juon ear pãd ilo juon jorrããn me ear wal̦o̦k ilo jidimkij. Im jet iien jemaroñ inepata im ebbeer kõn ad iion jet wãween ko repen ak ñe ejjab jim̦we an ro jet kõm̦m̦an ñan kõj. Kõn an lukkuun eddo bũruod kõn men kein, jemaroñ ba naan kein: ‘O Jeova, etke kwõj kõtl̦o̦k bwe men kein ren wal̦o̦k ñan eõ? Ta eo enana iar kõm̦m̦ane?’ (Hab. 1:2, 3) Ta eo enaaj jipañ kõj ñan kijenmej wõt ñe jej iion men kein?
18 Jen jab kajju l̦õmn̦ak bwe unin an wal̦o̦k jorrããn kein ej kõnke Jeova ejjab m̦õn̦õn̦õ ippãd. Jijej ear kalikkar bwe jorrããn ko rejjab itok jãn Anij ke ear kwal̦o̦k kõn ruo jorrããn ko im rar wal̦o̦k ilo tõre ko an. (Riit Luk 13:1-5, UBS.) Elõñ jorrããn ko rej wal̦o̦k kõnke jerata ej pãd im̦aan men otemjej. (Ekl. 9:11, UBS) Ak jekdo̦o̦n ta eo ej kõm̦m̦an ad bũrom̦õj, jemaroñ kijenmej wõt el̦aññe jej reilok wõt ñan Jeova, ‘Anij in kaenõm̦m̦an.’ Enaaj jipañ kakajoor kõj bwe jen maroñ tiljek im kijenmej wõt.—2 Ko. 1:3-6.
19, 20. Ta eo ear jipañ Jijej ñan kijenmej wõt meñe ear iion wãween ko rekajookok? Im ta eo emaroñ jipañ kõj ñe jej iion ejja wãween in wõt?
19 Kwõn jab jook ak utiej bõro. Kõnke ear ettã bũruon Jijej, ear maroñ “likiti mour eo an, bwe en mour kin biktokin juõn ri kamakoko.” (Pil. 2:5-8, UBS) Ear maroñ kijenmej ium̦win elõñ wãween ko rekajookok kõnke ear atartar wõt ioon Jeova. (1 Pi. 2:23, 24) Men in ear jipañ e ñan kõm̦anm̦an ankilaan Jeova m̦oktata ilo mour eo an. Tokjãn men in, Jeova ear lel̦o̦k ñan e juon jerbal eutiej. (Pil. 2:9) Jijej ear rõjañ ri kal̦oor ro an bwe ren l̦oore joñak eo an.—Matu 23:11, 12; Luk 9:26.
20 Jet iien, mãlejjoñ ko jej iioni remaroñ lukkuun kõm̦m̦an bwe jen jook. Bõtab jen ãinwõt rijjelõk Paul ke ear ba: “Kõn men in, ij bareinwõt eñtaan ilo men kein, a I jab jook bwe I jel̦ã Eo iar lõke E, im e reel bũruõ bwe E maroñ in kõjparok men eo iar likũt e ñan E, m̦ae raan eo.”—2 Ti. 1:12.
21. Ta eo jen kate kõj ñan kõm̦m̦ane?
21 Baibõl̦ eo ear kanaan bwe ilo tõre kein ad “armej ro renaaj yokwe er make.” (2 Ti. 3:2) Eñin unin jej pãd ibwiljin elõñ armej ro im el̦ap aer l̦õmn̦ak wõt kõn er make im jab kõn Jeova. Jen kõjparok kõj bwe jen jab ãinwõt armej rein! Im jen kate kõj ñan likũt Jeova m̦oktata ilo mour eo ad meñe jej iion menin kapo ko, jorrããn ko, ak men ko rekajookok!
Ta eo Jemaroñ Katak Jãn . . .
• wãween an kar Setan kapoiki Iv?
• joñak eo an Job ke ear iion apañ ko rel̦ap?
• joñak eo an Jijej kõn men eo ear kaorõke ilo mour eo an?
[Kajitõk ko ñan katak]
[Pija ilo peij 17]
Iv ear kalikkar bwe eaorõkl̦o̦k mour eo an jãn Jeova
[Pija ilo peij 18]
Kõm̦anm̦an ankilaan Jeova kar men eo eaorõktata ippãn Jijej, im ear jab po ilo menin kapo ko an Setan
[Pija ilo peij 20]
Rej kwal̦o̦k naan ãlikin an kar m̦akũtkũt lal̦ ilo Haiti
Jen reilok wõt ñan Jeova, ‘Anij in kaenõm̦m̦an,’ ñe jej iion wãween ko repen
