Шукышт шонат, пуйто Иегован Таныкше-влак — тиде ала-могай у религийын лӱмжӧ. Но 2 700 ий утла ончычак Юмо шке служитлышыже-шамычым «танык-влак» манын лӱмден (Исаия 43:10—12). 1931-ше ий марте мемнам Библийым Шымлыше-влак лӱм дене паленыт. Молан вара ме Иегован Таныкше-влак лӱмым налынна?

Тиде лӱм раш ончыкта, кӧ мемнан Юмына. Акрет годсо кидвозыш-влак дене келшышын, Юмын лӱмжӧ, Иегова, Библийыште икмыняр тӱжем гана вашлиялтеш. Шуко кусарымаште тиде лӱмым титул-влак дене алмаштеныт, мутлан, Господь да Юмо. Но кунам чын Юмо Моисейлан почылтын, тудо шкенжым Иегова манын лӱмден да раш каласен: «Тиде лӱмем курымешлан» (Исход 3:15). Туге тудо шкенжым чыла шоя юмо деч ойырен. Юмын лӱмжым нумалаш — мыланна кугу чап.

Тиде лӱм ыштыме пашанам ончыкта. Чын ыштыше Авель гыч тӱҥалын, Иеговалан ӱшанымыж нерген шуко еҥ таныклен. Курымла мучко Ной, Авраам, Сарра, Моисей, Давид да моло Юмылан ӱшанле пӧръеҥ ден ӱдырамаш «кугу таныклыше тӱшкаш» пуреныт (Еврей-влаклан 11:4—12:1). Кузе иктаж-кӧ, титакдыме айдемым аралаш манын, судышто таныкла, тыгак меат моло-влаклан Юмына нерген чыным лӱдде каласкалена.

Ме Иисусын примерже почеш ыштена. Библийыште тудым «чын да ӱшанле танык» манын лӱмдымӧ (Почмаш 3:14). Вет тудо калыклан Юмын лӱмжым палдарен да тӱняшкыжат Ачаж нерген чыным каласкалаш толын (Иоаннын 17:26; 18:37). Сандене, кӧ Христос почеш кая, тудо Иегован еҥже лийшаш да моло-влаклан Юмын лӱмжым палдарышаш. Лачак тидым Иегован Таныкше-влак ышташ тыршат.

• Библийым Шымлыше-шамыч Иегован Таныкше-влак лӱмым молан налыныт?

• Могай жап гыч тӱҥалын мландыште Иегован таныкше-влак лийыныт?

• Кӧ нерген Эн кугу Танык манын каласаш лиеш?