Kokõn̦aan ke jel̦ã kõn ta ko renaaj wal̦o̦k ñan eok ilju im jekl̦aj? Elõñ armej rekõn̦aan jel̦ã kõn ilju im jekl̦aj ko aer. Elõñ armej rej kajjioñ kwal̦o̦k kõn ta ko renaaj wal̦o̦k ilju im jekl̦aj. Jet wõt rej lo tõprak, bõtab elõñ rejjab kõnke elõñ iaan men ko rej ba rejjab jejjet im m̦ool. Jen etale jet waanjoñak ko:

• JAINTIIJ RO. Rein rej kõjerbal kein jerbal ko rekapeel im jol̦o̦k elõñ jããn bwe ren maroñ kõm̦m̦an ekkatak ko kõn ta ko renaaj wal̦o̦k ñan lal̦ in kõn an l̦ap an ettoon. Rej bar kõjerbal kein jerbal kein aer ñan katu.

• RI MÃLÕTLÕT RO. Rein rej kwal̦o̦k kobban ilju im jekl̦aj kõn ta ko renaaj wal̦o̦k ñan peejnej ko im kien ko. Juon iaan ro me rem̦weiie tata ilo lal̦ in ej Warren Buffet. Elõñ armej rej ba bwe l̦ein ej juon ri mãlõtlõt kõnke ekkã an m̦ool men ko ej ba me renaaj wal̦o̦k ñan peejnej ko. Bar juon em̦m̦aan etan Nate Silver ej etali mel̦el̦e ko im kwal̦o̦k kõn ta ko renaaj wal̦o̦k ilju im jekl̦aj. Ñan waanjoñak, ej kwal̦o̦k ta ko renaaj wal̦o̦k ilo kien en̦ an Amedka im kõn pija in alwõj ko me renaaj wiin ippãn armej.

• BWEBWENATO IN JEM̦AAN KO. Elõñ rej l̦õmn̦ak bwe mel̦el̦e ko ilo bok im bwebwenato in jem̦aan ko rej ãinwõt kanaan. Juon iaan ri jeje in jem̦aan ro ej Michel de Notredame. Elõñ armej rej l̦õmn̦ak bwe men ko ear jeje kaki rejejjet kitieer ilo raan kein. Ebar wõr juon kõl̦õn̦ta in etto an Ri Maya. Raan eo ãliktata ilo kõl̦õn̦ta in ej Tijem̦ba 21, 2012, im elõñ armej rar ba bwe enaaj kar wal̦o̦k jorrããn ko rel̦l̦ap ilo lal̦ in ilo raan jab in.

• RŨTÕL RO AN KABUÑ. Elõñ rũtõl ro an kabuñ ko rej kwal̦o̦k kõn men ko me renaaj wal̦o̦k ilju im jekl̦aj ñan kajjioñ kakkõl armej ro im kõm̦m̦an bwe en lõñ rej etal ñan im̦õn jar ko aer. Juon rũtõl in kabuñ etan Harold Camping im armej ro doon rar ba bwe lal̦ in enaaj kar jako ilo kar 2011 eo. Jejel̦ã bwe ekar jab jejjet kitien men in, kõnke lal̦ in ej pãd wõt ñan rainin.

• RO ME REJ BA BWE EWÕR AER KAJOOR ÑAN KWAL̦O̦K KOBBAN ILJU IM JEKL̦AJ. Ruo armej rebuñbuñ im elõñ rej tõmak bwe ewõr aer kajoor ñan kwal̦o̦k kobban ilju im jekl̦aj ej Edgar Cayce im Jeane Dixon. Jet iaan men ko armej rein ruo rar ba bwe renaaj wal̦o̦k rekar wal̦o̦k. Bõtab, elukkuun bar lõñ men ko rar ba bwe renaaj wal̦o̦k, ak rar jab wal̦o̦k ñan jidik. Ñan waanjoñak, Jeane ear ba bwe enaaj kar wal̦o̦k Pata eo an Lal̦ in Kein Kajilu ilo kar 1958 eo. Edgar ear ba bwe New York enaaj kar jakol̦o̦k ibul̦õn dãn ilo kar 1970 jim̦a ko.

Ewõr ke jabdewõt en̦ me jemaroñ lõke bwe enaaj jejjet im m̦ool an kwal̦o̦k kõn kobban ilju im jekl̦aj? Elukkuun aorõk kajjitõk in. Etke? Kõnke ñe jejel̦ã ta ko rej wal̦o̦k ilo raan ko rej pãd im̦aan, men in enaaj jelõt wãween ad mour im kõm̦m̦ani pepe ko.