Kajjitõk ko jãn Ro Rej Riit

Ta eo in kõm̦m̦ane ñe ewõr juon aõ kajjitõk kõn juon men iar riiti ilo Baibõl̦ ak ñe ij aikuj naan in kakapilõk kõn juon aõ apañ?

Jabõn Kõnnaan 2:​1-5 ej rõjañ kõj kajjojo ñan kate kõj “kappukot” jel̦ãl̦o̦kjen̦ im lol̦o̦kjen̦ ãinwõt ñe jej kappok “m̦weiuk ko rettino.” Men in ej kalikkar bwe jej aikuj make kate kõj ñan pukot uwaak in kajjitõk ko ad kõn Baibõl̦ eo im pukot mejelan apañ ko ad make. Ewi wãween jemaroñ kõm̦m̦ane men in?

Bok eo etan Bõk Tokjãn jãn Jikuul̦ in Kwal̦o̦k Naan Eo (Benefit From Theocratic Ministry School Education), * ilo peij 33 ñan 38 ej kwal̦o̦k ewi wãween jemaroñ kappukot mel̦el̦e ko ñan kajjitõk ko ad. Ej kwal̦o̦k men ko jemaroñ kõjerbali me “ri karejar e tiljek im mãlõtlõt” rar litok ñan jipañ kõj. (Matu 24:​45) Ilo peij 36 ej kõmel̦el̦e kõn ewi wãween jemaroñ kõjerbal Laajrak in Bok ko Jet an Doulul eo (Watch Tower Publications Index). Em̦õj kajenolo̦k im kõlaajrak bok ko ekkar ñan katak ko im eoon ko rej kwal̦o̦k kaki. Kõn men in, ñe jej pukot juon naan ak eoon ilo Watch Tower Publications Index jenaaj lo laajrak in aolep bok ko me rej kwal̦o̦k kõn naan eo ak eoon eo. Jemaroñ bareinwõt kõjerbal Taitõl̦ in Katak ko jen Imõniaroñroñ ko (Subject Index) im rej wal̦o̦k ilo allõñ in Tijemba kajjojo iiõ. Jab ekaiuriur ñe kwõj pukot mel̦el̦e ko kõn kajjitõk ko am̦ ak naan in kakapilõk ko kwõj aikuji. Keememej bwe ej ãinwõt ñe kwõj pukot “m̦weiuk ko rettino.” Innem enaaj bõk iien im am̦ aikuj kate eok ñan kõm̦m̦ane men in.

Ilo m̦ool, ewõr jet eoon me bok ko ad rejjab lukkuun kõmel̦el̦e kaki. Im meñe ewõr bok ko im rej kõmel̦el̦e kõn eoon eo kwõj pukot mel̦el̦ein, ak bõlen men in ejañin uwaake kajjitõk eo am̦. Bareinwõt, ewõr kajjitõk ko kõn jet bwebwenato ko ilo Baibõl̦ kõnke Baibõl̦ eo ejjab kwal̦o̦k tibrikin men ko rar wal̦o̦k. Kõn men in, jejjab maroñ kajju lo uwaak ko ñan aolep kajjitõk ko. Innem, jej aikuj kõjparok bwe jen jab kajidede ad uwaak kõn men ko jejjab lukkuun jel̦ã uwaakier. El̦aññe jejjab kõjparok, eokwe jenaaj jujen wõt kõm̦m̦an akwããl kõn men ko “rej jab jerbale karõk eo an Anij, eo ej alikkar kin tõmak.” (1 Timote 1:​4, UBS; 2 Timote 2:​23; Taitõs 3:⁠9) Ejjab kun̦aan ra eo el̦ap ilo New York ak ra eo jej pãd ium̦win ñan etale im uwaaki aolep kajjitõk ko ejjel̦o̦k uwaakier ilo bok ko ad. Jemaroñ jokwane im jubũruod kõn mel̦el̦e ko ilo Baibõl̦ im remaroñ tõl mour ko ad. Baibõl̦ eo ejjab kwal̦o̦k aolep mel̦el̦e ko kõnke jen maroñ kwal̦o̦k ad tõmak ilo Anij, eo im ej an Baibõl̦ eo.​​—Lale peij 185 ñan 187 ilo bok eo etan Ruwaakl̦o̦k ñan Jeova (Draw Close to Jehovah). *

Ta el̦aññe kwaar pukot aolep mel̦el̦e ko kõn juon am̦ kajjitõk ak apañ, bõtab kwõj jañin lo juon uwaak ak naan in kakapilõk eo kwõj aikuji? Kwõmaroñ kepaake juon eo im ekajoor ilo tõmak, bõlen juon iaan elder ro ilo congregation eo am̦. Elder ro ebwe aer lukkuun jel̦ã kobban Baibõl̦ eo, im bareinwõt el̦ap imminene ippãer kõn wãween mour in Kũrjin. Enaaj l̦apl̦o̦k aer maroñ jipañ eok ñe kwõj aikuj naan in kakapilõk kõn juon am̦ apañ ak pepe. Elder rein rejel̦ã kajjiem̦ im repãd iturum̦ im remel̦el̦e kõn wãween pãd eo am̦. Jab mel̦o̦kl̦o̦k in jar ñan Jeova im kwal̦o̦k aolep men ko kwõj inepata kaki. Im kajjitõk ippãn kõn kajoor eo an bwe en tõl eok, “bwe Jeova ej letok mãlõtlõt . . . im lol̦o̦kjen̦.”​​—Jabõn Kõnnaan 2:6; Luk 11:13.

[Kamelele eo itulal]