Men ko Renana Rej Wal̦o̦k ñan Kõrã Ro
Men ko Renana Rej Wal̦o̦k ñan Kõrã Ro
“Ñe ij lo an nana aer kõm̦m̦an ñan kõrã ro, men in ej kõm̦m̦an bwe in jab kõn̦aan rũttol̦o̦k im erom juon kõrã.” —ZAHRA, juon leddik 15 an iiõ, kar je naan kein an ilo bok eo etan GEO, ilo kajin France.
NAAN kein ituanmoon me an leddik in rej kwal̦o̦k kõn men ko renana im rekabũrom̦õjm̦õj rej wal̦o̦k ñan kõrã ro ipel̦aakin lal̦ in. Leddik ro im kõrã ro rej eñtaan im jorrããn itok wõt jãn an armej ro kalijekl̦o̦k im lãj ñan er. Erkein ej men ko rej wal̦o̦k im rej jelõt er:
● Kalijekl̦o̦k. Ilo aelõñ ko ilo Eijia, enañin aolep ri pãlele ro rejjab kõn̦aan bwe en wõr nejier leddik. Ilo kar ripoot eo an UN ilo 2011, ear kwal̦o̦k bwe ilo jikin kein ekepaak 134 milien kõrã ro rej jako kõn aer m̦an lo̦jieer, m̦õrõik niñniñ ko nejier, im kõn aer jool.
● Jel̦ãl̦o̦kjen̦. Ilo pel̦aakin lal̦ in, elukkuun lõñ ro me rejjab jikuul̦ ak ñe rej jikuul̦ rej bõjrak wõt ilo kilaaj emãn. Enañin aolepen rein rej kõrã im leddik ro.
● Rape im kabn̦õn̦õ. Elõñl̦o̦k jãn 2.6 bilien kõrã ro rej pãd ilo aelõñ ko me l̦õm̦aro pãleer rej jiped er im ko̦kkure er bwe ren pãd ippãer meñe rejjab kõn̦aan. Im ekkar ñan aelõñ eo aer ejjel̦o̦k jorrããn ilo men in.
● Ãjmour. Ilo aelõñ ko rejeram̦õl, aolep l̦o̦kun ruo minit, eban jab wõr juon kõrã ej mej jãn an wõr apañ ilo iien eo ej bõro̦ro ak kõmmour. Unin an kõrã ro mej ej kõnke ejjel̦o̦k kein taktõ ñan jipañ er.
● Maroñ im jim̦we. Ilo elõñ jikin ko, meñe elukkuun l̦ap an kõrã ro ekkat im jerbal ilo atake ko, ak ekkar ñan kien ko aer ejjel̦o̦k an kõrã ro maroñ ñan jolõti bwidej ko ak bwe en wõr jikier.
Etke em̦õj bõk maroñ im jim̦we ko an kõrã ro? Kõnke jet aelõñ ko rej l̦oore m̦antin kabuñ ko im tõmak ko aer me rej kwal̦o̦k im ba bwe ejjab nana ñan m̦an kõrã ro im lãj ñan er. Juon nuujpeba in France ear je naan ko an juon l̦oãr in India etan Chandra Rami Chopra, ke ear ba: “Aolep kakien ko me kabuñ ko rej l̦oori rej juon wõt kõn juon men: Rej rejetak an armej ro kalijekl̦o̦k ak kajejtokjãn kõrã ro.”
Eñin ke bar l̦õmn̦ak eo am̦? Kwõj ke l̦õmn̦ak bwe Baibõl̦ ej kwal̦o̦k bwe ejjel̦o̦k tokjãn kõrã ro, ãinwõt an bok ko jet an kabuñ ko kwal̦o̦k? Eokwe, ñan jet, rej ba bwe ewõr jet eoon ko ilo Baibõl̦ me rej kõm̦m̦an bwe ren l̦õmn̦ak rot in. Bõtab, ekkar ñan Baibõl̦, ewi wãween an Anij lukkuun l̦õmn̦ak im watõk kõrã ro? Meñe elõñ armej ro rej lukkuun l̦õmn̦ak im watõk bwe kõrã ro rettã im ejjel̦o̦k tokjãer, ak ad lukkuun m̦ool ilo ad etale ta eo Baibõl̦ ej ba enaaj jipañ kõj ñan lo uwaak eo.
[Pija Credit Line ilo peij 3]
© G.M.B. Akash/Panos Pijas
