Ruwaakl̦o̦k ñan Anij

Kaenõm̦m̦an ñan Ro Rebũrom̦õj

JUON kõrã im ekkã an nañinmej in bũrom̦õj ear ba: “Jeova ejjab yokwe eõ im ejjab m̦õn̦õn̦õ ippa.” Kõrã in ear lukkuun l̦õmn̦ak bwe Jeova ejjab kaorõke. Ak m̦ool ke men in bwe Jeova ejjab kaorõke ri karejar ro an im rej bũrom̦õj? Naan ko an Devid ilo bok in Sam 34:​18, UBS ej letok juon uwaak eo im elukkuun kaenõm̦m̦an.

Devid ejel̦ã kõn joñan jorrããn ko rej wal̦o̦k ñan ri karejar ro an Jeova ñe rej bũrom̦õj. Ke ear juon likao, ear mour ãinwõt juon ri jipo̦kwe. Aolep iien ear ko jãn Saul, kiiñ eo ebbanban im enana. Devid ear aikuj ko im kappok jikin an kũttiliek kõnke Saul ear kõn̦aan m̦ane. Ear ko ñan Gat, juon bukwõn me armej ro ie rar kõjdate ri Israel ro, kõnke ear jel̦ã bwe Saul eban kar pukote ilo jikin in. Gat ej m̦õttan jikin ko im rej pãd ium̦win kajoor eo an ri Pilistia ro. Bõtab, ke ri Pilistia ro rar kile bwe Devid ej juon ri Israel, ear kilen uriekak bwe ren jab m̦ane. Devid ear nõbare Jeova im ba bwe E eo ear lo̦mo̦o̦ren e. Eñin unin ear je Sam jebta 34.

Devid ear ke l̦õmn̦ak bwe Anij ejjab epaake im ejjab kea kake ro rebũrom̦õj? Devid ear je: “[Jeova] ej ebak ñõn ro rej ebbwer. Ej lomoren ro ejako air kejatdrikdrik.” (Eoon 18, UBS) Jen lale ewi wãween naan kein remaroñ kaenõm̦m̦an im kakajoor juon eo ej bũrom̦õj.

‘Jeova ej ebak.’ Juon kõmel̦el̦e ej ba bwe naan kein rej mel̦el̦ein bwe el̦ap yokwe ippãn Anij, im epojak in jipañ im lale ro doon. Jej m̦õn̦õn̦õ kõnke jejel̦ã bwe Jeova ej lale im kõjparok armej ro an. Ej lo ta ko rej wal̦o̦k ñan er ilo ‘iien kein renana’ im ejel̦ã kõn eñjake ko aer.​​​—2 Timote 3:1; Jerbal 17:⁠27.

“Ro rej ebbwer.” Ekkar ñan juon ri mãlõtlõt eo ej etale Baibõl̦ eo, ej ba bwe ke Devid ear je naan kein ear jitõñl̦o̦k ñan ro im rej bũrom̦õj kõn elõñ un ko. Ri karejar ro retiljek an Anij rainin rej bareinwõt iion el̦ap apañ ko im rej kõm̦m̦an aer bũrom̦õj im ebbeer.

“Ro ejako air kejatdrikdrik.” Kõn an l̦ap an armej ro bũrom̦õj, jet iien rej l̦õmn̦ak bwe ejjel̦o̦k tokjeir. Im ejjel̦o̦k jabdewõt men en em̦m̦an rej l̦õmn̦ak kaki. Juon bok an ri ukok Baibõl̦ ro ej ba bwe armej rein ejjel̦o̦k aer kõjatdikdik bwe men ko rem̦m̦an remaroñ wal̦o̦k ñan er.

Jeova ej ke jipañ ro me rej ebbeer im el̦ap aer bũrom̦õj? Ej ke ettol̦o̦k jãn er? Ej ke l̦õmn̦ak bwe ejjel̦o̦k tokjeir im ejjel̦o̦k tokjãn an jipañ er? Jeova ej jipañ im kõjparok armej rein. Ej ãinwõt juon eo im ej jibur im kaenõm̦m̦an eo nejin ñe ej bũrom̦õj ak inepata. Jeova ej pãd iturin ro im rej kũr ñan e bwe en jipañ er. Im el̦ap an m̦õn̦õn̦õ in kaenõm̦m̦an bũruon ro rej bũrom̦õj im l̦õmn̦ak bwe ejjel̦o̦k tokjeir. Ej lel̦o̦k mãlõtlõt im kajoor ñan er bwe ren maroñ kijenmej ilo jabdewõt apañ ko rej iioni.​​​—2 Korint 4:7; Jemes 1:⁠5.

Etke kwõjjab pukot wãween ko ñan am̦ maroñ ruwaakl̦o̦k ñan Jeova? Jeova Anij el̦ap an tũriam̦okake. Ej kallim̦ur im ba: “Ij jokwe . . . ippãn eo . . . ettã bũruon, bwe In kemour an eo ri ettã, im kemour bũruon eo ri bũrom̦õj.”​​​—Aiseia 57:15.