“EJAAM̦ ÑA? Etke Anij ej kõtl̦o̦k an men in wal̦o̦k?” Erkein kajjitõk ko rar kaabn̦õn̦õik Sidnei me 24 an iiõ im ej pãd ilo Brazil. Ãlikin an kar likao in jirilo̦k im jorrããn jãn juon kein tutu me rej jikeet lal̦tak jãne, ear aikuj kõjerbal wõt wiil̦jea.

Elõñ armej rej eñtaan kõn aer kar jirilo̦k im jorrããn, nañinmej, an mej juon eo ejitõnbõro ippãer, an wal̦o̦k jorrããn ko rel̦l̦ap ilo aelõñ eo aer, im an l̦ap tarin̦ae. Innem armej ro rej inepata ippãn Anij kõn aer eñtaan. Eto an jorrããn kein rel̦l̦ap wal̦o̦k kõnke Job ear bar iiooni. Joñan, ej jem̦l̦o̦k l̦o̦k juon jorrããn ñane ak ebar wal̦o̦k juon. Kõn men in, ear jino bõd an l̦õmn̦ak im ear n̦aruon Anij im ba: “Ij kũr ñan eok, ak kwõjjab uwaak; Im ñe ij jar, kwõj kõjekdo̦o̦n eõ. Kwõj kõm̦m̦an ñan eõ ilo am̦ lãj; Kwõj kaeñtaan eõ kõn aolepen am̦ kajoor.”​—Job 30:20, 21, UBS.

Job ear jab jel̦ã wõn eo ear kõm̦m̦ani men kein ñane im ear jab jel̦ã unin aer kar wal̦o̦k. Bõtab, jejeraam̦m̦an bwe Baibõl̦ ej kwal̦o̦k unin an jorrããn ko wal̦o̦k im ta ko jemaroñ kõm̦m̦ani ñe jej jelm̦ae men kein.

Baibõl̦ ej kwal̦o̦k kõn Anij bwe, “an jerbal eweeppãn; bwe ial̦ ko An otemjej rewãnõk. Juon Anij in tiljek im ejjel̦o̦k nana Ippãn, Ewãnõk im jim̦we wõt.” (Duteronomi 32:4) Innem el̦aññe Anij “ewãnõk im jim̦we,” enaaj ke kõn̦aan bwe armej ren eñtaan? Ej ke kaje im kajim̦we armej ilo an kajorrããn er?

Ilo m̦ool Baibõl̦ ej ba: “El̦aññe ewõr en̦ epo ilo menin mãlejjoñ kein, en jab ba, ‘Menin kapo kein rej itok jãn Anij.’ Bwe nana eban kapo Anij, im ejjel̦o̦k en̦ Anij ej kapoe.” (Jemes 1:13, UBS) Bareinwõt Baibõl̦ ej katakin kõj bwe jãn jinoin, Anij ear kõm̦m̦an bwe men otemjej ren jejjet im jim̦we ñan armej ro. Ear likũt armej ro ruo m̦oktata, Adam im Iv ilo juon jikin kallib eaiboojoj bwe ren jokwe ie. Ear kabwe aerro aikuj im ear lel̦o̦k jerbal ko rem̦m̦an im wõr tokjãer. Anij ear ba ñan erro: “Kom̦win tim̦on̦ im orl̦o̦k, im kobrak lal̦, im kajoor jãne.” Innem ear ejjel̦o̦k unin an Adam im Iv inepata ippãn Anij.​—Jenesis 1:28.

Bõtab jej kile bwe wãween mour rainin ejjab em̦m̦an ak ej nanal̦o̦k wõt. Ilo m̦ool, bwebwenatoun mour ko an armej ej kwal̦o̦k bwe apañ ko im jorrããn ko rej kab baj nanal̦o̦k wõt. Em̦ool an kar Baibõl̦ ba bwe “jãn jinoin ñan iien in aolep menin kõm̦anm̦an ko rej ñũr kõn eñtaan.” (Rom 8:22, UBS) Ak etke ej ãindein?

Jej aikuj bar ro̦o̦l ñan jinoin men otemjej bwe jen maroñ mel̦el̦e kõn unin an wal̦o̦k jorrããn im eñtaan. Adam im Iv rar po ippãn enjel̦ eo ear oktak im jum̦ae me kar n̦aetan Setan Tepil̦ eo. Erro ear kõjekdo̦o̦n l̦õmn̦ak eo an Anij kõn ta eo em̦m̦an im nana ilo aerro kar jab pokake kien eo an ñan jab m̦õñã jãn “wõjke in jel̦ã em̦m̦an im nana.” Tepil̦ eo ear ba ñan Iv bwe erro ban mej ñe erro jab pokake Anij. Ilo bar juon wãween ear ba bwe Anij ej riab. Setan ear bar n̦aruon Anij im ba bwe ejjab kõn̦aan bwe armej ro ren make kõm̦m̦ane pepe eo aer kõn ta eo em̦m̦an im ta eo enana. (Jenesis 2:17; 3:1-6) Ej ãinwõt ñe Setan ear ba bwe enaaj em̦m̦anl̦o̦k an armej mour ñe Anij ejjab tõl er. Men kein Setan ear riab n̦ae Anij kaki rar kõm̦m̦an menin an elõñ l̦õmn̦ak el̦aññe ekkar bwe Anij en irooj im tõl men otemjej.

