Anij ejjab aikuji juon pãleen bwe en maroñ wõr nejin. Ejjab aikuji men in kõn ke e eo ear kõm̦anm̦an men otemjej me rej pãd im mour. Ear kõm̦anm̦an armej bwe ren maroñ anõke wãween ko rem̦m̦an kõn E. Eñin unin armej eo m̦oktata me Anij ear kõm̦anm̦ane, Adam, kar n̦aetan “nejin Anij.” Kar bar n̦aetan Jijej “Nejin Anij.” Etke? Kõnke aolep wãween ko ippãn Jijej rej ãinl̦o̦k wõt wãween ko ippãn Jemãn.​—Riit Luk 3:38; Jon 1:14, 49, UBS.

Anij ear kõm̦anm̦ane Jijej m̦okta jãn an kar kõm̦anm̦ane Adam. Ilo m̦ool, Anij ear kõm̦anm̦ane Jijej innem kõjerbale bwe en kõm̦anm̦ani men ko jet, ekoba enjel̦ ro. Eñin unin Baibõl̦ ej ba bwe Jijej ear “l̦otak m̦okta jãn menin kõm̦anm̦an otemjej.”​—Riit Kolosse 1:15, 16.

M̦okta jãn an kar Jijej l̦otak ilo Betleem, ear mour ilañ ãinwõt juon jetõb. Ke ear jejjet iien eo bwe Anij en jilkintok ñan lal̦ in, Anij ear ukot mour eo an Jijej ñan juon niñniñ lowaan lo̦jien Meri bwe en maroñ l̦otak ãinwõt juon armej.​—Riit Luk 1:30-32; Jon 6:38; 8:23.

Etke Anij ear kõtl̦o̦k bwe Jijej en itok ñan lal̦ in im l̦otak ãinwõt juon armej? Ta jerbal eo eaorõk Jijej ear kõm̦m̦ane? Kwõmaroñ loe uwaak in kajjitõk kein jãn Baibõl̦ eo. Uwaak ko ñan kajjitõk kein renaaj kal̦apl̦o̦k am̦ mel̦el̦e im kam̦m̦oolol kõn men ko Anij im Jijej rar kõm̦m̦ani ñan eok.