Tokãlik, Setan ear bar bõklõñtak juon riab. Ear ba bwe armej rejjab m̦ool ilo aer karejar ñan Anij. Ear ba bwe unin an armej karejar ñan Anij ej kõnke ewõr men en̦ rej kõttõpare jãne. Eñin men eo ear ba ñan Anij kõn Job, rũkarejar eo etiljek. Ear ba: “Kwaar jab likũt juon wõrwõr in kaapool̦e, im m̦weo im̦õn, im men ko otemjej ippãn, ijoko otemjej ke? . . . Kwõn erl̦o̦ke peim̦ kiiõ, im uñũri men otemjej an, innem enaaj kaarmejjete Eok im̦aan mejam̦.” (Job 1:10, 11) Naan kein an Setan rar kõn Job. Bõtab, rej bar jitõñl̦o̦k ñan aolep armej bwe unin aer karejar ñan Anij ej kõnke ewõr men en̦ rej kõttõpare jãne.

Anij ej make wõt mãlõtlõt im em̦õj an lo wãween eo em̦m̦antata ñan kariab naan kein an Setan. Ta in?  Ear kõtl̦o̦k bwe armej ren tõl er make ium̦win jidik iien bwe en alikkar wõn eo wõt ewõr an maroñ ñan tõl. (Rom 11:33, UBS) Innem ad jel̦ã kõn wãween in ej kõm̦m̦an bwe jen jab inepata im n̦aruon Anij.

Wãween ko relukkuun nana rej wal̦o̦k ilo raan kein rej kaalikkar bwe armej rejjab maroñ tõl er make. Kien ko an lal̦ rejjañin de bõktok aenõm̦m̦an im kõm̦m̦an bwe jen jab ekkõl im uwõta kõn jabdewõt men ilo lal̦ in. Bareinwõt, rejjab maroñ kõm̦m̦an bwe jen lo m̦õn̦õn̦õ eo em̦ool. Ejjab men kein wõt, ak em̦õj aer kõm̦m̦an bwe en l̦apl̦o̦k wõt nana ko rej wal̦o̦k. Wãween kein rej kam̦oole naan ko ilo Baibõl̦ ke ej ba “ejjel̦o̦k en̦ emaroñ peek men otemjej ilo mour eo an.” (Jeremaia 10:23, UBS) Anij wõt emaroñ kõm̦m̦an bwe en wõr aenõm̦m̦an ñan indeeo im bwe jen lo m̦õn̦õn̦õ eo em̦ool. E wõt emaroñ kabwe aikuj ko ad el̦aññe enaaj tõl armej ro. Etke? Kõnke eñin kar baj kõn̦aan eo wõt an.​—Aiseia 45:18.

Innem, ewi wãween an Anij naaj kajejjet kũtien karõk eo an ñan armej? Kwõj keememej ke jar eo Jijej ear katakin rũkal̦oor ro an kake? Ear jar im ba: “En itok Am̦ aelõñ. Ren kõm̦anm̦an ankilaam̦ ãinwõt ilañ, bareinwõt ioon lal̦.” (Matu 6:10) Innem ikijjeen Aelõñ in, Anij enaaj jol̦o̦k men ko rej kajorrããn im kaeñtaan armej ro. Enaaj kõm̦m̦ane men in ilo iien eo em̦õj an kajejjete. (Daniel 2:44) Innem ilo iien en̦ jeban bar jerata im jeram̦õl, nañinmej, im mej. Joñan, Baibõl̦ ej ba bwe Anij enaaj “lo̦mo̦o̦ren ro rejeram̦õl ñe rej kũr ñane.” (Sam 72:12-14, UBS) Ej bar kallim̦uri ro renañinmej bwe ilo iien en̦, reban bar ba: “Inañinmej.” (Aiseia 33:24) Bareinwõt Jijej ear jel̦ã bwe Anij ej keememej wõt ro rar mej. Eñin unin Jijej ear ba: “Bwe iien eo ej itok im rimej otemjej ilo lõb renaaj roñ ainikien, im renaaj wal̦o̦k jãn libwier.” (Jon 5:28, 29, UBS) El̦ap wõt an em̦m̦an kallim̦ur kein!

L̦o̦kun 17 iiõ tokãlik jãn iien eo Sidnei ear jorrããn, ear ba: “Iar jab n̦aruon Jeova Anij kõn jorrããn eo ear wal̦o̦k. Ak ilo jinoin iar inepata ippãn. Ewõr iien ij lukkuun bũrom̦õj, im ñe ij l̦õmn̦ake aõ jaje etetal ij jañ. Bõtab jãn aõ katak Baibõl̦, imel̦el̦e bwe jorrããn eo ear wal̦o̦k ñan ña ejjab kõnke Anij ear kajeik eõ. Ak Baibõl̦ ej ba bwe ewõr iien ‘jerata ej wal̦o̦k ñan jabdewõt armej.’ Aõ jar ñan Jeova kab riiti eoon ko rejejjet ñan ña ej kakajoorl̦o̦k jem̦jerã e aõ ippãn Anij. Bareinwõt, ej jipañ ña ñan m̦õn̦õn̦õ wõt.”​—Ekklisiastis 9:11, UBS; Sam 145:18; 2 Korint 4:8, 9, 16, UBS.

Ta eo enaaj jipañ kõj ñan jab inepata ippãn Anij? Ej ilo ad aikuj keememej unin an kõtl̦o̦k an wal̦o̦k jorrããn im men ko rej kaeñtaan kõj. Ad keememej bwe m̦õttan jidik men kein renaaj jako ej bar jipañ kõj ñan jab inepata ippãn Anij. Baibõl̦ ej kallim̦uri kõj bwe Anij ej “lel̦o̦k jinõkjeej ñan ro rej pukote.” Ejjel̦o̦k pere bwe jabdewõt eo enaaj lõke im tõmak E kab Nejin eban inepata kõn jabdewõt.​—Hibru 11:6, UBS; Rom 10:11, UBS.